¹ Sika ngarud, anakko, pumigsaka iti parabur nga adda kenni Jesu-Kristo. ² Ken dagiti banbanag a nangngegam kaniak kadagiti nagsaksi, italekmo ida kadagiti napudno a tattao a makabael met a mangisuro kadagiti sabali. ³ Makipagsagabaka iti rigat kaniak a kas nasayaat a soldado ni Kristo-Jesus. ⁴ Awan ti soldado nga agserbi kabayatan a karaman isuna kadagiti aramid iti daytoy a biag, tapno mabalin a maay-ayona ti kangatoan nga opisialna. ⁵ Kasta met, a no makilumba ti siasinoman a kas atleta, saan isuna a makoronaan malaksid no makilumba babaen kadagiti pagannurotan. ⁶ Kasapulan nga umuna nga umawat iti bingayna ti nagaget a mannalon. ⁷ Panunotem no ania ti ibagbagak, ta ti Apo ti mangipaay kenka iti pannakaawat iti amin a banag. ⁸ Laglagipem ni Jesu- Kristo, a nagtaud iti kaputotan ni David, a napagungar manipud kadagiti natay. Daytoy ket segun iti mensahek maipapan iti ebanghelio, ⁹ nga isu iti pagsagsagabaak agingga iti pannakaikawarko a kas maysa a kriminal. Ngem ti sao ti Dios ket saan a naikawar. ¹⁰ Ngarud, inibturak dagiti amin a banbanag gapu kadagidiay a napili, tapno magun-odda met ti pannakaisalakan nga adda kenni Kristo Jesus, nga addaan iti agnanayon a gloria. ¹¹ Mapagtalkan daytoy a pagsasao; "No nataytayo a kaduana, makipagbiagtayto met kenkuana. ¹² No makaibturtayo, makipagturaytayto met kenkuana. No ilibaktayo isuna, ilibaknatayto met. ¹³ No saantayo a napudno, agtalinaedto latta isuna a napudno, ta saanna a mailibak ti bagina." ¹⁴ Kanayon nga ipalagipmo kadakuada dagitoy a banbanag. Ballaagam ida iti sangoanan ti Dios a saanda nga agaapa maipapan kadagiti sasao; gapu ta awan ti naimbag a maipaayna ken makadadael kadagiti makangngeg. ¹⁵ Aramidem ti kabaelam a mangiparang iti bagim a makaay-ayo iti Dios, kas iti mangmangged nga awan rasonna nga ibain, iti umiso nga panangisurona iti sao ti kinapudno. ¹⁶ Liklikam ti narugit ken awan serserbina a sarita, nga ad-adda a mangiturong iti saan a nadiosan a panagbiag. ¹⁷ Agwaras dagiti sasaoda a kasla kanser. Mairaman kadakuada da Himenio ken Fileto, ¹⁸ nga limmisi iti kinapudno. Ibagbagada a ti panagungar ket napasamaken, ket dinadael da ti pammati dagiti dadduma. ¹⁹ Nupay kasta, ti natibker a pundasion ti Dios ket sitatakder. Naikitikit iti kastoy: " Ammo ti Apo dagiti kukuana" ken "Tunggal maysa a mangawag iti nagan ti Apo ket nasken a sumina manipud iti saan a nalinteg a panagbiag." ²⁰ Iti nabaknang a pagtaengan adda dagiti saan laeng a balitok ken pirak dagiti pagkargaan. Adda met dagiti pagkargaan a kayo ken daga. Mausar dagitoy iti dadduma a nadayaw a pakausaran, ken dagiti dadduma ket mausar iti saan a nadayaw. ²¹ No dalusan ti maysa a tao ti bagina manipud iti saan a nadayaw a pannakausar, isuna ket nadayaw a pagkargaan. Nailasin isuna, adda pakausaranna iti Apo, ken nakasagana para iti tunggal nasayaat a trabaho. ²² Adaywam dagiti derrep ti kinaagtutubo. Gun-odem ti kinalinteg, pammati, ayat, ken kappia a kaduam dagidiay umaw-awag iti Apo a nagtaud iti nadalus a puso. ²³ Ngem lisiam dagiti minamaag ken awan mamaayna a salsaludsod. Ammom a dagitoy ti pangrugian iti panaga-apa. ²⁴ Nasken a saan a makiapa ti adipen ti Apo. Ngem ketdi, naalumanay koma isuna kadagiti amin, kabaelanna ti mangisuro, ken naanus, ²⁵ sursuruanna dagiti bumusbusor kenkuana nga addaan ti kinaemma. Ket mabalin nga ikkan ida ti Dios iti panagbabawi para iti pannakaammo ti kinapudno. ²⁶ Ket mabalin a makaamirisda ket panawanda ti palab-og ti diablo, kalpasan iti panangtiliwna kadakuada para iti pagayatanna.