¹ Ni Pablo, nga apostol ni Kristo Jesus babaen iti pagayatan ti Dios, segun iti naikari a biag nga adda kenni Kristo Jesus, ² kenni Timoteo a patpagek nga anak: Parabur, asi, ken kappia a nagtaud iti Dios Ama kenni Kristo Jesus nga Apotayo. ³ Agyamanak iti Dios, nga isu a pagserserbiak manipud pay kadagiti kapuonak, addaanak iti nadalus a konsensia iti kankanayonko a pananglaglagip kenka kadagiti karkararagko iti rabii ken aldaw. ⁴ Kas malaglagipko dagiti luluam, kalikagumak a makitaka, tapno mapnoanak iti rag-o. ⁵ Naipalagip kaniak iti napudno a pammatim, nga immun-una nga adda kenni apongmo a Lois, ken ni inangmo nga Yunis, nakumbinsiak nga agtataeng met kenka daytoy. ⁶ Daytoy ti makagapu nga ipalagipko kenka a papigsaem ti sagut ti Dios kenka babaen iti panangipataymo kadagiti imak. ⁷ Ta saannatayo nga inikkan ti Dios iti espiritu ti buteng, no di ket pannakabalin ken ayat ken disiplina. ⁸ Isu a saanmo nga ibain ti pammaneknek maipanggep iti Apotayo, wenno siak, ni Pablo, a baludna. Ngem ketdi, makibingayka iti panagsagaba para iti ebanghelio babaen iti pannakabalin ti Dios, ⁹ nga nangisalakan kadatayo ken nangayab kadatayo babaen iti nasantoan a pannakaayab. Inaramidna daytoy, saan a segun kadagiti aramidtayo, ngem segun iti bukodna a panggep ken parabur, nga intedna kadatayo babaen kenni Kristo Jesus sakbay a nangrugi ti tiempo. ¹⁰ Ngem ita ti panangisalakan ti Dios ket naipakaammo babaen ti panagparang ti Mangisalakantayo a ni Kristo Jesus, nga nangipatingga iti patay ken nangiyeg iti biag ken imortalidad nga aglawag babaen iti ebanghelio. ¹¹ Gapu iti daytoy, nadutokanak a mangaskasaba, apostol, ken manursuro. ¹² Maigapu iti daytoy ket sagsagabaek met dagitoy a banbanag. Ngem saanak a mabain, ta am-ammok isuna a pinatik. Nakumbinsiak a kabaelanna a salakniban ti intalekko kenkuana inggana iti dayta nga aldaw. ¹³ Aywanam ti pagwadan dagiti napudno a mensahe a nangngegam kaniak, nga addaan ti pammati ken ayat nga adda kenni Kristo Jesus. ¹⁴ Ti nasayaat a banag nga intalek ti Dios kenka, salaknibam babaen iti Espiritu Santo, nga agnanaed kadatayo. ¹⁵ Ammom daytoy, nga amin nga agnanaed idiay Asia ket timmalikod kaniak. Iti daytoy a grupo ket da Figelo ken Hermogenes. ¹⁶ Sapay koma ta kaasian ti Apo ti pamilia ni Onesiforo, ta masansan nga papigsaennak ken saanna nga imbain ti pannakaikawarko. ¹⁷ Ngem ketdi, idi adda isuna idiay Roma, biniruknak a sireregta, ket nasarakannak. ¹⁸ Sapay koma ta ipalubos ti Apo kenkuana a masarakanna ti asi manipud kenkuana iti dayta nga aldaw. Ket ammom la unay amin a wagas a panagserbina kaniak idiay Efeso.