¹ Vano Jaco hokhola nkwahaawe ni hophiya ethaya yaa apoovo onkela ntjuwa. ² Awehakan'no, hoona ehime m'mattani ni epwittipwithi tjinarupaathale vaavale, kontha ehime yeeyo phavurihiya epwittipwithi. Vano, nahaavo nluku nuulupale watjuluwaya ehimeele. ³ Tjathukumanaka epwittipwithi n'yo, amakamputji yanakumiha nlukun'no ni phuvahaka yoovurya, vano phupurulelaka nluku n'no wa nipuroni waya. ⁴ Jaco hiira: "Assun'naka, n'nokhumatja vai?" Ayenatja ahaakhulatja: "Ninkhuma oo Hara". ⁵ Yena howiirela: "N'nantjuela Labao, mwaana aa Naor?" Ayena ahakhulatja: "Ninantjuwela". ⁶ Yena haakoha: "Yena haavo nkumi?" Ayena ahiira: "Yena haavo nkumi, owehe valee, Raquel, mwaamwanawe, naawa nipwittipwithi tjawe". ⁷ Jaco hiira: "N'namoona, niri eriyari nihuku ni khunakhala okathi woothukumaniha epwittipwithi. N'haana nvaha yoovurya epwittipwithi, ni nkissaka okolihera". ⁸ Ayena ahiiratja: "Khaninlamuliya ovuryiha epwittipwithi mpaka tjikumaneke tjoteene. Vano alopwana ayo phinkelaaya okumiha nluku n'no phinkeleehu ovuryiha epwittipwithi". ⁹ Jaco ulumaka n'no naayena, Raquel howa nii pwittipwithi tjaa thumwaane, kontha phoomolela. ¹⁰ Wamoonalyaawe Raquel, mwaana aa Labao, nrokoraya anumwaane, ni epwittipwithi tja Labao, Jaco haattamenla vaavale, hopurula nluku n'no ni hovuryiha epwittipwithi tja Labao, nrokoraya anumwane. ¹¹ Jaco hompetjari Raquel ni hunla tjinene. ¹² Jaco hon'himeerya Raquel wiira m'mutjiaawe athumwaane, mwaana aa Rebeca. Vano yena horwa okowaahimeerya athumwaane. ¹³ Okahi Labao win'walyaawe ehapari tja Jaco, mwaana anrokorawe, horwa wo wiira antjuwele, amwaabrasar, ampetjar ni ankusse owan'nyawe. Jaco honttonkela Labao tjithu tjooteene. ¹⁴ Labao hiira: "Wee khueeli onikhuvanaka ni eruthuaaka". Vano Jaco hokhala ni yena mweeri m'motja. ¹⁵ Vano Labao homwiirela Jaco: "Kontha om'mutjiaaka, onaakivarela nteko mahala? Okihimeerye, kinkela wuuliva kavi?". ¹⁶ Labao ahaana assaana eeli. Omuulupale ihaniya Lia, onkani ihaniya Raquel. ¹⁷ Mentho aa Lia yaaari owun'nuwatja, massi Raquel aari oreera makhalelo awe. ¹⁸ Jaco anfenta Raquel. Vano hiira: "Kinaahala wuuvarela nteko eyaakha saapa kinompheela Raquel, mwaamwanaa onkani uyo" ¹⁹ Labao hiira: "Onareera wuuvaha weeyova kihinvahale nlopuana nkiina. Okhale ni miivano". ²⁰ Vano Jaco hovara eyaakha saapa ampheelaka Raquel; yena tjanon'yevela eyaakha n'yo wo nifento naarinaawe ni yena. ²¹ Jaco homwiirela Labao: "Okivahe mwaaraka ayo, kontha mahuku ayo aphiyera; wo wiira kinthele". ²² Vano Labao haathukumaniha athu onttethe oteene hopanka essukuhuulu. ²³ Winlaliaaya, Labao honkussa Lia, mwaamwanawe, horwa ohonvaha Jaco, honrupana yena. ²⁴ Labao honkussa nanteko awe Zilpa onvaha mwaamwanawe wo wiira akhale nanteko awe. ²⁵ Wassalyaaya, Jaco hoona wiira aari Lia! Jaco homwiirela Labao: "Essiyani ekipankalya? Akivanre wiira kinthela Raquel? Okithepyenleni?" ²⁶ Labao hiira: "Khanilamalenle onvaha mwana onkaani hinapatjera otheliya omuulupale. ²⁷ Omlihereke mahuku osaapa ni thiyanoola, ninawuuvaha nkinooyo, ovareketho eyaakha saapa". ²⁸ Jaco hopanka yeeyo homaliha essemana ni Lia. Vano Labao honvaha Raquel, mwaamwanawe, wiira antheleke. ²⁹ Labao honvaha Bila mwaamwanawe Raquel wiira akhale nanteko awe. ³⁰ Vano Jaco horupa ni Raquel totho, kontha yena anfenta tjinene Raquel ovirikana ni Lia. Vano Jaco hovaratho eyaakha saapa wa Labao. ³¹ Pwiya hoona wiira Lia khaafentiya, hon'hula nthukua nawe, massi Raquel khaayara. ³² Lia hon'yara mwaana, honvaha Ruben. Kontha hiira: "Kontha Pwiya hoona mahuviho aka; we khueeli awan'nyaka anaahala okifenta". ³³ Vano yena horupala tho hon'yara mwaana. Yena hiira: "Kontha Pwiya hin'wa wiira akinfentiya, vano Yena hokivaha tho mwaanoola", honvaha ntjina naa Simeao. ³⁴ Vano yena horupala tho hon'yara tho mwaana. Yena hiira: "Vano, nkuahoola, awan'nyaka anaahala okivarecessa, kontha kihaavaha assaana araru". Honvaha ntjina naa Levi. ³⁵ Yena horypala tho ni hon'yara tho mwaana. Yena hiira: "Nkuahoola kinawaattittimiha aa Pwiya". Honvaha ntjina naa Juda; vano yena aheemelela oyara.