¹ Isaque homuiihana Jaco, honreeriha, homwiirela: "Ohimpheele nthiya ncanineia. ² Okhume vaa orwe oo Pada-Ara, ethoko ya Betuel, athumwanaya anumwanaa, wathele won'wo, mwaana aa Labao, nrokoraya anumwana. ³ Muluku Owerya Tjoteene oreerihe, oovahe oruwerya, ni awintjererye wo wiira okhale nikhoto nintji naa athu. ⁴ Wo wiira uuvahe mareeriho aa Abraao, weeyova ni nikhottonaa, wo wiira ohalane ethaya mapuro yaaviraa, Muluku ankhuluvelihalyaaya Abraao". ⁵ Isaque aholeehana ni Jaco, orwaale oo Pada-Ara, ethoko ya Labao, aari mwaana aa Betuel, n'arameu, nrokorawe Rebeca, anumwaane Jaco ni Esau. ⁶ Vano Esau hoona wiira Isaque honreeriha Jaco ni honruma oo Pada-Ara wo wiira anthele nthiyana oo won'wo. Ni yena hoona wiira, anreerihakan'no, Isaque homwiirela iiraka: "Ohinthele nthiyana oo canineia". ⁷ Esau hoona wiira Jaco hin'wenla athumwaane ni anumwaane, ni arwaaka mpaka oo Pada-Ara. ⁸ Esau hoona wiira athiyana oo Canaa khayaatjivela athumwaane, Isaque. ⁹ Vano, yena horwa mpaka waa Ismael, okhala wiira athiyana yaarinaawe, honthela Maalate, mwaana aa Ismael, mwaana aa Abraao, ni nrokorawe Nabaiote. ¹⁰ Jaco hokhuma oo Berseba horwa oo Hara. ¹¹ Naphiyaleene nipuro wo wiira amumule okhala wiira wahoripela, kontha ntjuwa neera nikelaka, ahokussa nluku, hopanka mphiteeryo ni horupaathi vaavale wiira arupe. ¹² Yena holoha ni hoona escada eninssaathiye vathi erekameloaaya yanaaphiya wiirimu; ni malaikha aa Muluku yanaawela ni yanakhuruwela yeeyo. ¹³ Otjuluwaya ahaavo Pwiya, iira: Mi ki Pwiya, Muluku athumwana Abraao, ni Muluku aa Isaque. Ethaya erupathalyaa kinawuuvaha ni nikhotonaa. ¹⁴ Nikhotonaa nin'hala okhala ntoko nthupi, on'hala okhala mphantti onkela tjuwa, mphantti onkhuma ntjuwa, ohitto waya ni otjuluwaya; athu onlaponi anaahala oreerihiya nlatto wawaa ni wa nikhotonaa. ¹⁵ Kiri ni weeyova ni kinaahala wuussunka wo mapuro oteene on'hala orwa. Mi kinawuhokolossera ethayeela; akinuuhiya, mpaka okhumenla yoteene yeele ekhuluvelihalyaaka". ¹⁶ Jaco hovua nkhoveni wawe ni hiira: "Khweeli Pwiya ri nipuro nen'na ni mi akaatjuwela". Yena hoova ni hiira: ¹⁷ "Nipuro thi nowoopiha! N'na khaninkhala nipuro nikinaku, wo hikhala enupa ya Muluku; oola nkhora wo wiirimu". ¹⁸ Vano Jaco hovuwa owitjissuru, hokussa nluku naphiteralyaawe, hothata ni hottikithela makhura watjulu waya. ¹⁹ Hiihana nipuro nen'ne oo Betel, maassi ntjina no citati naari Luz ²⁰ Ni Jaco hokhuluveliha, iiraka: "Muluku akhala ni miivano ni akissunkaka mweetteloaaka oola, akivahaka ephau yokhuura, ekuwo tjoowara, ²¹ wo wiira kihokoleele nkumi owaani wan'na thumwanaka, vano Pwiya n'hala okhala Muluku aka. ²² Ni nluku nen'na kithatavenlyaaka en'hala okhala Enupa ya Muluku, ni wa yooteene enkelaawe okivaha, wekhweeli kinaahala Wuuvahani Nthakelo".