¹ Okathi Raquel wonalyaawe wiira khan'yara mwaana Jaco, ahantja omoonela nttima mulualyaawe homwiirela Jaco: "Kuuyarane mwaana, wala kinawitjinva". ² Jaco ahonviruwela Raquel. Hiira: "Onoona wiira kiri nipuro na Muluku, wiira kukhikitjere oyara?" ³ Yena hiira: "Paasi, kihaana epotha aka Bila. Onrupane, wo wiira an'yare mwaana ni kan'yare ottuli, nlatto wa yena". ⁴ Honvaha Bila ephotha awe, ni Jaco honrupana. ⁵ Bila horupala hon'yara mwaana aa Jaco. ⁶ Vano Raquel hiira: "Muluku hokipankela essariya, hin'wa ntju nakahokivaha mwaana". Honvaha ntjina naa Da ⁷ Bila, epotha ya Raquel, horupalatho hon'yara mwaana aa Jaco onayeeli. ⁸ Raquel hiira: "Kahaana owana ventji tjinene ni mulupalyaaka ni kihonthema". Honvaha ntjina naa Naftali. ⁹ Okathi woonalyaawe Lia wiira khaayara tho, honkussa Zilpa, nanteko awe, honvaha Jaco toko mwaarawe. ¹⁰ Zilpa, nanteko aa Lia, hon'yarana mwaana Jaco. ¹¹ Vano Lia hiira: "Otjaaliya!" Honvaha ntjina naa Gade. ¹² Zila, nanteko aa Lia, hon'yaratho mwaana onayeeli aa Jaco. ¹³ Lia hiira: "Kiri otteeliya" Assaana ankela okiirela otteliya." Honvaha ntjina naa Aser. ¹⁴ Mahuku ohephiya etiriku, Ruben horwa omattani hophuanya mihokhorokho tjo mafento. Yena hawiihera anumwaane Lia. Vano Raquel homwiirela Lia: "Okimeele mihokorokho n'yo tjiwaanale mwaamwana n'yo". ¹⁵ Lia hiira: "Woonawa wiira ohaakussa awan'nyaka? Vano phimpheelaa okussa mihokorokho tja mwaamwanaka?" Hiira Raquel: "Jaco naahala orupa ohiyu ola wakakhanihaka ni mihokorokho tja mwaamwana". ¹⁶ Jaco ahokolyaale otjotjilo omattani. Lia ahorwa omonan'na ni hiira: "On'hala orupa ni mi ohiyu ula, kontha kihowaatjiya kiwakakhanihaka ni mihokorokho tjo mafento tja mwaamwanaka". Vano Jaco horupa ohiyu yoole ni Lia. ¹⁷ Muluku homwin'wenla Lia horupala hon'yarana tho mwaana oneethanu Jaco. ¹⁸ Lia hiira: "Muluku hokithuvela, kontha kihaavaha nanteko aka awan'nyaka". Honvaha ntjina naa Issacar. ¹⁹ Lia horupala tho hon'yara mwaana aa Jaco. ²⁰ Ni hiira: "Muluku hokivaha nthuvelo woreera. Vano vaa awan'nyaka anaahala okittittimiha, kontha kihaayarana assaana sita". Honvaha ntjina naa Zebulom. ²¹ Hon'yara tho mwaana mwanthiyana ni honvaha ntjina naa Dina. ²² Muluku homuupuwela Raquel. Yena ahokhala oyaara. ²³ Yena hon'yara mwaana ni hiira: "Muluku hokumiha ehaaya tjaarinaaka". ²⁴ Honvaha ntjna naa Jose, hiiraka: "Pwiya nkintjenrihe tho mwaana". ²⁵ Okathi wa n'yaralyaawe Raquel Jose, Jaco homwiirela Labao: "Nkoomole vaa, wo wiira kihokoleele owan'nyaka. ²⁶ Nkivahe assaaraka ayo ni assanaaka ayo, kihuuvarela nteko nkihiye kirwe, kontha n'naatjuwela nteko kuuvarenlyaakani". ²⁷ Labao hiira: "Okhala wiira kihophuanya oreeriya wa menthoni waa, okanriihe, kontha kihotjuwela nlattu wo hakowiira Pwiya hokireeriha nlatto waawa". ²⁸ Vano yena hiira: "Okilanle ehissapu kinawuuliva". ²⁹ Jaco hiira: "We onaatjuwela wiira wo manan'na yuvarenlyaka kilihaka enama tjaa. ³⁰ Kontha waarina vakaani kihinaaya owa, massi tjihintjiva tjinene. Pwiya hooreeriha mapuro avaralyaaka. Vano vaa, kin'hala tho ovara yaakhani owan'nyaka?" ³¹ Vano Labao hiira: Kuuvahekeni? Jaco hiira: "Kan'nokivaha ethu. Kinaahala olihera enama tjaa wakiankela yeeyo: ³² Okihiye keettakatje kiwehawehaka enema tjaa elelo, kaawayanihaka epuri tjomanema nempa ni tjotanyifuiya; ni epwittipwithi tjooripa, ni epuri tjeethiyana tjootanyifuiya. Phinkelen'nyu okiliva yeeyo. ³³ Makhalelo aka anaahala woonia, wakelaka owehaweha maliveliyo akaayo. Yoteene ehinkela wonania manempa wa epuri, ni epwittipwithi tjoriipa, kaphuanyaniya, tjinkela wiireliya wiira kinowin'nya". ³⁴ Labao hiira: "Kihin'wa. Ekhale wo nayeeli molumoaa". ³⁵ Nihuku nen'no Labao haakawaniha apeperu omanempa, ni epuri tjeethiyana tjomanempa, tjoteene tjaaro tjootteela ni tjoriipa mwa epwittipwithi honvaha m'matatani wa assaana awe. ³⁶ Labao hokhala mahuku mararu ettaka yena ni Jaco. Ni Jaco hohokoleela olihera enama tjahanle tja Labao. ³⁷ Jaco hokussa ekopo tjikithi tjostoraque, tjamentoa ni tjo platano. Akhavaka tjaka, mpaka okhaliha tjooteela, akhalihaka tjotteela toko tjaryaaya. ³⁸ Vano yena phessaawe ohoolo wo enama ekopo tjapapaha lyaawe, mapuro ovuriya yavuryaaya. Ni ayena phathukumanihaaya tja vuryaka. ³⁹ Enama n'yo tjathelanatjaka wariyari wo miri n'ye ni enama n'yo tjanaayara enama tjottela tteela, tjomanempa. ⁴⁰ Jaco phaawayanihaawe epwittipwithi ni heessa mphantti nkina enama tjottela tteela ni tjoripa wa enama tja Labao. Vano yena hawayaniha enama tjawe khatakaniherale ni enama tja Labao. ⁴¹ Okathi woteene enama tjowun'nuwatja tja thelanatjaya, Jaco pheessaawe ekopo mapuro yavuryaaya ohoolo wo nama, wo wiira tjithelanatje oholo wo ekopo n'ye. ⁴² Tjawaaka enama tjoyevatja n'yo, kheessa ekopo n'ye oholo waya. tjoyevatja phaari tja Labao ni tjowun'nuwa n'yo phaari tja Jaco. ⁴³ Nlopwana ole ahokhala othatjiri. Yena ahaana enama tjintji, ananteko athiyana ni alopuana, ekamelo ni ejumento.