¹ Abrao waarinaawe eyaakha hnsiini waarupayini, Apwiya yaankhumenla Abrao ni yaahomwiirela: KaNluku oowerya tjooteene. Okhale nimi ni okaamini. ² Vano, kinaahala owaataaniha ni kinaahala owintjiviha. ³ Abrao aahokokhora vathi ni Nluku aahomwiirela: ⁴ N'no phuwaataana onoovahaaka: On'hala okhala athumwaane atthu entji. ⁵ Khuniihaniyatho Abrao, massi ntjinanaa nin'hala okhala Abraao kontha kihoovahatjera okhala athumwaane atthu entji. ⁶ Kin'hala wookhaliha ntthu muulupale, kin'hala wookhaliha elapo tjintji. ⁷ Kinaahala okhala niwe naasimutja, ni waataana woohimala, wiira kikhale Nlukwaa ni Nluku aamutjaa ooteene. ⁸ Kinaahala woovaha elapo we naasimutjaa, elapo yooteene yooCanaa okhala woohimala ni kin'hala okhala Nlukweenhu. ⁹ Nanlelo Nluku aahomwiirela Abraao: Wiisaathiki waataanawaka, we naasimutja ni makhoto ooteene. ¹⁰ N'no phuwaataanawaka, vano ohaana okhaliha ratta naasimutjaa ooteene: Khula nlopwana haana uulaka. ¹¹ Yuulakavale phun'hala okhala nthoonhero wowaataanawaka. ¹² Khula nlopwana wanhu, omahuku naane eeyareelo, haana uulaka, womaloko ooteene. Ni wayoole ooyariya vapuwaniwinhu, yoole thumiye ni wakhula nan'mwa oohikhala assimutjeenhu. ¹³ Yoole yariye vapuwaniwinhu ni athumiyaka ninsurukweenhu haana uulaka. Vano, waataanawaka on'hala okhala mwiirutthuniwinhu phanka waataana woohimala. ¹⁴ Wayoole hin'hala wuula naahala wiiviya, kontha yena hohonona waataanawaka. ¹⁵ Nluku aahomwiirela Abraao: Naamwaarawe Sarai n'hiwiihanetho Sarai. Ntjinanawe Sara. Kinaahala wooreeriha ni onaahala on'yara mwaana. ¹⁶ Kinaahala onreeriha ni n'hala okhala anumwaane aatthu entji. Mamwene aatthu an'hala okhumenla mwaha woyena. ¹⁷ Vano, Abraao aahokokhorela vathi, aahothya ni aahiira wanrimaniwawe: Ntthu oyaakha emiya naayara? Sara n'hala oyara tjani nuuluvanle? ¹⁸ Abraao aahomwiirela Nluku: Ismael akhale ninhu. ¹⁹ Nluku aahiira: Amwaaraa, Sara, anaahala wooyarela mwaana, ni on'hala onvaha ntjina naIsaque. Waataanawaka on'hala okhala niyena, waataana woohimala naasimutjaawe. ²⁰ Wa Ismael kinaawiiwaka. Kinaahala onreeriha, ni kinaahala owintjiviha. Yena n;hala okhala thumwaane omahooleli khuumi nayeeli omahimo, ni kin'hala onkhaliha omakhoto mentji. ²¹ Waataanawaka on'hala okhala ni Isaque, yooyo Sara n'halaawe woovaha owakathi yoola mwaakha onwooyo. ²² Wamalalyaawe omuulumana, Nluku aahokhuma waaryaawe Abraao. ²³ Vano, Abraao aahonkussa mwaamwanawe Ismael ni ooteene yaale yaayariye vapuwaniwawe Abraao aahowuulihatja nihuku nimotja, phanka Nluku tjaahimyalyaawe. ²⁴ Abraao aarina eyaakha hanssiini waarupayini nakhentta, wuulihiyaawe. ²⁵ Ni Ismael, mwaamwanawe, aarina eyaakha khuumi natthaaru wuulihiyaawe. ²⁶ Nihuku nen'no, Abraao ni mwaamwanawe Ismal phuulihatjiyaaya. ²⁷ Atthu ooteene ovapuwaniwawe yuulale niyena, waatakaniha naanan'mwa yaathumiye ninsurukhu.