¹ Sarai, amwaara Abrao, khayan'yarale mwaana anakhala n'motja, massi ayena yaahaana epotthaaya, yiihaniya Agar. ² Vano, Sarai aahomwiirela Abrao: Apwiya khankitthuniha oyara. Orupe niipotthaaka. Wan'nokhala kikhalanaka asaana mwaha woyena. Abrao aahowiiwenla amwaarawe. ³ Vano, Sarai, amwaarawe Abrao, aahonvaha epotthaawe, wiira akhale amwaarawe. Eyo yiiranyaale tjinavirale eyaakha khuumi Abrao akhala elapo yooCanaa. ⁴ Yena aahorupa ni Agar, ni aahorupala; ni watjuwenlyaawe wiira aahorupala, aahontanhifu Sarai. ⁵ Vano, Sarai aahomwiirela Abrao: Otanhifwiyawaka mwaha wawa. Kihoovaha epotthaaka nmatataniwa ni, woonalyaawe wiira horupala, nkiweha niitanhifu. Mwaahiye Apwiya anilamule. ⁶ Massi Abrao aahomwiirela Sarai: Epottheenhwiiyo enkhala mwaha wanhu, omwiirihe enpheelaa. Sarai aahonkhaliha nimarikoriko ni Agar aahotthawa. ⁷ Nlaikha naaPwiya naahonkhuruwela moothakoni, nttala wooSur. ⁸ Yena aahiira: Agar epottha yaSarai, onkhuma vai ni onrwaa vai? Ni yena aahaakhula: Kinontthawa aakikhalana, Sarai. ⁹ Nlaikha naaPwiya naahomwiirela: Ohokoleele wa Sarai ni wiiyevihe. ¹⁰ Nlaikha naaPwiya nahomwiirelatho: Kinaahala wintjiviha nlokonaa, ni an'hala okhala atthu entji, ahin'hala waalikeliya. ¹¹ Nlaikha naaPwiya naahomwiirela tootho: Ori niirukulu ni onaahala on'yara mwaana, n'halaa onvaha ntjina naIsmael, kontha aPwiya ahiiwa makhalelwaa. ¹² Yena n,hala okhala naatthu phanka, enama yonatakhwani. Yena n'hala okhala nwanani aatthu ooteene, ni n'hala okhala naasihimaawe. ¹³ Vano, Agar aahowiihana Pwiya yale yuuluma ni yena: We oNluku nkiweha, maana yena aahiira: Kaahaana kimoonaka yoole nkiweha? ¹⁴ Phimaana, aahiihana emuro yo Beer-Laai-Roi, eri eriyariru yoCades ni Berede. ¹⁵ Agar aahon'yara mwaana aAbrao ntjinanawe Ismael. ¹⁶ Abrao aarina eyaakha thamaniini nasita Agar wan'yaralyaawe Ismael.