¹ Waviralyaaya eyo, Apwiya yaamwiirela Abrao, nttorani, yiiraka: Ohoove, Abrao! Mi kinttonttwaa ni etthuvwaa en'hala okhala yuulupale. ² Abrao aahaakhula: Awiya, n'nohala okivahani, kontha nanlelo akinamwaana, ni nkhalelwaaka on'hala okhala Eliezer ooDamasco? ³ Ni aahintjenratjo Abrao: Khankivahale nmutji ni okhalawaka on'hala ophwanhawaka. ⁴ Vano, naahowa nuulumo naaPwiya, yiiraka: Khin'hala okhala ophwanhawaa, massi yoole n'halaa onkhalana phin'hala okhala ophwanhawaa. ⁵ Ni aPwiya yaahonkumihera ota ni yaahomwiirela: Owehe erimu ni waalikele etthontto, wapheelavale. Ni yaahomwiirela: Phan'hala okhala amutjaa. ⁶ Abrao aahowaamini aPwiya ni aahovahiya onassariya. ⁷ Ni Apwiya yaahiira: Thimi Pwiya, ookumihale oUr womacaldeu, wiira koovahe elapweela phanka yowoohiyera. ⁸ Abrao aahaakoha: Kin'hala otjuwela tjani wiira kinaaphwanha? ⁹ Aahaakhuliya: Okiwiihere epwittipwitthi emotja, epuri emotja niimope emotja, khula enama tjoyaakha tthaaru tjeeyareelo, niikhuntta emotja. ¹⁰ Yena aahowiiha enaman'nho, aahothikila eriyari ni aaheesa khula ephantte niikhwaaya, massi enuni khaahitale. ¹¹ Enuni tjaananweela ni Abrao aanawoomola. ¹² Wakelalyaaya ntjuwa, Abrao tjaahonweela ekhove tjuulupale, ni waahoripela ventji. ¹³ Vano, Apwiya yaahomwiirela Abrao: Assimutjaa an'hala okhala elapo ehiri yawaya. Anaahala ohuvihatjiya eyaakha emiya tjesse. ¹⁴ Massi kinaahala waalamula ni anaahala okhumatja, ni anaahala okhuma nimihakhu tjintji. ¹⁵ Vano we onaahala orwaa ninrettele wan'nathumwana ni onaahala ossikhiya owuuluvaleene. ¹⁶ Nikhoto noneetjesse, anaahala owaatjatho, kontha tjoovaratjaya khatjinaaya oamalela. ¹⁷ Ntjuwa wakelalyaaya ni onaripenleene, mooro nimwiisyaaya waahovira eriyari wonama. ¹⁸ Nen'ne nihukun'ne, Apwiya yaahopanka waataana ni Abrao, yiiraka: Asimutjaa kihaavaha elapweela, okhuma muro wowiigiipitu npaka muro muulupale oEufrates. ¹⁹ Nqueneneu, nquenezeu, ncamodeu, ²⁰ n'heteu, nperizeu, maarefain, ²¹ amorreu, ncananeu, ngigaseu ni njebuseu.