¹ Mahuku aAnrafel, mwene oSinar, oArioque, mwene oElasar, oQuedorlaomer, mwene oElao ni oTidal, mwene oGoim, ² yaalatja yaahowana ni Bera, mwene oSodoma, Birsa, mwene oGomorra, Sinabe, mwene oAdma, Semeber, mwene oZeboim ni mwene oBela. ³ Mamwene athanu oomaliheraayo yaathukumanale muro wooSidim. ⁴ Eyaakha khuumi napiili, yanvarela nteko Quedorlaomer, massi, mwaakha wonakhuumi namiraru, yaahohiyatja onvarela nteko. ⁵ Mwaakha nkhwaawe, Quedorlaomer nimamwene yaarinaawe yaahowaattakan'na arefim oAsterote-Carnaim, azuzin oHao, aemin oSave-Quiriataim ⁶ ni mahoreu omwaakowaya Seir npaka El-Para, waattamenla woothakoni. ⁷ Yaahohokolyaatja arwaatjaka En-Mispate, ni yaahokussatja elapo yaamalequita ni yomamorreu, yaakhala oHazazom- Tamar. ⁸ Woottharenlana, mwene ooSodoma, mwene ooGomorra, mwene ooAdma, mwene ooZeboim ni mwene ooBela yaahokhumatja arwaatjaka okhottoni emuro yooSidim ⁹ arwaaka omwaattakan'na Quedorlaomer, mwene ooElao, Tidal, mwene oGoim, Anrafel, mwene oSinar, Arioque, mwene oElasar: mamwene matjesse yaattakan'na nimamwene mathanu. ¹⁰ Muro Sidim waahotjara nimaatji, nimamwene ooSdoma ni Gomorra yaahotthawa ni yaahomorela mon'mo. Yaale yaari moono nthiyana yaatthawelale nmamyaakoni. ¹¹ Vano, awanani yaahokussa mihakhutjaya tjooteene tjooSodoma ni Gomorra ni yaahorwaatja. ¹² Ayenatja yaahonkussatja Lo, vamotja naatthwaawe. Lo aari mwaana amwaamun'nawe Abrao ni aakhala oSodoma. ¹³ Nmotja aakhwitirale otthawa aahorwaa ontttonkela Abrao, yena aakhala oManre, mwaamun'nawe Escol ni Ener, ni ooteene yaari nphantte waAbrao. ¹⁴ Abrao wiiwalyaawe wiira awananyaawe yaahonvara nmutjaawe, aahaaruma anakhottwaawe emiya tthaaru wokhuumi nanaane, yaayariye elapwaawe, ni yaahowoomolaniha npaka elapo yiihaniya Da. ¹⁵ Yena aahaakawaniha atthwaawe ni aahaawanana awananyaawe ohiyu, awoomolanihaka npaka elapo yiihaniya Hoba, nphantte wooDamasco. ¹⁶ Tjitjon'mo yaahohokolossatja tjitthutjaya tjooteene ninmutjaaya Lo ni mihakhutjaya, athiyana naatthu akhwaawe. ¹⁷ Abrao wahokolyaalyaawe okhottoni wa Quedorlaomer nimahumu yaarinaawe, mwene ooSodoma aahokhuma wiira amoonan'ne emuro yooSave. ¹⁸ Melquisedeque, mwene ooSalem, aahowaana nkatthe ninipha. Yena aari nankuttho aNluku owiirimu. ¹⁹ Abrao aahoreerihiya ni Nluku iiraka: Ooreeriya akhale Abrao niNluku owiirimu, unpale erimu niitthaya. ²⁰ Ooreeriya akhale Mluku owiirimu, aavahale awananyaawe nmatataniwaya. Vano, Abrao aahovaha nphantte wonakhuumi watjooteene. ²¹ Mwene ooSodoma aahomwiirela Abrao: Okivaheke atthu ni we okusseke mihakhu. ²² Abrao aahomwiirela mwene ooSodoma: Kinaavenhihera matata Apwiya, Nluku owiirimu, unpale erimu niitthaya, ²³ akinphwanela okussa etthu yawaa, wala ohikaakulele: Kihonthatjiriha Abrao. ²⁴ Akin'hala okussa hata etthu, ohiya elyale amwaavanuaala. Ni, naatthu yaawaanalyaaka, Aner, Escol ni Manre, wiira akusse mapurwaaya.