¹ Vano, Abaro aahokhuma wiigiipitu arwaka waNequebe. Yena naamwaarawe nitjitthu tjooteene tjaarinaawe. Lo aari niyeneni. ² Abrao aari namihakhu: Aahaana mihuwo, eparatha niiwooru. ³ Yena aahaakulela ekwahaawe waNequebe arwaaka oBetel, npaka nipuro naari heemaawe, okhuma oBetel ni Ai. ⁴ N'no phinipuro naatekalyaawe altaare khalayi, ni Abrao ni aahovekela ntjina naaPwiya. ⁵ Owakathi yooyo, Lo, eettaka ni Abrao, aahaana enama naaheema. ⁶ Etthaya yaari yankaani woopheela oliha, maana mihakhutjawe tjaari tjintji, ni kawaaphwanela tjooteene okhala vamotja. ⁷ Ni yaahaavo ewani naahakheli onama tja Abrao naahakheli tjonama tja Lo. Owakathi yooyo, macananeu nimaferezeu yaakhala elapo yeeyo. ⁸ Abrao aahomwiirela Lo: Nihiwanihanatje we ni mi, wala naahakheliihu, kontha niri vamotja. ⁹ Elapo yooteene khinakhala yawaa? Kinawoolepela wiira okihuluwe. Warwaaka moono woothiyana, kin'hala orwaa moono woolopwana. Wala warwaa moono nlopwana, kin'hala orwaa moono nthiyana. ¹⁰ Vano, Lo aahoweha woorukureerya muro Jordao ni aahoona wiira aari nimaatji mentji nmittalani mooteene npaka Zoar; yaari phanka ojardim yaaPwiya, phanka elapo yowiigiipitu. Yiiranyaale aPwiya ahinatankula oSodoma ni Gomora. ¹¹ Tjitjon'mo, Lo aahiithanlela muro Jordao ni aahokhuma arwaaka, ni yaahokawanyaatja khula ntthu arwaaka nphanttyaawe. ¹² Abrao aahokhala elapo yooCanaa, Lo, aahokhala nmapooma, aatthonkomanihaka aheemaawe npaka oSodoma. ¹³ Atthu ooSodoma yaari ootakhala nrima ni anatanpi oolupale waaPwiya. ¹⁴ Apwiya yaahomwiirela Abrao, owakathi waapheelaaya ohiyanatja: Otthukule meethwaa ni owehe okhuma nipuro niryaa owehaka onkhuma ntjuwa, okela ntjuwa, moono nthiyana ni moono nlopwana. ¹⁵ Elapo yooteene enoonaa, kinaahala wooovaha naasimutjaa ooteene. ¹⁶ Ni kinaahala wintjiviha nlokonaa phanka ntthupi, weenan'na yowiira akhumenla ntthu oopheela waalikela ntthupin'no, ninlokonaa naalikeliye. ¹⁷ Ovuwe, weetteette owehaka tjiryaaya elapweeyo, kinaahala woovaha. ¹⁸ Vano, Abrao aahaatthukulatja aheemaawe ni aahokhala waattamenla oManre, nphantte wo Hebrom, waatekalyaawe altaare aaPwiya.