¹ Vano, Apwiya yaahomwiirela Abraao: Okhume elapweeyo, ni eriyari waasimutjaa, niinupa yaathumwanaa, orwee elapo en'halaaka woothoonhera. ² Kinaahala wookhaliha nloko nuulupale, kinaahala wooreeriha, kinaahala wuunuwiha ntjinanaa ni kinaahala wooreeriha. ³ Kinaahala waareeriha an'hala wooreeriha ni kinaahala waatakhaliha an'haa wootakhaliha. Mwaha wawe, assimutjaa ooteene anaahala oreerihiya. ⁴ Apwiya phaamwiirelalyaaya Abraao wiira apanke, ni Lo aahorwaa ni yena. Abrao aarina eyaakha sapiini nathanu waakhumalyaawe elapo yo Hara. ⁵ Aahonkussa Sarai, amwaarawe, ni Lo, mwaana amwaamun'nawe, mihakhutjawe tjooteene naatthu ooteene yaaphwanhalyaawe elapo yo Hara. Ayenatja yaahokhuma arwaaka elapo yooCanaa ni yaahophiyatja. ⁶ Abrao aahorwaa npaka elapo yo Siquem oMore. Owakathi yoole, acananeu yaakhala elapo yeele. ⁷ Apwiya yaahonkhumenla Abrao ni yaahomwiirela: Elapweela kinaahala waavaha assimutjaa. Vano, Abrao aahaateka altaare waaPwiya, yoole ankhumenlale. ⁸ Yena aahokhumatho arwaaka mwaako Betel, wantekalyaawe heemaawe, naryeene oBetel ohitto nuutjulu. Yena aahaateka altaare waaPwiya ni aahaavaha mwantjinanaya. ⁹ Vano, Abrao aahokhuma arwaaka nphantte wooNequebe. ¹⁰ Ni yaahaavo etala nlaponi. Vano, Abrao aahorwaa wiigiipitu wiira akhale, maana etala yaahomwareela nlaponi. ¹¹ Weeraawe attamenlaka wiigiipitu, aahowiirela amwaarawe: Kinaatjuwela wiira mwanthiyana oophwanela. ¹² Atthu owiigiipitu yoowehani, anaahala wiira: Athiyanaala amwaarawe; anaahala okiivatja ni wookussatjani. ¹³ Mwawiirelatje omwanrokoraka tjon'mo kinaakhala saana, mahaleenhu, ni kinaahala okhala nkumi. ¹⁴ Abrao waphiyalyaawe wiigiipitu, yaahooniya amwaarawe ni yaari athiya ooreera. ¹⁵ Akhulupale aFarao yaahowoona athiyanaayo, ni yaahorweehiya wa Farao. ¹⁶ Yena aahonkhaliha ratta mwaha waathiyanaale ni aahon'vaha enama, naananteko. ¹⁷ Vano, Apwiya yaahaakurussela assinttuuttu enupa yaFarao, mwaha waSarai, amwaara Abrao. ¹⁸ Farao aahomwiihana Abrao ni aahomwiirela: Opankaleni? Wahaakihimeeryelani wiira amwaaraa? ¹⁹ Wakithepyatjerani wiira mwanrokoraa, kaakussaka phanka amwaaraka? Vano, n'nava waakusse amwaraa, waakusse orweeke. ²⁰ Vano, Farao aahokumiha nlamulo mwaha wayena, ni yaahorwaatja, naamwaarawe ni tjooteene tjaavahiyaawe.