¹ Olumwenku waarina eluuka emotja paasi ni moolumelo yaari mamotja. ² Weeraaya yeettatjaka, yaaheemelatja elapo yooSinai ni yaahokhalatja wonwo. ³ Ni yaahiirelanatja yaayoru: Nipanke epulooku nipahe. Yaahuupatja epulooku ohiya maluku, niifiali. ⁴ Ni yaahiiratja: Niteke epoomeehu, yoorekama yeeyo, ni nivahe ntjina, wowiira nihimwaryaanatje. ⁵ Apwiya yaahokhuruwa wiira awehe epooma yaatekiya. ⁶ Apwiya yaahiira: Ooteenetjinhu mwatthu amotja n'nuuluma eluuka emotja. Eyo phantjaleenhu ovara, vano khiivo etthu en'hala wookutakutheelani npheeleenhu ovara. ⁷ Nivirikanihe eluuka wiira nihiiwanane ntthu ninkhwaawe. ⁸ Ni aPwiya yaahaamwressela elapo yooteene; ni yaaheemelela oteka epooma. ⁹ Phimaana, yaahiihaniya Babel, kontha aPwiya phaavirikanihalyaaya eluuka elapo yooteene ni yaahaamwaressela elapo yooteene. ¹⁰ Ala phamakhoto aSem. Yena aarina eyaakha emiya, owakathi wan'yaralyaawe Arfaxade, tjinavirale eyaakha piili waaviralyaaya epaluwa yomaatji. ¹¹ Sem aahokhala eyaakha emiya thanu nan'yaraleene Arfaxade; ni aahaayara asaana akhwaawe. ¹² Arfaxade aarina eyaakha talaathiini nathanu, owakathi wan'yaralyaawe Sela. ¹³ Wan'yaralyaawe Sela, Arfaxade aahokhala eyaakha emiya tjesse natthaaru; ni aahaayara asaana akhwaawe. ¹⁴ Sela aarina eyaakha talaathiini wan'yaralyaawe Eber. ¹⁵ Sela aahokhala eyaakha emiya tjesse natthaaru nan'yaraleene Eber; ni aahaayara asaana akhwaawe. ¹⁶ Eber aarina eyaakha talaathiini natjesse oakathi wan'yaralyaawe Peleque. ¹⁷ Eber aahokhala eyaakha emiya tjesse wotalaathiini nan'yaraleene Peleque; ni aahaayara asaana akhwaawe. ¹⁸ Peleque aarina eyaakha talaathiini, owakathi wan'yaralyaawe Reu. ¹⁹ Peleque aahokhala eyaakha emiya piili nakhentta nan'yaraleene Reu; ni aahaayara asaana akhwaawe. ²⁰ Reu aarina eyaakha talaathiini napiili owakathi wan'yaralyaawe Seruque. ²¹ Reu aahokhala eyaakha emiya piili nasaapa nan'yaraleene Seruque; ni aahaayara asaana akhwaawe. ²² Seruque aarina eyaakha talaathiini owakathi wan'yaralyaawe Naor. ²³ Seruque aahokhala eyaakha emiya piili nan'yaraleene Naor; ni aahaayara asaana akhwaawe. ²⁴ Naor aarina eyaakha siriini nakhentta owakathi wan'yaralyaawe Tera. ²⁵ Naor aahokhala eyaakha emiya wokhuumi nakhentta nan'yaraleene Tera. ²⁶ Tera aarina eyaakha sapiini owakathi wan'yaralyaawe Abrao, Naor ni Hara. ²⁷ Ala phamaloko aTera. Tera aahon'yara Abrao, Naor ni Hara; ni Hara aahonyara Lo. ²⁸ Hara aahokhwa waathumwaane Tera, elapo yaayareliyaawe, oUr womacaldeu. ²⁹ Abrao ni Naor yaahothelatja. Amwara aAbrao yiihaniya Sarai ni amwaara Naor yiihaniya Milca; aari mwaana aHara, yaari athumwaane Milca ni Isca. ³⁰ Sarai khaayara, khaarina asaana. ³¹ Tera aahaakussa asaanaawe Abrao ni Lo, mwaana amwaamwanawe, ni Sarai, amwara mwanawe, amwaara amwaamwanawe Abrao. Ni phaamootja yaahokhuma Ur womacadeu arwaaka elapo yooCanaa. ³² Yaahorwaa npaka Hara ni wonwo phwaakhalaaya. Tera aahokhala eyaakha emiya piili nathanu phaakhwaawe elapo yoHara.