¹ Ala phimakhoto aNoe: Sem, Cam ni Jafe; Asaanaawe yaayarale epaluwa yomaatji enavirale. ² Asaanaawe Jafe yaari: Gomer, Magogue, Madai, Java, Tubal, Messeque ni Tiras. ³ Asaana aGomer yaari: Asquenas, Rifate ni Togarma. ⁴ Asaana aJava yaari: Elisa, Tarsis, Quitim ni Dodanim. ⁵ Asimutjaawe Java yaahokawelanatja etthaya, ni, yaahokussatja wonayeeli eluukaaya, naasimutjaaya. ⁶ Asaana aCam yaari: Cuxe, Mizraim, Pute ni Canaa. ⁷ Asaana aCuxe yaari: Seba, Havila, Sabta, Raama ni Sabteca. Asaana aRaama yaari: Sabani Deda. ⁸ Cuxe aahon'yara Ninrode, yooyo aari owantjera otjuwanya elapo yovathi. ⁹ Yena aari namatotha muulupale ohoolo waaPwiya. Phimaana wiiriyaaya: Phanka Ninrode, namatotha muulupale ohoolo waaPwiya. ¹⁰ Epooma tjuulupale tjeehoolelwaawe tjaari: Babel, Ereque, Acade ni Calne, elapo yooSinar ¹¹ Elapo yeele, yena aahokhuma arwaaka waAssiriya ni aahonteka Ninive, Reobote-Ir Cala ¹² ni Resem okhuma Ninive ni Cala. Yaari epooma yuulupale. ¹³ Mizraim aahon'yara Ludim, Anamim, Leabim, Naftuim, ¹⁴ Patrusim, Casluim ni Caftorim. ¹⁵ Canaa aahon'yara Sidom, mwaamwanawe owantjera, ni Hete, ¹⁶ aahon'yara jebuseu, amorreu, girgaseu, ¹⁷ heveu, arqueu, sineu, ¹⁸ arvadeu, zemareu ni hamateu. Amutji omacananeu yaahokawanyaatja. ¹⁹ Elapo yomacananeu yaari Sidom, nphantte woorwaa oGerar, npaka Gaza; arwaaka nphantte wooSodoma, Gomora, Adma ni Zeboim, npaka Lasa. ²⁰ Ala phayaari makhoto aasimutjaawe Cam, eluukatjawe; tjonlaponiwawe. ²¹ Sem, nankhwi aasaana ooteene aHeber ni muulupalyaawe Jafe, aahaayara asaana. ²² Asaanaawe Sem yaari: Elao, Assur, Arfaxade, Lude ni Ara. ²³ Asaanaawe Ara yaari: Uz, Hul, Geter ni Mas. ²⁴ Aefaxade aahon'yara Sela; ni Sela aahon'yara Eber. ²⁵ Eber aahaayara asaana eeli. Ntjina namwaana owantjera naari Pelegue, kontha yaayo mahukwaayo yaari ookawanyaa. Ntjina namuulupalyaawe naari Jocta. ²⁶ Jocta aahon'yara Almoda, Selefe, Hazarmave, Jera, ²⁷ Hadorao, Huzal, Dicla, ²⁸ Obal, Abimael, Saba, ²⁹ Ofir, Havila ni Jobabe. Ooteene yaari asaana aJocta. ³⁰ Elapwaayatja yaari okhuma Messa npaka Sefar, otakaniha myaako tjoohitto. ³¹ Ala phaamutji aSem, niilukatjawe, niilapotjaya. ³² Ala phaamutji omaloko aNoe, wonayeeli nimakhalelwaaya, niilapotjaya. Okhuma woyaala amutjaala, yaahintjivatja ni yaahomwareela elapo yooteene, enavirale epaluwa yomaatji.