¹ Ni Nluku aahonreeriha Noe naasaanaawe ni aahowiirelatja: Mwintjivihaneke vatthayani. ² Woovawinhu on'hala okhala niinama tjooteene, wonuni tjooteene tjowiirimu, ni tjooteene tjineetta vathi niihopa tjooteene tjonpahari. tjooteene tjiri nmatataniwinhu. ³ Wkhua etthu enmumula en'hala okhala eyoolyeenhu. Phanka tjoovahalyaakani mihokorokho, kihoovanitjitthu tjooteene. ⁴ Khan'nohala olya enama ekumi, wala, niiphome. ⁵ Wokhweeli, kin'hala okhala niiphomeenhu, ephome yeekumiinhu; kin'hala okhala ni wakhula enama. Nintata nakhula ntthu mwiivale mwaamun'naa, kin'hala okhala niikumi yantthu yooyo. ⁶ Wakhula ntthu n'hala omwaressa ephome yapinaatamu enaahala omwaressiya ephomyaawe nintthu yooyo, kontha Nluku homunpa ntthu phanka Yena. ⁷ Vano nhu, n'yaraneke ni mwintjivihaneke vatthayani. ⁸ Vano, Nluku aahomuulumana Noe naasaanaawe, iiraka: ⁹ Kinaahala woowiiherani nivuku nowaataana, ninlokoninhu mwakhwakavale ¹⁰ ni wakhula ntthu n'hala okhala ninhu: enuni, niinama tjoteene tjaari nkalawani, ni wakhula etthu enkhala vathi. ¹¹ Kinaahala woowiiherani nivuku nowaataana, ehin'hala okwanhulatjiya niipaluwa yomaatji. Khin'hala okhumenlatho epaluwa yomaatji yookwanhulatja etthaya. ¹² Nluku aahiira: Ola nthoonhero owaataanihawaka onoopankelaakani naatthu ooteene an;hala owa. ¹³ Kihohela nrekonaka nmahutteni ni en'hala okhala nthoonhero wowaataanawaka niitthaya. ¹⁴ Kakurussaka mahutte ninreko, ¹⁵ kinaahala wuupuwela waataana wonama tjooteene. Ni khin'halatho okhumenla epaluwa yookwanhulatja enama tjooteene. ¹⁶ Nreko ninn'hala okhala nmahutteni ni kin'hala okhala kuupuwelaka waataana ni Nluku ni tjitthu tjooteene tjinkhala vathi. ¹⁷ Nluku aahomwiirela Noe: Ola phunthoonhero wowaataana ovahalyaaka, tjitthu tjooteene tjovathi. ¹⁸ Asaana aNoe yaakhumale nkalawani yaari Sem, Cam ni Jafe. Cam yaari athumwaane Canaa. ¹⁹ Asaana ooraaru aNoe ni yaayo etthaya yaahintjiva atthu. ²⁰ Noe aahantja olima ni aahaala tjowaala. ²¹ Aahowurya nipha ni aahohapaliya. Yena aahohala matamata n'heemaniwawe. ²² Cam, athumwaane Canaa, aahowoona matamata ni aahokhuma orwaa waattonkela assun'nawe. ²³ Vano, Sem ni Jafe yaahokussatja ekaapa wanikhataniwaya, ni arukunuwaka, yaahaakhuneela athumwanaya. Yaareryale ettuli, wiira ahiwoonatje athumwanaya. ²⁴ Noe owakathi on'malamalalyaawe nipha, aahotjuwela yaapankiyaawe nimwaamwanawe. ²⁵ Vano, aahiira: Ootakhalihiya akhale Canaa. Yena n'hala okhala nanteko aananteko aasun'nawe. ²⁶ Ni aahiiratho: Wiira Apwiya, Nluku aSem, akhale ooreerihiya, ni Canaa akhale nantekweenhu. ²⁷ Nluku amuunuwihe Jafe ni akhale n'heemani mwa Sem. Ni Canaa akhale nantekweenhu. ²⁸ Waviralyaaya epaluwa, Noe aahokhala eyaakha emiya tthaaru wohanssiini. ²⁹ Mahukwaae ooteene aNoe yaari emiya khentta wohansiini, phaakhwaawe.