¹ Apwiya yaahonkhumela Abraao oManre, wookomalyaawe omakhumenloni woheema, oyhana. ² Abraao aahoweha ntjulu ni aahowoona alopwana araru aneemelale. owakathi waawehalyaawe aahatthawenla ni aahaakokhorela. ³ Yena aahiira: Apwiya, wakhala wiira kiri nmeethoniwinhu n'hikivire. ⁴ Kinaahala orumiha owaaniya maatji vakaani; wiirapihatje enhan'nho ni wiitthunwe vathi wonri. ⁵ Kinaahala owaana ephaawu; kinaahala wintjenra ekurutjinhu kontha n'hophiya npaka wanantekweenhu ni n'naahala ontthara. Ni yaahaakhulatja: Npanke tjihimyaleenhu. ⁶ Abraao, aahokela wowaakuvyaatja n'heemani ni aahomwiirela Sara: Waakuvatje okusse ekiilu tthaaru yotiriku, opanke mikatthe. ⁷ Abraao aahotthawenla omihuwoniwawe, aahovara enama yiihaniya benzerro ni yooreera aahonvaha nantekwaawe, ni aahotthonkomanihatja. ⁸ Nphantte nkhwaawe wonama aahokussa, aahaavahatja ni aahokhala oweemela ohoolowayatja, alyaka vathi wonri. ⁹ Ayenatja yaahonkohatja Abraao: Amwaaraa Sara, arivai? Yena aahaakhula: Ari n'heemani. ¹⁰ Ni aahiira: Kinaahala owaatho mwaahiyu, ni amwaaraa Sara, anaahala okhalana mwaana. Sara iira iiwaka yuulumaawe ottuliwawe. ¹¹ Abraao ni Sara yaahuuluvalatja, ni Sara wahaaphwanelaawetho oyara. ¹² Vano, Sara aahothyaa ni aahiitjiirela: Kinaahala oreeriya kinuuluvalale, naawan'nhaka anuuluvalale? ¹³ Apwiya yaahomwiirela Abraao: Sara nthyaani ni iiraka: Kinaahala okhalana mwaana, kinuuluvalale? ¹⁴ Yaanaahala okhumenla etthu yowaarikela Apwiya? Mwaahiyu owakathi yoola, kinaahala owaatho, ni Sara naahala on'yara mwaana. ¹⁵ Vano, Sara aahoruna ni aahiira: Akithyaalemi, kontha aanawoova. Apwiya yaahiira: Mena! We ohothyaa. ¹⁶ Vano, assilopwanaale yaahovuwa ni yaahorwaa nphantte wooSodoma. Abraao aahaasafirisatja. ¹⁷ Ni Apwiya yaahiira: Akinonthoonhihera Abraao enpheelaaka ovara. ¹⁸ Kontha yena nkhulupale muulupale niilapo tjooteene tjin'hala oreerihiya mwaha woyena? ¹⁹ Kontha kinonthanla wiira aahoolele asaanaawe naasimutjaawe wiira akhale munttalani mwaaPwiya, wiira akhale nsariyani, ni wowiira aPwiya avirihe emwiirenlyaaya Abraao. ²⁰ Vano, Apwiya yaahiira: Okhuwela waSodoma ni Gomorra ohuunuwa, tjoopakatjaya tjihintjiva. ²¹ Kinaahala okhuruwa, ni kinaahala woona wiira khweeli, tjinvaraaya tjooteene tjinaaphwanela okhuwelawaya onkiphwanha. Woohikhala tjon'mo, kinaahala otjuwela. ²² Vano, asilopwanaale yaahorukunuwa arwaaka nphantte wooSodoma, massi Abraao aahohala naaPwiya. ²³ Abraao aahowaattamenla ni aahiira: N'nohala waakwanhlatja anasariya naanatanpi? ²⁴ Yakhala anasariya hansiini npooman'mo, n'naahala wiivakatja woohaahiya mwaha waanasariyaale? ²⁵ Woopanka eyo mena, omwiiva nasariya ninatanpi, wookhala phanka nasariya naalikana ninatanpi. N'hipanke! Wakhala wiira nphunki olapo yooteene eehivare tjosariya? ²⁶ Apwiya yaahiira; Kaaphwanha oSodoma anasariya hansiini, akin'hala wiiva mwaha waayenatja. ²⁷ Abraao aahaakhula: Enookhalaru ettuura nintthupi, kuulumeke naaPwiya. ²⁸ Ni anasariya hansiini ahaleelaka athanu, n'naahala okwanhula epoomeeyo mwaha woyaale athanu? Yena aahiira: Akin'hala okwanhula, kaaphwanha arupayini naathanu. ²⁹ Abraao, aahiiratho: En'hala wiiranyaa essiyani mwaaphwanha arupayini? Yena aahaakhula: Akin'hala opanka eethu. ³⁰ Abraao aahiiratho n'hirussiye mwaha wowookohanitho. Ni mwaaphwanha talaathiini? Ayena yaahaakhula: Akin'hala opanka etthu. ³¹ Abraao aahiiratho: N'hirussiye mwaha wowookohani tootho. Mankhi mwaaphwanha siriini?. Ayena yaahaakhula: Akin'hala opanka etthu. ³² Ni aahiira: Sontte, n'hirusiye mwaha wowookohanitho emaareela. Mankhi mwaaphwanha khuumi? Ayena yaahaakhula: Akin'hala opanka etthu mwaha wokhuumi. ³³ Apwiya wamalihalyaaya wuuluma ni Abraao yaahokhuma, ni yena aahorwaa owanuwawe.