¹ E nedo kasuatan si Yesus melangkoiy, Sia lumoo’ siesa tou rapa rengane’ eng kinetetouna. ² Murid-murid-Na se minueiy wia-Nisia : “ Rabi, seiy reken si simiwo dosa, sitou yi’i sandiri ka’apa se tu’ana, i ka’ayo sia neiy i patoula rapa?” ³ Wingkot ni Yesus : “ Reiy’ nisia wo reiy’ kangkasi se tu’ana, ta’an karengan em pepa’ayangen-pepa’ayangen ni Empung e lewo’ sa reiy’ i papa’atola witu nisia. ⁴ Kita ta lewo’ sa reiy’ ma’ayangla em pepa’ayangen-Na si timoke Niaku, keurean e noate’; laa meiy e wengi, wisa reiy’la siesa tou tu’u si toro ma’ayang. ⁵ Keurean Niaku wia eng kaoatan, Niaku mouw ku terang eng kaoatan.” ⁶ Nu reiy’ mouw Sia nu limila’la em baya nyi’a i ti’i, Sia rumura’ witu en tana’, wo kumayo’ e rura’-Na i ti’i ampit en tana’, laa o misu’la nyi’a witu em beren ni tou rapa eng ketare ⁷ wo lumila’ wia nisia : “ Mea mouw, oasanouw en tetoumu witu em kolam Siloam.” Siloam em penoronna : “ Si neiy i toke.” Takar mea mouw sitou i ti’i sia moas en touna laa o mareng ampit em berenna e wula’ mouw. ⁸ Ta’an se ketana’-ketana’na wo nisea, se ketarean simine’u nisia tanume si mengengiwee, limila’: “ Reiy’ ku’a nisia yi’i, si reiy’ mena’ mengengiwee?” ⁹ Wawean se meila’ : “ Ulit, sia mouw si yi’i.” Wawean kangkasi se meila’ : “ Reiy’, ta’an nisia si mange’an ampit nisia.” Tou i ti’i nuesa si limila : “ Nulit niaku mouw i tu.” ¹⁰ Pokeiy nea wia nisia : “ Kumura em berennu mina wula’?” ¹¹ Wingkotna : “ Tou si patotoren Yesus i ti’i kimayo’ en tana’, misu’la nyi’a witu em berenku wo lumila’ wia niaku : Mea mouw waki Siloam wo oasanouw en toumu. Laa o ku mea wo niaku nu moasla en touku, niaku ku toro mouw maloo’.” ¹² Laa o sea lumila’ wia nisia : “ Waki wisa re’en Sia?” Wingkotna : “ Reiy’ kete’uanku.” ¹³ Laa o sea maali sitou eng ketarena i ti’i si rapa wia se tou-tou Farisi. ¹⁴ Sapa tare e nendo kinekekayo’ ni Yesus en tana’ wo minula’la em beren ni tou i ti’i, nyi’a mouw e nendo Sabat. ¹⁵ Kaa ni’itu se tou-tou Farisi tu’u minueiy wia nisia , kumura em berenna mina wula’. Wingkotna : “ Sia si minisu’la eng kinayo’an en tana’ witu em berenku, laa o ku moas en touku, wo teakan niaku ku toro mouw maloo’.” ¹⁶ Takar pokeiy ne esa nga weteng tou-tou Farisi iti’i : “ Tou yi’i si reiy’ mineiy waki si Empung, karengan Nisia si reiy’ mapiarala e nendo Sabat.” ¹⁷ Laa o pokeiy nea kangkasi wia sitou rapa i ti’i : “ Wo nikoo, sapa re’en e lila’mu tanume Nisia, karengan Nisia si minula’ mola em berennu? “ Wingkotna : “ Nisia mouw siesa nabi.” ¹⁸ Ta’an se tou-tou Yahudi i ti’i se reiy’ ma’eman, kaa eng ketarena sia si rapa wo tea mouw lumoo’ kasi, i ka’ayo sea kimeret se tu’ana ¹⁹ wo mueiy wia nisea : “ Si yi’i re’en si oki’mu, si peila’ miouwla kaa nisia si neiy i patoumi rapa? Satuana kumura re’en sia teakan si toro mouw maloo’?” ²⁰ Wingkot ne tu’a i ti’i : “ Eng kete’uan neiy nyi’a mouw, kaa nisia yi’i si oki’ meiy wo nisia si neiy i patoumi rapa, ²¹ ta’an kumura sia teakan toro mouw maloo’, keiy reiy’ mete’u, wo seiy si minula’la em berenna, keiy reiy’ mete’u kangkasi. Wueiyenola wia nisia sandiri, sia si sela mouw, sia si toro matoto-totor i wee en touna sandiri.” ²² Se tu’ana se limila’ tuana, kaa nisea se meide’ wia se tou-tou Yahudi, karengan se tou-tou Yahudi i ti’i se minaasa’an nouw kaa susur sitou maaku Nisia tanume si Mesias, si laa i sea’la. ²³ Ni’itu mouw ee karengan takar se tu’ana limila’: “ Sia si sela mouw, wueiyenola wia nisia sandiri.” ²⁴ Laa o sea kumeret mekasape’ kasi sitou ketarena rapa i ti’i wo lumila’ wia nisia : “ Lumila’ mola eng kaulitan witu en sinaru ni Empung; kete’uan neiy kaa sitou i ti’i sitou berdosa.” ²⁵ Wingkotna : “ Sapa ku’a sitou i ti’i tou berdosa, niaku ku reiy’ mete’u; ta’an e nesa kapualitan kete’uanku, nyi’a i ti’i kaa niaku ketarena rapa, wo teakan toro mouw maloo’.” ²⁶ 26 Pokeiy nea wia nisia : “ Sapa re’en en siniwo-Na wia nikoo? Kumura Sia minula’la em berennu?” ²⁷ Wingkotna : “ Neiy mouw i lila’kula wia nikoo, ta’an kouw reiy’ minelelingala nyi’a; ka’a kouw pa’ar melelingala nyi’a kasi? Wo’o wona kouw pa’ar mamuali murid-Na kangkasi?” ²⁸ Kasuatan masero’ sea lumila’ wia nisia : “ Nikoo koo murid ni tou i ti’i ta’an nikeiy keiy murid-murid ni Musa. ²⁹ Keiy mete’u, kaa si Empung si minee mola nuwu’ wia si Musa, ta’an en tanume Nisia i ti’i nikeiy keiy reiy’ mete’u waki wisa sia meiy.” ³⁰ Wingkot ni tou i ti’i wia nisea : “ Likoko kangkasi sa kouw reiy’ mete’u waki wisa Sia meiy, kaulitena Sia si minula’ mola em berenku. ³¹ Kita ta mete’u, kaa si Empung si reiy’ minelelingala se tou-tou berdosa, ta’an i te se tou-tou saleh wo se matuanala eng kepa’aran-Na. ³² Wakipe’ ketarean i ka’ayomi teakan reiy’ ma’an mekasa lingan, kaa wawean tou si minula’la em beren ni tou neiy i patoumi rapa. ³³ sawona’ sitou i ti’i reiy’ waki si Empung o meiy, Sia si reiy’ mete’u sumiwo sapa-sapa.” ³⁴ Wingkot nea : “ Nikoo yi’i koo neiy i patou uli-ulit witu en dosa wo nikoo koo mewewee teturu’ nikeiy?” Laa o sia ure’ nea witu luar. ³⁵ Yesus si liminga kaa nisia si neiy mouw i ure’ nea witu luar. Kamurian Sia masungkul ampit nisia wo lumila’ : “ Ma’eman ku’a re’en koo wia si Oki’ ni Tou?” ³⁶ Wingkotna : “ Seiy re’en Sia, Tuhan? Rio niaku ma’eman wia-Nisia.” ³⁷ Pokeiy ni Yesus wia nisia : “ Nikoo reiy’kan i te lumoo’ Nisia; ta’an Nisia si kasuatan mesesusuiy ampit nikoo, Nisia mouw i tu!” ³⁸ 38 Pokeiyna : “ Niaku ma’eman, Tuhan!” Laa o sia maongkot sumempe-Nisia. ³⁹ Pokeiy ni Yesus : “ Niaku mineiy wia eng kaoatan kaa meiy ma’akimela wo seiy i te si reiy’ limoo’, si toro lumoo’, wo rio seiy i te si toro lumoo’, si merapa.” ⁴⁰ Lelila’an-lelila’an i ti’i e lininga ne pirala tou Farisi se witu wo lumila’la wia-Nisia : “ Sapa ku’a re’en i tu e maka penoron kaa nikeiy kangkasi keiy rapa?” ⁴¹ Wingkot ni Yesus wia nisea : ‘ Sawona’ kouw rapa, kouw reiy’ berdosa, ta’an karengan kouw limila’: Keiy maloo’, takar en tetapouw en dosamu.”