¹ “Niaku lumila’me wia nikoo: Kaulitena seiy si ghumorem witu eng gorem kalero ni domba ampit si reiy’ timorola em pepalen, ta’an kimawok i te em beton, sia mouw siesa tou rongkit wo siesa tou ro’obit; ² ta’an seiy si ghimorem timorola em pepalen, Nisia mouw si rumerawir domba. ³ Kaa nisia si tumetayur minuka’ em pepalen wo se domba-domba se melelingala en suarana wo sia kumeret se domba-dombana siesa o siesa i ki’it e ngaranna wo rumawir nisea kumaluar. ⁴ Sa em baya ne dombana se nialina mola witu e luar, sia kumelang witu e rerior nea wo se domba-domba i ti’i maki’it i tela nisia, karengan nisea se sumine’u en suarana. ⁵ Ta’an siesa tou wo’oseiy tantu si reiy’ ki’itan neala, awes tare sea tumingkasla wia nisia, karengan en suara ne tou-tou wo’oseiy e reiy’ kasine’uan nea.” ⁶ Ni’itu mouw e neiy i lila’la ni Yesus wia nisea witu em peulurela, ta’an nisea se reiy’ mangarti e maksudna Sia limila’ en tuana wia nisea. ⁷ Takar pokeiy ni Yesus mekasape’ kasi: “Niaku lumila’me wia nikoo, kaulitna Niaku mouw em pepalen mea wia se domba-domba i ti’i. ⁸ Em baya ne tou se mineiy nu reiy’pe’ Niaku, nyi’a mouw se rumerongkit wo se rumero’obit, wo se domba-domba i ti’i se reiy’ melelinga nisea. ⁹ Niaku mouw si pepalen; seiy i te si ghimorem timorola Niaku, nisia si laa melawir wo nisia si laa ghumorem wo rumou’ wo tume’upela em padang rukut. ¹⁰ Rongkit si mineiy kaa meiy i te mererongkit wo mewewunu’ wo mepepunengela; Niaku mineiy, rio sea makapunyala em patou-touan, wo makapunyala nyi’a witu e reiy’ sa mina’asa kalokonan. ¹¹ Niaku mouw si rumerawir le’os. Si rumerawir le’os si meweweela e nyawana i wee se domba-dombana; ¹² sedangkan siesa tou mengengedo nedo si reiy’ rumerawir, wo reiy’ makapunya sandiri se domba-domba i ti’i , katoroan limoo’ si srigala mengeiy, tumele’ula se domba-domba i ti’i laa o tumingkas, i ka’ayo se serigala i ti’i rima’akep wo timabuke’isela se domba-domba i ti’i. ¹³ Sia si timingkas karengan nisia sitou mengengedo nedo wo reiy’ maweela ghenang se domba-domba i ti’i. ¹⁴ Niaku mouw si rumerawir le’os wo Niaku ku sumine’u se domba-domba-Ku wo se domba-domba-Ku se sumine’u Niaku ¹⁵ masuat tanu si Ama’ sumine’u Niaku wo Niaku sumine’u si Ama’ wo Niaku ku meweweela e nyawa-Ku i wee se domba-domba-Ku. ¹⁶ Waweeane’ kasi wia-Niaku se domba-domba walina, se reiy’ wia eng kalero yi’i; se domba-domba i ti’i se lewo sa reiy’ tuntun eng-Ku kangkasi wo nisea se laa lumingala en suara-Ku wo nisea se laa mamuali esa kawang ampit siesa rumerawir. ¹⁷ Ama’ si meupusela Niaku, eng karengan Niaku ku mineela e nyawa-Ku kaa laa maka’ato nyi’a sumeup. ¹⁸ Reiy’ siesa tou tu’u medo nyi’a wia-Niaku, ta’an i te Niaku meela nyi’a i ki’it eng kepa’aran-Ku nuesa. Niaku wawean kuasa meweweela nyi’a wo wawean kuasa ma’edo nyi’a sumeup. Nyi’i mouw en tugas kina’atoan-Ku waki si Ama’-Ku.” ¹⁹ Takar tu lumentutouw kasi em pesali’si’an witu e nelet ne tou-tou Yahudi karengan e lelila’an i ti’i. Laker witu e nelet nea se limila’: ²⁰ “ Sia si sinelaran ni setang wo palela’an: ka’a kouw malingala Nisia?” ²¹ Se walina limila : “ Ni’itu reiy’ tetotoren ni tou sinelaran ni setang; toro re’en si setang mewewula’la em beren ni tou-tou rapa?” ²² Reiy’ ure kamurian ma’ayo mouw e nendo wangko’ Pengtahbisan em Bait ni Empung waki Yerusalem; katoroan e ni’itu noras eng ge’egher. ²³ Wo Yesus si mengela-ngelang witu em Bait ni Empung, witu em podol ni Salomo. ²⁴ Takar se tou-tou Yahudi se limedongela Nisia wo lumila wia-Nisia : “ Pirape’ eng keure kasi Koo mayala nikeiy tumou witu eng kabimbangan? Sawona’ Koo Mesias, i lila’ momi pakaredeiy wia nikeiy.” ²⁵ Yesus si miningkot nisea : “ Niaku ku limila’ mola nyi’a wia nikouw, ta’an nikouw kouw reiy’ ma’eman; pepa’ayangen-pepa’ayangen en tinuana-Kula witu e ngaran ni Ama’-Ku, ni’itu mouw e mineela kasairian tanume Niaku, ²⁶ ta’an nikouw kouw reiy’ ma’eman, karengan nikouw kouw reiy’ neiy i kaghorem domba-domba-Ku. ²⁷ Domba-domba-Ku se malingala en suara-Ku wo Niaku ku sumine’u nisea wo nisea se maki’it Niaku, ²⁸ wo Niaku mineela patou-touan kekal wia nisea wo nisea tantu mouw se reiy’ laa mapuneng i ka’ayo eng keure-urena wo siesa tou tu’u si reiy’ laa kumaat nisea witu e lawas-Ku. ²⁹ Ama’-Ku, si mineela nisea wia-Niaku, si lebe wangko’ ta’an si seiy i te tu’u wo siesa tou tu’u si reiy’ mete’u kaaten nea witu e lawas ni Ama’. ³⁰ Niaku wo si Ama’ keiy esa.” ³¹ Mekasa pe’ kasi se tou-tou Yahudi minedo watu kaa em pelelawala si Yesus. ³² Pokeiy ni Yesus wia nisea : “ Laker em pepa’ayangen le’os e nasal waki si Ama’-Ku e neiy Ku i papa’atola wia nikoo; em pepa’ayangen wisa re’en witu e neletna en simiwola nikouw o pa’ar melelawala Niaku?” ³³ Wingkot ne tou-tou Yahudi i ti’i : “ Reiy’ karengan e nesa pepa’ayangen le’os takar keiy pa’ar melelawala Nikoo, ta’an i te kaa Nikoo maojat si Empung wo kaa Nikoo, ma’anouw tu’u esa nga touan i te, manginsuatela en tetou-Mu ampit si Empung.” ³⁴ Pokeiy ni Yesus wia nisea: “Reiy’ ku’a re’en wawean e neiy i patik witu eng kitab Taurat miouw: Niaku ku minee mola nuwu’: Nikouw mouw si empung? ³⁵ Sa nisea, wia si seiy e nuwu’ i ti’i neiy i pa’ayola, tinotor empung – kasuatan eng Kitab Suci e reiy’ mete’u batalen -, ³⁶ kouw limila’pe’la ka’asi’ ku’a re’en wia Nisia si kinudusela ni Ama’ wo si neiy mouw i toke-Na wia eng kaoatan; Nikoo koo maojat si Empung! Karengan Niaku ku limila’ mola: Niaku Urang ni Empung? ³⁷ Sawona’ Niaku reiy’ timuanala em pepa’ayangen-pepa’ayangen ni Ama’-Ku, te’a mouw ma’eman wia-Niaku, ³⁸ ta’an sawona’ Niaku simiwola nyi’a wo kouw reiy’ pa’ar ma’eman wia-Niaku, ma’emanola witu em papa’ayangen-papa’ayangen i ti’i, rio kouw toro mete’ula wo mangarti, kaa si Ama’ witu Niaku wo Niaku witu si Ama’.” ³⁹ Mekasa pe’ kasi sea ma’awa’ mesesikop Nisia, ta’an Nisia si neiy i kase’engket witu e lawas nea. ⁴⁰ Kamurian si Yesus minea kasi waki lewet e Yordan, waki tampa si Yohanes nu minaptis eng ketareanna, laa o Sia mena’ witu. ⁴¹ Wo kelaker se tou mineiy wia-Nisia wo lumila’: “ Yohanes memang si reiy’ simiwo esa kowa’ tu’u, ta’an em baya neiy mouw i lila’la ni Yohanes en tanume sitou yi’i nyi’a mouw e nulit.” ⁴² Wo laker se tou witu ma’eman wia-Nisia.