¹ Wawean siesa tou si kasuatan rara’an, ngaranna Lazarus. Sia si maana’ waki Betania, e wanua ni Maria wo si tuarina Marta. ² Maria sia mouw si wewene mekasa limanala e ne’a ni Tuhan ampit e lana mur wo misu’la nyia ampit em bu’ukna. ³ Wo si Lazarus rara’an i ti’i si patuarina. Se rua wewene i ti’i se minapa’ali e nabar wia si Yesus: “Tuhan, nisia si i koupus-Mu, si rara’an.” ⁴ Katoroan si Yesus nu liminga e nabar i ti’i, Sia lumila’: “Rumara i ti’i e reiy’ laa mali em patean, ta’an e laa mapa’atola eng kalo’oran ni Empung, karengan kaa e rumara i ti’i si Oki’ ni Empung si laa lo’orela.” ⁵ Yesus si memang meupusela si Marta wo si kaka’na wo si Lazarus. ⁶ ta’an ni’itu nu lininga-Na mola, kaa si Lazarus si rara’an, Sia si timu’utu’ minena’ rua nga endo pe’ kasi witu en tampa, wisa Sia witu; ⁷ ta’an nu reiy’ mouw i tu Sia lumila’ wia se murid-murid-Na: “Meiy ta mareng kasi waki Yudea.” ⁸ Murid-murid i ti’i limila’ wia-Nisia: “Rabi, werukan yi’i se tou-tou Yahudi se mina’awa’ melelawala Nikoo, mepa’are’ re’en Koo mareng maname?” ⁹ Wingkot ni Yesus: “Reiy’ ku’a wawean mapulu’ o rua jam witu e nesa nga endo? Seiy si makelang witu e nendo oat, e ne’ana reiy’ i kasu’usu’, karengan nisia si maloo’ en terang eng kaoatan yi’i. ¹⁰ Ta’an sawona’ sitou makelang witu e nendo wengi, e ne’ana ni’i kasu’usu’, karengan en terang reiy’la witu en touna.” ¹¹ Tuana mouw e lelila’an-Na, wo nu reiy’ mouw i tu Sia lumila’ wia nisea : “ Lazarus, patuari ta, si neiy mouw i katekel, ta’an Niaku ku mea maname kaa laa meteto’orela nisia witu en tekelna.” ¹² Takar pokeiy ne murid-murid i ti’i wia-Nisia : “ Tuhan, sawona’ sia timekel, sia si laa male’os.” ¹³ Ta’an maksud ni Yesus nyi’a mouw en timekel witu em penoron minate, e nulitna pokeiy nea i te Yesus si limila’ tanume en timekel witu em penoron kenaramen. ¹⁴ Kaa ni’itu Yesus si limila’ ampit e neiy i pakaredeiy: “Lazarus si minate mouw; ¹⁵ ta’an syukurouw Niaku ku reiy’ hadir witu e nedo ni’itu, karengan en tuana lebe le’os wia nikoo, rio kouw toro ma’ajarela ma’eman. Meiy mouw ta mea wia nisia teakan.” ¹⁶ Laa o si Tomas, si patotoren Didimus, lumila’ wia se ka’ampit-ka’ampitna, sea i ti’i se murid-murid walina: “Meiy mouw ta mea kangkasi kaa laa mate mewali-wali ampit Nisia.” ¹⁷ Takar katoroan si Yesus nu neiy i ka’ayola, neiy aton-Nala si Lazarus epat nga endo mouw ghimoleiy witu eng gorem eng kubur. ¹⁸ Em Betania rimeta’ tawi e Yerusalem, wo’o wona’ rua mil eng kewa’akatna. ¹⁹ Witu kelaker se tou Yahudi mineiy mouw wia si Marta wo si Maria kaa meiy me’ibor nisea minato’orongan ampit em pinatean ni patuari nea. ²⁰ Katoroan si Marta liminga, kaa si Yesus mineiy sia mea maatoala-Nisia. Ta’an Maria si minena’ waki wale. ²¹ Takar pokeiy ni Marta wia si Yesus : “ Tuhan, sawona’ Koo wia nyi’i, si patuariku tantu si reiy’ minate. ²² Ta’an teakan tu’u kete’uanku, kaa si Empung si laa meela wia-Nikoo e reiy’ sa mina’asa wo’o sapa eng kiween-Nu wia-Nisia.” ²³ Pokeiy ni Yesus wia si Marta : “ Patuarimu si laa tumo’or.” ²⁴ Pokeiy ni Marta wia-Nisia: “Niaku ku mete’u kaa nisia si laa tumo’or witu e nedo se tou-tou tumo’or witu eng kesampetan zaman.” ²⁵ Wingkot ni Yesus: “Niaku mouw ku kato’oran wo em patou-touan; seiy i te si ma’eman wia-Niaku, sia si laa tumou ma’anouw tu’u sia minate mouw, ²⁶ wo susur tou si matou-tou wo si ma’eman wia-Niaku, si reiy’ laa mate eng keure-urena. Ma’eman reken koo witu eng kapualitan yi’i?” ²⁷ Wingkot ni Marta : “ Yon, Tuhan, niaku ku ma’eman, kaa Nikoo mouw si Mesias, Urang ni Empung, Sia si laa meiy wia eng kaoatan.” ²⁸ Wo sia nu limila’ mola en tuana sia mea kumeret si patuarina Maria wo tumena’ wia nisia : “ Guru si waki ti’ime wo Sia si mengeret nikoo.” ²⁹ Liminga ni’itu si Maria si makarengan timo’or laa o mea matola si Yesus. ³⁰ Ta’an en toro ni’itu Yesus si reiy’ pe’ mina’ayo witu eng gorem em banua i t’i. Nisia si wakipe’ tampa ni Maria nu time’upela Nisia. ³¹ Katoroan se tou-tou Yahudi se mewali-wali ampit si Maria witu em bale i ti’i kaa me’ibor nisia, limoo’ kaa si Maria makarengan timo’or wo mea waki luar, nisea se kimi’itla nisia, karengan nisea se mapokeiyla kaa nisia si mea waki kubur kaa me’a ma’arip witu. ³² I kekeka’ayola ni Maria waki tampa ni Yesus nu witu wo limoo’ Nisia, i kasungkurouw sia witu en sinaru e ne’a-Na wo lumila’ wia-Nisia : “ Tuhan, sawona’ Koo wia nyi’i, si patuariku tantu si reiy’ minate.” ³³ Katoroan si Yesus limoo’ si Maria maame’ wo kangkasi se tou-tou Yahudi mewali-wali nisia, takar en tekurouw e natena-Na. Sia si kasa arip wo lumila’: ³⁴ “Witu e wisa ku’a re’en eng ghinoleiyan niouwla nisia?” Wingkot nea: “Tuhan, meiy mouw wo loo’onouw!” ³⁵ Takar mame’ mouw si Yesus. ³⁶ Pokeiy ne tou-tou Yahudi: “Loo’onouw, kumura eng koupus-Na wia nisia!” ³⁷ Ta’an se pirala tou witu e nelet nea limila’: “Sia si minula’la em beren ni tou rapa, reiy’ makawoo ku’a re’en Sia tumuana, i ka’ayo sitou yi’i si reiy’ minate?” ³⁸ Takar en tekurouw kasi e nate ni Yesus laa o Sia mea waki kubur i ti’i. Eng kubur i ti’i nyi’a mouw e nesa goa pinalenan watu. ³⁹ Pokeiy ni Yesus: “Popon em batu i ti’i!” Marta, patuari ni tou timayan i ti’i, limila’ wia-Nisia: “Tuhan, sia si mawou mouw, karengan epatouw nga endo sia minate.” ⁴⁰ Wingkot ni Yesus: “Reiy’ ku’a neiy Ku mouw i lila’la wia nikoo: Sawona’ koo ma’eman koo laa lumoo’ eng kamulia’an ni Empung?” ⁴¹ Takar tu popon nea em batu i ti’i. Laa o kuma’ate waki atas si Yesus wo lumila’: “Ama’, Niaku ku tumotore en syukur wia-Nikoo, karengan Nikoo koo liminga mola Niaku. ⁴² Niaku ku mete’u, kaa Nikoo koo salalu malingala Niaku, ta’an kaa eng karengan se tou kelaker se rimedeiy wia nyi’i limedongla Niaku, Niaku limila’la nyi’a, rio sea ma’eman, kaa Nikoo mouw si timokemi Niaku.” ⁴³ Wo Sia nu limila’ mola en tuana, wo maaleiyouw Sia ampit en suara kaente’: “Lazarus, meiy mouw wia luar!” ⁴⁴ Sitou minate mouw i ti’i mineiy wia luar, ne’a wo e lawasna wina’akese’ ampit eng roko’ kafan wo eng giona eng kinakelungan en saraweta. Pokeiy ni Yesus wia nisea: “Wuka’anouw e roko’-roko’ i ti’i wo i waya mola sia mea.” ⁴⁵ Laker witu e nelet ne tou-tou Yahudi se mineiy lumales si Maria wo limoo’ola sandiri sapa en siniwo mola ni Yesus, ma’eman wia-Nisia. ⁴⁶ Ta’an wawean se minea wia se tou-tou Farisi wo sumusuiyela wia nisea, sapa en siniwo mola ni Yesus i ti’i. ⁴⁷ Laa o se imam-imam kepala wo se tou-tou Farisi kumeret se Mahkamah Agama meiy merur wo sea lumila’: “Sapa re’en e lewo’ sa reiy’ siwon ta? Karengan sitou i ti’i si laker masiwo mujizat. ⁴⁸ Sawona’ Sia i waya ta, takar em baya ne tou se laa ma’eman wia-Nisia wo se tou-tou Roma se laa meiy wo kumaat en tampa suci ta ma’an em bangsa ta.” ⁴⁹ Ta’an siesa tou witu e nelet nea, sia i ti’i si Kayafas, Imam Wangko’ witu en te’un i ti’i, limila’ wia nisea : “ Nikouw kouw reiy’ mete’u en sapa-sapa, ⁵⁰ wo nikouw kouw reiy’ mina wena’as, kaa e lebepe’ wawean penoron wia nikoo, sa siesa tou mate kaa em bangsa ta ta’an i te e minapekasa em bangsa ta mapuneng.” ⁵¹ Eng kapualitan i ti’i neiy i lila’na reiy’ waki en touna nuesa, ta’an en tanume sia nu Imam Wangko’ witu en te’un i ti’i sia mee nubuat, kaa si Yesus si laa mate i wee se bangsa i ti’i, ⁵² ta’an reiy’ kaa se bangsa i te i ti’i, ta’an kangkasi ma’arurela wo mapa esala se oki-oki’ ni Empung se neiy i kasera. ⁵³ Muleiymi en nendo ni’itu sea maasa’an kaa mewewunu’ Nisia. ⁵⁴ Kaa ni’itu Yesus si reiy’ minapa’ato kasi witu en sinaru ne tou kelaker witu e nelet ne tou-tou Yahudi, Sia rumou’mi witu wo mea waki daerah tawi em padang gurun, waki e nesa kota mekengaran Efraim, wo witu Sia mena’ mewali-wali se murid-murid-Na. ⁵⁵ Witu en toro ni’itu e nendo wangko’ Paskah ne tou Yahudi en tawi mouw wo kelaker se tou waki wanua i ti’i minae waki Yerusalem kaa laa melelenasela en tetou nu reiy’ pe’ em Paskah i ti’i. ⁵⁶ Nisea se menero si Yesus wo kasuatan rimedeiy witu eng gorem em Bait ni Empung, sea lumila siesa wia se walina: “Kumura em pendapatmu? Meiykan kangkasi ku’a re’en Sia wia em pelesir?” ⁵⁷ Kasuatan e ni’itu se imam-imam kepala wo se tou-tou Farisi se minee mola perenta rio susur tou si mete’u wisa Sia witu makite’ula nyi’a, rio sea toro sumikop Nisia.