¹ ta’an si Yesus minea waki bukit Zaitun. ² Memo’odope’ kasa Sia si witu mouw kasi em Bait ni Empung, wo se minapekasa rakyat se mineiy wia-Nisia. Sia rumuber wo mee teturu’ nisea. ³ Takar se ahli-ahli Taurat wo se tou-tou Farisi minali wia-Nisia siesa wewene si kina’atoan simiwo en zinah. ⁴ Nisea se timampala si wewene i ti’i witu eng keuneran laa o lumila’ wia si Yesus : “ Rabi, wewene i yi’i si kinasempakan katoroan sia nu masiwo en zinah. ⁵ Musa witu e nukum Taurat minerentala nikita lumawala se wewene-wewene tuana. Sapa ku’a em pendapat-Mu tanume eng kapualitan i ti’i?” ⁶ Nisea se limila’la eng kapualitan i ti’i kaa mewewa’awa’la Nisia, rio sea maka’ato sapa-sapa kaa laa manginselokela-Nisia. Ta’an Yesus si minengkurla laa o matik ampit en tetudu’-Na witu en tana’. ⁷ Wo katoroan nisea nu reiy’ siena’na mawueiy wia-Nisia, Sia tu’u tumo’or rumedeiy laa o lumila’ wia nisea : “ Seiy i te witu e nelet miouw si reiy’ berdosa, satorona sia si kumetare lumawala em batu wia si wewene i ti’i.” ⁸ Laa o Sia mengkurla kasi wo matik witu en tana’. ⁹ Ta’an sea nu liminga mola e lelila’an i ti’i, mea mouw sea siesa demi siesa, muleiy waki si kasa tu’a. kesampetanna timele’ula si Yesus okan maesa-esa ampit si wewene i ti’i se minena’ witu en tampana. ¹⁰ Laa o tumo’or rumedeiy si Yesus wo lumila’ wia nisia : “ Heiy wewene, wisa mouw ku’a re’en sea? Reiy’la ku’a re’en siesa tou si minukum nikoo?” ¹¹ Wingkotna : “ Reiy’la, Tuhan.” Laa o pokeiy ni Yesus : “ Niaku kangkasi ku reiy’ minukum nikoo. Mea mouw, wo te’a mouw masiwo en dosa kasi muleiymi en teakan.” ¹² Takar Yesus si limila’ kangkasi wia se tou kelaker, pokeiy-Na : “ Niaku mouw ku terang eng kaoatan; seiy i te si kumi’it Niaku, sia si reiy’ laa kumelang witu eng kareideman, ta’an i te si laa makapunyala en terang patou-touan.” ¹³ Pokeiy ne tou-tou Farisi wia-NIsia : “ Nikoo koo masairi tanume en tetou-Mu, eng kasairian-Nu e reiy’ ulit.” ¹⁴ Wingkot ni Yesus wia nisea, pokeiy-Na : “ Ma’an tu’u Niaku masairi tanume en tetou-Ku sandiri, ta’an eng kasairian-Ku i ti’i nulit, karengan Niaku ku mete’u, waki wisa Niaku o meiy wo waki wisa Niaku mea. Ta’an nikouw kouw reiy’ mete’u waki wisa Niaku o meiy wo waki wisa Niaku mea. ¹⁵ Nikouw kouw maakimla i ki’it e nukuran ni tou, Niaku ku reiy’ maakimla siesa tou tu’u, ¹⁶ wo sawona’ Niaku maakimla, takar em paakiman-Ku iti’i e nulit, karengan Niaku ku reiy’ maesa-esa, ta’an Niaku ku mewali-wali ampit Nisia si timoke Niaku. ¹⁷ Wo witu eng kitab Tauratmu wawean e neiy i patik, kaa eng kasairian ne rua tou nyi’a mouw en sah; ¹⁸ Niaku mouw si simairi tanume en tou-Ku sandiri, wo kangkasi si Ama’, si timoke Niaku, simairi tanume e Niaku.” ¹⁹ Takar pokeiy nea wia-Nisia : “ Waki wisa ku’a re’en si Ama’-Mu?” Wingkot ni Yesus : “ Le’os Niaku, ma’an tu’u si Ama-ku reiy’ kasine’uan niouw. Sa wo’o wona’ kouw sumine’u Niaku, kouw sumine’u kangkasi si Ama’-Ku.” ²⁰ En lelila’an-lelila’an i ti’i neiy i lila’la ni Yesus tawi em penu’utu-nu’utulan, e nedo Sia nu mawee teturu witu eng gorem em Bait ni Empung. Wo reiy’ siesa tou tu’u si simikop Nisia, karengan e nedo-Na reiy’pe’ neiy i ka’ayo. ²¹ Takar Yesus si limila’ kasi wia se tou kelaker : “ Niaku ku laa mea wo nikouw kouw laa sumero Niaku ta’an nikouw kouw laa mate witu en dosamu. Witu en tampa Niaku mea, reiy’ wona’ kouw meiy.” ²² Takar pokeiy ne tou-tou Yahudi i ti’i : “ Sapa ku’a re’en Sia si mewewunu’ en tetou wo kaa ni’itu neiy i lila’-Nala : Waki tampa Niaku mea, reiy’ wona’ kouw meiy?” ²³ 23 Laa o Sia lumila’ wia nisea : “ Nikouw kouw asal wia e wawa’, Niaku wia e natas; nikouw wia eng kaoatan yi’i, Niaku reiy’ wia eng kaoatan yi’i. ²⁴ Kaa ni’itu eng ketare Niaku limila’ wia nikoo, kaa nikouw kouw laa mate witu en dosamu; karengan sawona’ kouw reiy’ ma’eman, kaa Niaku mouw Sia, nikouw kouw laa mate witu en dosamu.” ²⁵ Takar pokeiy nea wia-Nisia : “ Seiy ku’a re’en Nikoo?” Wingkot ni Yesus wia nisea : “ Sapa ku’a re’en em penoronna kasi Niaku mesesusuiy ampit nikouw? ²⁶ Laker e lewo’ sa reiy’ i lila’-Kula wo akim eng-Kula en tanume nikouw; ta’an Nisia, si timoke Niaku, Sia mouw si ulit, wo sapa e lininga-Ku waki-Nisia, ni’itu e lila’-Kula wia si kaoatan.” ²⁷ Nisea se reiy’ mangarti, kaa Nisia si meila’ wia nisea en tanume si Ama’. ²⁸ Takar pokeiy ni Yesus : “ Sakawisa kouw mineperakekola si Oki ni Tou, tare mouw kouw mete’u, kaa Niaku mouw Sia, wo kaa Niaku ku reiy’ simiwo sapa-sapa witu en tetou-Ku sandiri, ta’an Niaku ku meila’ en tanume eng kapualitan-kapualitan, eng kumura neiy i turu’la ni Ama’ wia-Niaku. ²⁹ Wo Nisia, si timoke mouw Niaku, Sia si merapitla Niaku. Sia si reiy’ mewayala Niaku maesa-esa, karengan Niaku ku reiy’ mena’ masiwo sapa e mekepa’aren i wee-Nisia.” ³⁰ Yesus nu limila’ mola em baya nyi’a i ti’i, kelaker se tou ma’eman wia-Nisia. ³¹ Takar pokeiy-Na wia se tou-tou Yahudi se ma’eman wia-Nisia : “ Sa kouw mena-ena’ witu e nuwu’-Ku, nikouw mouw kouw uli-ulit murid-Ku ³² wo nikouw kouw laa mete’ula eng kaulitan, wo eng kaulitan i ti’i e laa mamerdekala nikouw.” ³³ Wingkot nea : “ Nikeiy mouw keiy see’ ni Abraham wo reiy’pe’ ma’an mekasa mamuali hamba ni seiy i te tu’u. Kumura Koo toro lumila’ : Kouw laa merdeka?” ³⁴ Pokeiy ni Yesus wia nisea : “ Niaku lumila’me wia nikoo, kaulitena susur tou si masiwo en dosa, sia mouw si hamba en dosa. ³⁵ Wo si hamba si reiy’ minena’ maana’ witu eng gorem em bale, ta’an si oki’ si minena’ maana’ witu eng gorem em bale. ³⁶ Jadi sakawisa si Oki’ i ti’i mamerdekala nikouw, nikouw tu’u uli-ulit merdeka.” ³⁷ “Niaku ku mete’u, kaa nikouw mouw kouw see’ ni Abraham, ta’an nikouw kouw me’inakut mewewunu Niaku karengan e nuwu’-Ku reiy’ minaka’ato tampa witu nikouw. ³⁸ Sapa e linoo’-Ku wia si Ama’, ni’itu mouw em peila’-Kula, wo tuanakan kangkasi en siwon niouw tanume en sapa e lininga miouw wia si ama’mu.” ³⁹ Wingkot nea wia-Nisia : “ Ama’ meiy sia mouw si Abraham.” Pokeiy ni Yesus wia nisea : “ Sa wona’na kouw oki-oki’ ni Abraham, tantu mouw kouw mepa’ayangela em pepa’ayangen pina’ayangela ni Abraham. ⁴⁰ Ta’an em pina’ayang miouwla nyi’a mouw e me’inakut mewewunu’ Niaku; Niaku, siesa nga tou limila’la eng kaulitan wia nikoo, nyi’a i ti’i eng kaulitan lininga-Ku waki si Empung; em pepa’ayangen tuana e reiy’ pina’ayangla ni Abraham. ⁴¹ Nikouw kouw mepa’ayangela em pepa’ayangen ni ama’mu sandiri.” Wingkot nea : “ Nikeiy keiy reiy’ neiy i patoula witu en zinah. Ama’ meiy siesa, nyi’a i ti’i si Empung.” ⁴² Pokeiy ni Yesus wia nisea : “ Sa si Empung nyi’a mouw si Ama’mu, nikouw kouw laa meupusela Niaku, karengan Niaku rumou’ wo meiy waki si Empung, wo Niaku mineiy reiy’ kaa eng kepa’aran-Ku sandiri, ta’an i te Nisia si timoke Niaku. ⁴³ Sapa ku’a re’en ee karengan o kouw reiy’ mangarti em baasa-Ku? Karengan kouw reiy’ mete’u i kaedo e nuwu’-Ku. ⁴⁴ Iblisouw si minamuali Ama’mu wo kouw pa’ar matuanala eng kepa’aran-kepa’aran ni ama’mu.Sia mouw si memunu’ tou rengane’ eng ketarean wo reiy’ matou-tou witu eng kaulitan, karengan wia nisia reiy’la kaulitan, Sakawisa sia lumila’ en towo, sia si malila’ witu eng kepa’aranna sandiri, karengan nisia mouw si menenowo wo ama’ e reiy’ sa mina’asa towo. ⁴⁵ Ta’an karengan Niaku malila’la eng kaulitan wia nikoo, kouw reiy’ ma’eman wia –Niaku. ⁴⁶ Seiy re’en si witu e neletmu si mebebuktila kaa Niaku simiwo en dosa? Sakawisa Niaku lumila’la eng kaulitan, ka’a ku’a kouw reiy’ ma’eman wia-Niaku? ⁴⁷ Seiy i te si asal waki si Empung, sia si malingala e nuwu’ ni Empung; ni’itu mouw ee karengan kouw reiy’ limingala nyi’a, karengan ni kouw kouw reiy’ asal waki si Empung.” ⁴⁸ Tou-tou Yahudi se miningkot si Yesus : “ Reiy’ ku’a re’en ulit sa keiy lumila’la kaa Nikoo koo tou Samaria wo sinelaran ni setang?” ⁴⁹ Wingkot ni Yesus : “ Niaku ku reiy’ sinelaran ni setang, ta’an Niaku ku maormatela si Ama-Ku wo nikouw kouw reiy’ maormatela Niaku. ⁵⁰ Ta’an Niaku ku riy’ masero e normat i wee-Niaku: wawean Siesa si masero nyi’a wo Nisia kangkasi si maakimla. ⁵¹ Niaku lumila’me wia nikoo : Kaulitna seiy i te si maki’itla e nuwu’-Ku, sia si reiy’ laa me’anla e maut i ka’ayo reiy’ si niakaran.” ⁵² Pokeiy ne tou-tou Yahudi wia-Nisia : “ Teakan keiy mete’u, kaa Nikoo koo sinelaran ni setang. Karengan si Abraham si minate mouw wo tuanakan kangkasi se nabi-nabi, ta’an Nikoo koo limila’: Seiy i te si maki’itla e nuwu’-Ku, sia si reiy’ laa me’anla e maut i ka’ayo reiy’ si niakaran. ⁵³ Sapa ku’a Koo koo lumantouwela eng kewangko’ ta’an si ama’ ta Abraham, si minate mouw! Nabi-nabi tu’u minate mouw; ampit si seiy re’en Koo masuatla en tetou-Mu?” ⁵⁴ Wingkot ni Yesus : “ Sawona’ Niaku mamuliala en tetou-Ku nuesa, takar eng kamulia’an-Ku i ti’i e noki’ i te tu’u reiy’la si penoronna. Ama’-Ku mouw si mamuliala Niaku, en tanume si seiy kouw meila’: Nisia mouw si Empung meiy, ⁵⁵ kaulitna nikouw kouw reiy’ makasine’u Nisia, ta’an Niaku ku sumine’u Nisia. Wo sa Niaku lumila’: Niaku ku reiy’ makasine’u Nisia, takar Niaku mouw si menenowo, masuat tanu nikouw, ta’an Niaku ku makasine’u Nisia wo Niaku ku maki’it i tela e nuwu’-Na. ⁵⁶ Abraham ama’mu si mepa’a-pa’ar kaa nisia si laa lumoo’ e nendo-Ku wo nisia si limoo’ mouw nyi’a wo nisia si mepa’a-pa’ar.” ⁵⁷ Takar pokeiy ne tou-tou Yahudi i ti’i wia-Nisia : “ Numur-Mu reiy’pe’ mina’ayo lima nga pulu’ nge te’un wo Koo limoo’ mouw si Abraham?” ⁵⁸ Pokeiy ni Yesus wia nisea : “ Niaku lumila’me wia nikoo, kaulitna nu reiy’pe’ si Ambraham minamuali, Niaku ku wia mouw.” ⁵⁹ Laa o sea medo watu kaa melelawala Nisia; ta’an Yesus si limiong wo tumele’ula em Bait ni Empung.