¹ Witu e nendo ketare duminggu ni’itu, memo’odope kasa katoroan e nendo reideme’, mea mouw si Maria Magdalena waki kubur i ti’i wo sia lumoo’ kaa em batu e niedo momi witu eng kubur. ² Sia tumingkas mea matola si Simon Petrus wo se murid walina se neiy i keupusela ni Yesus, wo lumila’ wia nisea: “Tuhan si niedo mouw ne tou waki kuburna wo nikeiy keiy reiy’ mete’u wisa rineta’ala Nisia.” ³ Takar mae mouw si Petrus wo si murid walina i ti’i witu eng kubur. ⁴ Sea nu rua se matingkas mewali-wali, ta’an si murid walina i ti’i matingkas lebe repet ta’an si Petrus i ka’ayo si kasa ketarean neiy i ka’ayo waki kubur. ⁵ Sia mangatla witu eng gorem, wo lumoo’ e roko’ kafan rimeta’ witu en tana’; ta’anouw sia si reiy’ ghimorem witu eng gorem. ⁶ Takar meiy mouw kangkasi si Simon Petrus timodeiy wia nisia wo ghumorem witu eng gorem kubur i ti’i. Sia si limoo’ e roko’ kafan rimeta’ witu en tana’, ⁷ kasuatan en saraweta eng ketarena witu eng kokong ni Yesus e reiy’ rimeta’ reten e roko’ kafan i ti’i, ta’an en simangawekala witu en tampa walina wo e limingkunouw. ⁸ Takar ghumoremouw kangkasi si murid walina, si ketarean neiy i kaa’ayo waki kubur i ti’i wo sia si limoo’ nyi’a wo ma’eman. ⁹ Karengan eng kaurean ni’itu nisea se reiy’pe’ mangarti em pumpun eng Kitab Suci e limila’la , kaa Nisia si lewo’ sa reiy’ tumo’or witu e nelet ne tou minate. ¹⁰ Laa o marengouw se rua murid i ti’i waki wale. ¹¹ Ta’an si Maria si rimedeiy reten eng kubur i ti’i wo maame’. Kasuatan maame’ sia mangat witu eng kubur i ti’i, ¹² wo atonna mola se rua malaikat limabung puti’, siesa si rimuber esa nga weka eng kokong wo siesa si rimuber witu e ne’a witu en tampa e mayat ni Yesus neiy i gholeiy. ¹³ Pokeiy ne malaikat-malaikat i ti’i wia nisia: “Ina’, ka’a koo maame’?” Wingkot ni Mria wia nisea: “Tuhanku si niedo mouw ne tou wo niaku ku reiy’ mete’u wisa e rineta’ala Nisia.” ¹⁴ sia nu limila’ mola en tuana sia lumengeme muri wo lumoo’ si Yesus rimedeiy witu, ta’an nisia si reiy’ mete’u, kaa ni’itu mouw si Yesus. ¹⁵ Pokeiy ni Yesus wia nisia: “Ina’, ka’a koo maame’? Seiy re’en si peneronnu?” Maria si mapokeiyla sitou i ti’i sia mouw si menaang witu en taman, laa o lumila’ wia-Nisia: “Tuang, sawona’ si tuang si minedo Nisia, i lila’ momi wia niaku, wisa e rineta’ala ni tuang Nisia, rio niaku ku toro medola-Nisia.” ¹⁶ Pokeiy ni Yesus wia nisia: “Maria!” Maria si limengela wo lumila’ wia-Nisia witu em baasa Ibrani: “Rabuni!”, em penoronna Guru. ¹⁷ Pokeiy ni Yesus wia nisia: “Te’a mouw koo metetiboiy Niaku, karengan Niaku ku reiy’pe’ minea waki si Ama’, ta’an mea mouw waki se patuari-patuari-Ku wo i lila’ mola wia nisea, kaa teakan Niaku ku laa mea wia si Ama’-Ku wo si Ama’mu, witu si Empung-Ku wo si Empungmu.” ¹⁸ Maria Magdalena mea wo lumila’ wia se murid-murid: “Niaku ku limoo’ mouw si Tuhan!” wo kangkasi kaa Nisia si limila’la eng kapualitan-kapualitan i ti’i wia nisia. ¹⁹ Katoroan e nendo wengi mouw witu nendo ketarean duminggu ni’itu merurouw se murid-murid ni Yesus witu e nesa tampa ampit em pepalen-pepalen kinusi’ karengan nisea se meide’ wia se tou-tou Yahudi. Witu en toro ni’itu meiy mouw si Yesus wo rumedeiy witu e nuner nea wo lumila’: “Damai sejahtera i wee nikouw!” ²⁰ Wo Sia nu limila’ mola en tuana, Sia mapa’atola e lawas-Na wo en tian-Na wia nisea. Murid-murid i ti’i se mepa’a-pa’ar katoroan sea nu limoo’ si Tuhan. ²¹ Takar pokeiy ni Yesus mekasape’ kasi: “Damai sejahtera i wee nikouw! Masuat tanu si Ama’ timoke Niaku, tuanakan kangkasi teakan Niaku ku tumoke nikouw.” ²² Wo Sia nu limila’ mola en tuana, Sia sumengola nisea wo lumila’: “Sungkulenouw e Roh Kudus. ²³ Sawona’ kouw ma’ampungela en dosa ni tou, en dosana e nampungala, wo sawona’ kouw lumila’la en dosana e minena’ witukan, en dosana e witukan.” ²⁴ Ta’an si Tomas, siesa wia se mapulu’ o rua murid i ti’i, si patotoren Didimus, si reiy’ mewali-wali nisea, katoroan si Yesus nu mineiy witu. ²⁵ Takar pokeiy ne murid-murid walina i ti’i wia nisia: “Nikeiy keiy limoo’ mouw si Tuhan!” Ta’an si Tomas si limila’ wia nisea: “Nu reiy’pe’ niaku limoo’ em bekas em paku witu e lawas-Na wo nu reiy’pe’ niaku timude’la en tetudu’ku witu em bekas em paku i ti’i wo tumude’la e lawasku witu en tian-Na, ma’an mekasa niaku ku reiy’ laa ma’eman.” ²⁶ Uwalu nga endo kamurian se murid-murid ni Yesus se witu sumeup eng gorem em bale i ti’i wo si Tomas si mewali-wali ampit nisea. Kasuatan em pepalen-pepalen eng kinusi’, Yesus si mineiy wo Sia rumedeiy witu e nuner nea wo lumila’: “Damai sejahtera i wee nikouw!” ²⁷ Kamurian Sia lumila’ wia si Tomas: “Reta’ mola en tetudu’mu wia nyi’i wo loo’onouw e lawas-Ku, i kaya’ momi e lawasmu wo i tude’ mola witu eng gorem en tian-Ku wo te’a koo reiy’ ma’emanla kasi, ta’an i te ma’emanola.” ²⁸ Tomas si miningkot Nisia: “Yon Tuhanku wo Empungku!” ²⁹ Pokeiy ni Yesus wia nisia: “Karengan koo limoo’ mouw Niaku, takar koo ma’eman. Ma’aruiyola sea nu reiy’ limoo’, ta’an se ma’eman.” ³⁰ Memang e lakere’ eng kowa’ walina en siniwo ni Yesus witu en sinaru em beren ne murid-murid-Na, e reiy’ neiy kepatik witu eng kitab yi’i, ³¹ ta’an em baya neiy i kaghorem wia nyi’i neiy mouw i patik, rio kouw ma’eman, kaa si Yesusouw si Mesias, Oki’ ni Empung, wo rio kaa e imanmu kouw maka’ato em patou-touan witu e ngaran-Na.