¹ Laa si Pilatus minedo si Yesus wo rumeo se tou sumiasa Nisia. ² Prajurit-prajurit se minayamla e nesa mahkota tetunean wo rumeta’la nyi’a witu e natas eng kokong-Na. Nisea se minakela wia Nisia eng karaiy buwung, ³ wo kasuatan majume waki muka sea lumila’: “ Tabea, heiy raja ne tou Yahudi!” Laa o sea sumepe’ eng gio-Na. ⁴ Pilatus si rimou’mi kasi wo lumila’ wia nisea: “Loo’onouw, niaku ku minalimi Nisia kumaluar meiy wia nikouw, rio kouw mete’u, kaa niaku ku reiy’ minatola kaselokan sapa i te tu’u wia-Nisia.” ⁵ Laa si Yesus kumaluar, minake mahkota tetunean wo eng karaiy buwung. Takar pokeiy ni Pilatus wia nisea: “Loo’onouw Sitou i ti’i!” ⁶ Katoroan se imam-imam kepala wo se tumetayur-tumetayur i ti’i limoo’ Nisia, o rumekeiyouw sea: “Salibela Sia, salibela Sia!” Pokeiy ni Pilatus wia nisea: “Edone Sia wo salibela Sia; karenga niaku ku reiy’ minatola kaselokan sapa i te tu’u wia-Nisia.” ⁷ Wingkot ne tou-tou Yahudi i ti’i wia-Nisia: “Nikeiy keiy makapunya ukum wo i ki’it e nukum i ti’i Sia si lewo’ sa reiy’ mate, karengan Nisia si mapokeiyla en tetou-Na tanu si Oki’ ni Empung.” ⁸ Katoroan si Paulus nu liminga en tetotoren i ti’i minekeide’ mola sia, ⁹ laa o sia ghumorem kasi witu eng gorem gedung paadilan wo lumila’ wia si Yesus: “Waki wisa ku’a re’en e Nasal-Mu?” Ta’an Yesus si reiy’ miningkot wia nisia. ¹⁰ Takar pokeiy ni Pilatus wia-Nisia: “Reiy’ ku’a re’en pa’ar Koo sumusuiy ampit niaku? Reiy re’en kete’uan-Nu, kaa niaku ku wawean kuasa kangkasi laa merereta’la Nikoo wo wawean kuasa kangkasi laa mesesalibela Nikoo?” ¹¹ Yesus si miningkot: “Nikoo koo reiy’ makapunya eng kuasa sapa tu’u wia Niaku, sawona’ eng kuasa i ti’i e reiy’ waki atas tu i weela wia nikoo. Kaa ni’itu: sia, si simarakan Niaku wia nikoo, e lebe wangko’ en dosana.” ¹² Rengan e ni’itu Pilatus si me’inakut laa merereta’la Nisia, ta’an se tou-tou Yahudi marekeiy: “Sa koo merereta’la Nisia nikoo koo reiy’ mouw kalo ni Kaisar. Susur tou si mapokeiyla en tetouna tanu si raja, sia si masu’usuk si Kaisar.” ¹³ Katoroan si Pilatus nu liminga e lelila’an i ti’i, sia rumeo alin si Yesus witu luar, sia rumuber witu eng kadera paadilan, waki tampa meke ngaran Litostrotos, witu em baasa Ibrani Gabata. ¹⁴ Nendo ni’itu nyi’a mouw e nendo petetu’utulan em Paskah, wo’o wona’ jam dua belas. Pokeiy ni Pilatus wia se tou-tou Yahudi i ti’i: “Yi’i mouw si rajamu!” ¹⁵ Takar rumekeiy mouw sea: “Re’inla Sia! Re’inla Sia! Salibela Sia!” Pokeiy ni Pilatus wia nisea: “Lewo’ sa reiy’ re’en niaku sumalibela si rajamu?” Wingkot ne imam-imam kepala: “Nikeiy keiy reiy’ makapunya raja walina ta’an i te si Kaisar!” ¹⁶ Eng kamurianna Pilatus si simarakan si Yesus wia nisea kaa neiy i pesesalibela. Nisea se simungkul si Yesus. ¹⁷ Kasuatan minesa’an en salib-Na Sia mea waki luar waki en tampa meke ngaran Tampa en Tereuka’, witu em baasa Ibrani: Golgota. ¹⁸ Wo witu Sia i salib neala wo mewali-wali ampit Nisia neiy i salibela kangkasi se rua tou walina, minesesangaweka’an, Yesus si witu eng keuneran. ¹⁹ Wo si Pilatus si rimeo meela kangkasi em pinatikan witu e natas eng kayu salib i ti’i, en teinti’i palingan: “Yesus, tou Nazaret, Raja ne tou Yahudi.” ²⁰ Laker se tou Yahudi se minaca e neiy i patik i ti’i, karengan en tampa wisa si Yesus neiy i salibela e rimeta’ en tawi eng kota wo en tetotoren-tetotoren i ti’i neiy i kepatik witu em baasa Ibrani, baasa Latin wo em baasa Yunani. ²¹ Takar pokeiy ne imam-imam kepala ne tou Yahudi wia si Pilatus: “Te’a koo mepatik: Raja ne tou Yahudi, ta’an kaa nisia si limila’la: Niaku mouw ku raja ne tou Yahudi.” ²² Wingkot ni Pilatus: “Sapa e neiy ku i patik, minena’ neiy’ i kepatik.” ²³ Nu reiy’ mouw se prajurit-prajurit i ti’i simalibela si Yesus, nisea se minedo e labung-Na laa o meteng nyi’a e minamuali epat nga weteng i wee susur prajurit esa nga weteng – wo eng karaiy-Na kangkasi e niedo nea. Eng karaiy i ti’i reiy’ winilitan, waki atas o mawa’ e nesa i te nayaman tu’u. ²⁴ Kaa ni’itu sea lumila’ siesa wia se walina: “Te’a mouw ta meweweteng nyi’a mamuali pirala nga ketor, ta’an le’osouw ta kumoba’la kaa metetantula seiy si maka’ato nyi’a.” Tuana mouw eng kelaa’anna rio lekepouw e wawean neiy i patik witu eng Kitab Suci: “Nisea se memete-meteng e labung-Ku witu e nelet nea wo sea kumoba’ kaa eng karaiy-Ku.” Eng kapualitan i ti’i en tinuana mola ne prajurit-prajurit i ti’i. ²⁵ Wo e reten en salib ni Yesus rimedeiy si ina’-Na wo se patuari ni ina’-Na, Maria, ka’awu ni Klopas wo si Maria Magdalena. ²⁶ Katoroan si Yesus nu limoo’ si ina’-Na wo se murid i keupus-Na witu esa nga weka-Na, lumila’ mouw Sia wia si ina’-Na: “Ina’, yi’i mouw, si oki’mu!” ²⁷ Kamurian pokeiy-Na wia se murid-murid-Na: “Yi’i mouw si ina’mu!” Wo rengan e ni’itu se murid i ti’i se simungkul nisia witu em bale nea. ²⁸ Nu reiy’ mouw i tu, kaa Yesus si mete’u, kaa e reiy’ sa mina’asa en simampetouw, lumila’ mouw Sia – rio lekepouw e wawean neiy i patik witu eng Kitab Suci --: “Niaku mare’o!” ²⁹ Witu wawean e nesa potung wuta e nanggor esem, takar sea tumude’la e wungang karang, e neiy mouw i sosouwla witu eng gorem e nanggor esem, witu esa nga wa’atang hisop laa o i yayatla nyi’a witu en suma ni Yesus. ³⁰ Yesus nu kimoo’ mola e nanggor esem i ti’i, lumila’ mouw Sia: “Simampetouw.” Laa o Sia tumu’utukla eng kokong-Na wo sumarakan e nyawa-Na. ^{31 33} Karengan nendo ni’itu e nendo patiro’an wo rio witu e nendo Sabat se mayat-mayat i ti’i reiy’ minena’ simangkong witu eng kayu salib – karengan en Sabat i ti’i nendo kewangko’ – takar meiy mouw se tou-tou Yahudi wia si Pilatus wo makiwee wia nisia rio e ne’a ne tou i ti’i e repu’unela wo e mayat-mayatna ni’i tumpala. ³² Takar meiy mouw se prajurit-prajurit laa o rumepu’la e ne’a ni tou ketarean wo ne’a ne tou walina se neiy i salibela mewali-wali ampit si Yesus; ³⁴ ta’an siesa witu e nelet ne prajurit i ti’i kimuek en tian-Na ampit em bengkouw, wo makarengan simo’oso’ kimaluar e raa’ wo rano. ³⁵ Wo sitou si limoo’ sandiri eng kapualitan i ti’i si mineela eng kasairian yi’i wo eng kasairianna e nulit, wo nisia si mete’u, kaa nisia si limila’la eng kaulitan, rio nikouw kangkasi kouw ma’eman. ³⁶ Karengan eng kapualitan i ti’i minamuali, rio lekepouw neiy i patik witu eng Kitab Suci: “Reiy’la rui-Na e laa repu’unela.” ³⁷ Wo wawean kangkasi nats e matotorla:” Nisea se laa tumu’us wia Nisia si kinuek nea mola.” ³⁸ Nu reiy’ mouw i tu Yusuf waki Arimatea – sia si murid ni Yesus, ta’an si makiro-kirong karengan meide’ wia se tou-tou Yahudi – kimiwee wia si Pilatus, rio sia iyonala metetumpala e mayat ni Yesus. Wo si Pilatus si lime’ele’la em pakiweenna i ti’i. Laa o meiy mouw sia wo tumumpala e mayat i ti’i. ³⁹ Nikodemus kangkasi si mineiy witu. Nisia mouw si ketare-tare mineiy em bengi wia si Yesus. Sia si maali-ali en sinewokan e lana mur ampit e lana gaharu, wo’o wona’ lima nga pulu’ kati eng kawuterna. ⁴⁰ Sea se minedo e mayat ni Yesus, kumafanla nyi’a ampit e roko’ lenan wo rumampala nyi’a ampit e rampa-rampa i ki’it eng kenaramen ne tou Yahudi sa melele’osela e mayat. ⁴¹ Tawi en tampa wisa si Yesus neiy i salibela wawean e nesa taman wo witu en taman i ti’i wawean e nasa kubur weru e witu eng goremna reiy’pe’ ma’an mekasa line’osala siesa nga tou. ⁴² Karengan e nendo i ti’i e nendo patiro’an ne tou Yahudi, awesla eng kubur i ti’i e reiy’ wa’akatla reta’na, takar sea rumeta’la e mayat ni Yesus witu.