¹ Kamurian si Yesus minapa’atola en tetou kasi wia se murid-murid-Na waki pante lour Tiberias wo Sia si minapa’atola en tetou tanu en tumodong. ² Waki pante iti’i minerur si Simon Petrus, Tomas si patotoren Didimus, Natanael si waki Kana e waki Galilea, wo se oki-oki’ ni Zebedeus wo se rua murid-Na walina. ³ Pokeiy ni Simon Petrus wia nisea: “Niaku ku mea mesesikop sera’.” Pokeiy nea wia nisia: “Nikeiy keiy mea kangkasi ampit nikoo.” Sea mae laa o sumeret witu e lodeiy, ta’an e wengi ni’itu sea se reiy’ simikop sapa-sapa. ⁴ Katoroan e nendo maoatouw, Yesus si rimedeiy waki pante; ta’an se murid-murid i ti’i se reiy’ mete’u, kaa nyi’a mouw si Yesus. ⁵ Pokeiy ni Yesus wia nisea: “Heiy oki-oki’, wawean ku’a re’en kouw si makapunya nenanam? “Wingkot nea: “Reiy’la.” ⁶ Takar pokeiy ni Yesus wia nisea : “ Pitarola em puketmu witu esa nga weka lele’os lodeiy, takar kouw laa maka’ato.” Laa o sea mitarla nyi’a wo nisea s reiy’ mouw mete’u kumeong nyi’a kasi karengan eng kelakerna ne sera’. ⁷ Takar si murid neiy i keupusla ni Yesus i ti’i limila’ wia si Petrus: “Ti’i si Tuhan.” Katoroan si Petrus nu liminga, kaa ni’itu mouw si Tuhan, takar sia makela e labungna, karengan nisia si limengat, laa o tumumpele’ witu eng gorem e lour. ⁸ Murid-murid walina se mineiy ampit e lodeiy karengan nisea se reiy’ wa’akat waki ketana’an, wo’o i te wona’ rua nga atus hasta wo sea kumeong em puket wuta ne sera’ i ti’i. ⁹ Katoroan sea nu i ka’ayo waki ketana’an, sea lumoo’ e waana napi wo witu e natasna en sera’ wo roti. ¹⁰ Pokeiy ni Yesus wia nisea: “Ali momi pirala sera’, se weru sinikop miouwla i ti’i.” ¹¹ Simon Petrus si simeret witu e lodeiy laa o kumeong em puket i ti’i waki ketana’an, wuta ne sera’-sera’ sela: esa nga atus lima nga pulu’ o telu nga ipus eng kelakerna, wo ma’anouw tu’u se kelaker ni’itu, em puket i ti’i e reiy’ mina kurensang. ^{12 14} Pokeiy ni Yesus wia nisea: “Meiy mouw wo mente’ mouw.” Reiy’la witu e nelet ne murid-murid i ti’i si berani mueiy wia-Nisia: “Seiy re’en Nikoo?” Karengan nisea se mete’u, kaa Nisia mouw si Tuhan. ¹³ Yesus si minajula witu e muka, medo roti wo meela nyi’a wia nisea, tuanakan kangkasi se sera’ i ti’i. Ni’itu mouw eng kateluna si Yesus minapa’atola en tetou wia se murid-murid-Na nu reiy’ mouw Sia nu timo’or witu e nelet ne tou minate. ¹⁵ Sea nu minente’ mola Yesus si limila’ wia si Simon Petrus: “Simon, urang ni Yohanes, sapa ku’a koo meupusla Niaku e lumebela ta’an nisea yi’i?” Wingkot ni Petrus wia-Nisia: “Nulit Tuhan, Nikoo koo mete’u, kaa niaku ku meupusela Nikoo.” Pokeiy ni Yesus wia nisia: “Rawirenola se domba-domba-Ku.” ¹⁶ Pokeiy ni Yesus kangkasi wia nisia laa eng karuana: “Simon, urang ni Yohanes, sapa ku’a koo meupusela Niaku?” Wingkot ni Petrus wia-Nisia: “Nulit Tuhan, Nikoo koo mete’u, kaa niaku ku meupusla Nikoo.” Pokeiy ni Yesus wia nisia: “Rawirenola se domba-domba-Ku.” ¹⁷ Pokeiy ni Yesus wia nisia laa eng kateluna: “Simon, urang ni Yohanes, sapa ku’a koo meupusela Niaku?” Takar en tekurouw e nate ni Petrus karengan Yesus si limila’ eng kateluna: “Sapa ku’a nikoo koo meupusla Niaku?” Wo sia lumila’ wia-Nisia: “Tuhan, Nikoo koo mete’u e reiy’ sa mina’asa, Nikoo koo mete’u, kaa niaku ku meupusla Nikoo.” Pokeiy ni Yesus wia nisia: “Rawirenola se domba-domba-Ku. ¹⁸ Niaku lumila’me wia nikoo: Kaulitna katoroan nikoo nu mudape’ nikoo koo ma’akes e rereenannu sandiri wo koo kumelang wisa i te eng kepa’arannula, ta’an sa koo mina tu’a mouw, koo laa kumaya’la e lawasmu wo se tou walina se laa ma’akes nikoo wo mali nikoo waki tampa e reiy’ i kepa’armula.” ¹⁹ Wo eng kapualitan yi’i neiy i lila’-Nala kaa meteturu’la kumura si Petrus laa mate wo lumo’orela si Empung. Sia nu limila’ mola en tuana Sia lumila’ wia si Petrus: “Kumi’itouw Niaku.” ²⁰ Kasuatan si Petrus nu limenge, sia lumoo’ kaa si murid neiy i keupusla ni Yesus si kasuatan maki’iti nisea, nyi’a i ti’i si murid witu e nedo kasuatan sea nu mekaan mewali-wali si rimuber reten ni Yesus wo si limila’: “Tuhan, seiy re’en sia si laa sumarakan Nikoo?” ²¹ Katoroan si Petrus nu limoo’ si murid i ti’i, sia lumila’ wia si Yesus : “ Tuhan, sapa ku’a re’en e laa mamuali wia nisia yi’i?” ²² Wingkot ni Yesus: “Sawona’ Niaku mepa’arla, rio sia minena’ matou-tou i ka’ayo Niaku meiy, ni’itu e reiy’ urusannu. Ta’an nikoo: kumi’itouw Niaku.” ²³ Takar tu rumangketouw e nabarwitu e nelet ne patuari-patuari i ti’i, kaa si murid i ti’i si reiy’ laa mate. Ta’an si Yesus si reiy’ limila’la wia si Petrus, kaa si murid i ti’i si reiy’ laa mate, ta’an i te: “Sawona’ Niaku mepa’arla rio sia minena’ matou-tou i ka’ayo Niaku meiy, ni’itu e reiy’ urusannu.” ²⁴ Nisia mouw si murid, si minee kasairian tanume em baya nyi’a yi’i wo si minatikola nyi’a wo kita ta mete’u, kaa eng kasairianna i ti’i e nulit. ²⁵ E lakere’ eng kapualitan-kapualitan walina kasi en siniwo ni Yesus, ta’an sawona’ em baya nyi’a i ti’i e lewo’ sa reiy’ i patikla pengesa-ngesan, takar e wona’ eng kaoatan yi’i e reiy’ mete’u muat em baya eng kitab e lewo’sa reiy’ i patik i ti’i.