1 Tuana mouw em pokeiy ni Yesus. Laa o Sia kuma’ate waki langit wo lumila’ : “ Ama’, mina’ayo mouw e nedona; pelelo’orenola si Oki’-Mu, rio si Oki-Mu si melelo’orela Nikoo. 2 Masuat tanu Nikoo minee mola wia-Nisia eng kuasa wia se reiy’ sa mina’asa matou-tou, tuanakan kangkasi Sia si laa meela em patou-touan kekal witu em baya neiy mouw i wee-Mula wia-Nisia. 3 Nyi’i mouw em patou-touan kekal i ti’i, nyi’a i ti’i kaa nisea se sumine’u Nikoo, si maesa-esa Empung ulit, wo sumine’u si Yesus Kristus si neiy mouw i toke-Mu. 4 Niaku ku limo’orola Nikoo wia em bumi e lalana i te sumampetela em papa’ayangen neiy i wee-Mula wia-Niaku kaa metetuanala nyi’a. 5 Kaa e ni’itu mouw, ya Ama’, pelelo’orenola Niaku wia-Nikoo nuesa ampit eng kalo’oran wia Niaku witu eng hadirat-Mu nu reiy’pe’ eng kaoatan wia. 6 Niaku ku minapaloo’o mola e ngaran-Nu wia em baya ne tou, e neiy-Mu i weela wia-Niaku waki kaoatan. Nisea i ti’i se kapunya’an-Nu wo Nikoo koo minee mola nisea wia-Niaku wo nisea se maki’itouw e nuwu’-Mu. 7 Teakan sea se mete’u, kaa em baya neiy-Mu i weela wia-Niaku i ti’i e nasalna waki-Nikoo. 8 karengan e reiy’ sa mina’asa nuwu’ neiy i pa’ayo-Mula wia-Niaku e neiy mouw i pa’ayo-Kula wia nisea wo nisea se simungkulola nyi’a. Nisea se mete’u makauli-ulit, kaa Niaku ku waki Nikoo o meiy, wo nisea se ma’eman, kaa Nikoo mouw si timokemi Niaku. 9 Niaku ku masombayang i wee nisea. Reiy’ i wee eng kaoatan Niaku masombayang, ta’an i wee nisea, se neiy mouw i wee-Mula wia-Niaku, karengan nisea se kapunya’an-Nu 10 wo e reiy’ sa mina’asa kapunya’an-Ku e nyi’a mouw eng kapunya’an-Nu wo eng kapunya’an-Nu e nyi’a mouw eng kapunya’an-Ku, wo Niaku ku pinelelo’orola witu nisea. 11 Wo Niaku ku reiy’ mouw kasi wia eng kaoatan, ta’an nisea se wiape’ eng kaoatan, wo Niaku ku mineiy wia-Nikoo. Ya Ama’ e kudus, piaranouw sea witu e ngaran-Nu, nyi’a i ti’i e ngaran-Nu e neiy mouw i wee-Mula wia-Niaku, rio sea mamuali esa masuat tanu Nikita. 12 Kaurean Niaku mewali-wali nisea, Niaku ku miara nisea witu e ngaran-Nu, nyi’a i ti’i e ngaran-Nu e neiy mouw i wee-Mula wia-Niaku; Niaku ku timayurola nisea wo reiy’la siesa tou tu’u wia nisea si minapuneng ta’an i te nisia si neiy mouw i tantula laa mapuneng, rio lekepouw e neiy i patik witu eng Kitab Suci. 13 Ta’an teakan, Niaku ku meiy wia-Nikoo wo Niaku ku lumila’la em baya nyi’a yi’i kasuatan Niaku wiape’ eng kaoatan, rio mawuta mouw e mepa’a-pa’ar-Ku witu en tetou nea. 14 Niaku ku minee mola e nuwu’-Mu wia nisea wo eng kaoatan e mari’iris nisea, karengan nisea s reiy’ waki kaoatan, masuat tanu Niaku reiy’ waki kaoatan. 15 Niaku ku reiy’ makiwee, rio Koo medo nisea waki kaoatan, ta’an rio Koo tumerungla nisea wia si lewo’. 16 Nisea se reiy’ waki kaoatan, masuat tanu Niaku reiy’ waki kaoatan. 17 Kudusenola sea witu eng kaulitan; nuwu’-Mu nyi’a mouw eng kaulitan. 18 Masuat tanu Nikoo timoke mouw Niaku wia eng kaoatan, tuana mouw kangkasi Niaku ku timoke mouw nisea wia eng kaoatan; 19 wo Niaku ku kimudusela en tetou-Ku i wee nisea, rio sea tu’u kudusela witu eng kaulitan. 20 Wo reiy’kan i te i wee nisea yi’i kasi Niaku masombayang, ta’an kangkasi i wee se tou-tou, se ma’eman wia-Niaku kaa em paabaran nea; 21 rio sea nu waya se mamuali esa, masuat tanu nikoo, ya Ama’, witu Niaku wo Niaku witu Nikoo, rio nisea kangkasi witu Nikita, rio eng kaoatan ma’eman, kaa Nikoo mouw si timokela Niaku. 22 Wo Niaku ku minee mola wia nisea eng kalo’oran, e neiy i wee-Mula wia-Niaku, rio nisea se mamuali esa, masuat tanu mouw Nikita esa: 23 Niaku witu nisea wo Nikoo witu Niaku rio sea reiy’ si peroan mamuali esa, rio eng kaoatan mete’u, kaa Nikoo si timoke mouw Niaku kaa Nikoo koo meupusla nisea, masuat tanu Nikoo meupusla Niaku. 24 Ya Ama’, Niaku pa’ar rio, wisa tu’u Niaku witu, nisea kangkasi se witu mewali-wali ampit Niaku, nisea se neiy mouw i wee-Mula wia-Niaku, rio sea lumoo’ eng kalo’oran-Ku e neiy mouw i wee-Mula wia-Niaku, karengan Nikoo koo mineupusola Niaku nu reiy’pe’ eng kaoatan siniwola. 25 Ya si Ama’ adil, memang eng kaoatan reiy’ sumine’u Nikoo, wo nisea yi’i se mete’u, kaa Nikoo mouw si timokela Niaku; 26 wo Niaku ku minakite’u mola e ngaran-Nu wia nisea wo Niaku ku laa makite’ula nyi’a, rio e nupus neiy i wee-Mula wia-Niaku witu eng gorem nea wo Niaku ku witu eng gorem nea.”