¹ “Em baya nyi’a yi’i ni’i lila’-Kula wia nikoo, rio kouw te’a oki’ ghenang wo sumede’ Niaku. ² Nikouw kouw laa i sea’la, awesla e laa meiy nedona kaa susur tou si munu’ nikouw si laa mengara-ngarap kaa nisia si masiwo le’os i wee si Empung. ³ Nisea se laa suiwo tuana, karengan nisea se reiy’ makasine’u le’os si Ama’ ka’apa tu’u Niaku. ⁴ a Ta’an em baya nyi’i ni’i lila’-Kula wia nikoo, rio sakawisa meiy e nedona nikouw kouw ghumenang, kaa Niaku ku limila’ mola nyi’a wia nikoo.” 4b “Eng kapualitan yi’i reiy’ neiy Ku i lila’la wia nikoo wakipe’ ketareani, karengan eng kaurean yi’i Niaku ku mewali-walipe’ ampit nikouw, ⁵ Ta’an teakan Niaku ku mea waki Nisia si timoke mouw Niaku, wo reiy’la siesa tou tu’u witu e nelet miouw si minueiy wia-Niaku : Waki wisa em pela’an-Nu? ⁶ Ta’an karengan Niaku ku limila’la eng kapualitan i ti’i wia nikoo, kaa ni’itu e natemu en sinuat mengasi’ ⁷ Ta’anouw e nulit neiy Ku i lila’la yi’i wia nikoo: Sapa tare e lebe wawean penoron wia nikouw, sa Niaku mea, karengan sawona’ Niaku ku reiy’ mea, si Mengengibor i ti’i si reiy’ laa meiy wia nikoo, ta’an sawona’ Niaku ku mea, Niaku ku laa tumoke Nisia wia nikoo. ⁸ Wo sa Sia meiy, Nisia si laa mewewena’asla eng kaoatan witu en dosa, kaulitan wo em paakiman; ⁹ laa en dosa, karengan nisea se minena’ i te reiy’ ma’eman wia-Niaku; ¹⁰ witu eng kaulitan, karengan Niaku ku minea wia si Ama’ wo nikouw kouw reiy’ mouw lumoo’ Niaku kasi; ¹¹ laa em paakiman, karengan se penguasa eng kaoatan yi’i se niukumouw. ¹² 12 Lakere’ kasi eng kapualitan e lewo’ sa reiy’ i lila’-Kula wia nikoo, ta’an teakan kouw reiy’pe’ mete’u mesa’an nyi’a. ¹³ Ta’an sakawisa Sia meiy, nyi’a i ti’i e Roh Kaulitan, Sia si laa ma’aka-aka wia nikouw witu e minapekasa eng kaulitan; karengan Nisia si reiy’ laa menoto-notor waki en tetou-Na nuesa, ta’an e reiy’ sa mina’asa lininga-Na ni’itu mouw e laa i lila’-Nala wo Nisia si laa mabarla wia nikoo eng kapualitan-kapualitan e laa meiy. ¹⁴ Nisia si laa lumo’orela Niaku, karengan nisia si laa mabarla wia nikoo sapa eng kina’atoan-Na wia Niaku. ¹⁵ E reiy’ sa mina’asa punya ni Ama’, nyi’a mouw em punya-Ku; kaa ni’itu mouw Niaku limila’: Sia si laa mabarla wia nikoo sapa eng kina’atoan-Na wia Niaku.” ¹⁶ “Esa nga edo mokan i te wo kouw reiy’ lumoo’ Niaku kasi wo esa nga edo mokan i te kangkasi wo kouw laa lumoo’ Niaku.” ¹⁷ Liminga ni’itu pirala wia se murid-Na limila’ siesa wia se walina : “ Sapa re’en em penoronna Sia lumila’ wia nikita: Esa nga edo mokan i te wo kouw reiy’ lumoo’ Niaku wo esa nga edo mokan i te kangkasi wo kouw laa lumoo’ Niaku? Wo: Niaku minea waki si Ama’? ¹⁸ Takar pokeiy nea : “ Sapa re’en em penoronna Sia limila’ : Esa nga edo mokan i te? Kita ta reiy’ mete’u sapa e maksud-Na.” ¹⁹ Yesus si mete’u, ka anisea se laa mewewueiyela wo’o sapa wia Nisia, laa o Sia lumila’ wia nisea : “ Sapa ku’a kouw minesesusuiyla siesa ampit se walina sapa e neiy Kuilila’la eng ketare, nyi’a i ti’i: Esa nga edo mokan kasi wo kouw reiy’ lumoo’ Niaku wo esa nga edo mokan kangkasi wo kouw laa lumoo’ Niaku? ²⁰ Niaku lumila’me wia nikoo: Kaulitna nikouw kouw laa maame’ wo ma’arip, ta’an eng kaoatan e laa lumaya’; nikouw kouw laa mengasi’, ta’an e mengasi’mu laa melaeng e mamuali mepa’a-pa’ar. ²¹ Siesa wewene si mengasi’ witu e nedo sia nu tumimea’la, ta’an nu reiy’ mouw sia nu timimea’la si oki’na, nisia si reiy’ mouw ghumenangla kasi witu em peme’itanna, karengan eng kelaya-laya’an kaa siesa nga touan si neiy mouw i patoula wia eng kaoatan. ²² Tuanakan kangkasi nikouw teakan kouw sinuat e mengasi’, ta’an Niaku ku laa lumoo’ nikouw kasi wo natemu e laa lumaya’ wo reiy’la siesa tou tu’u si toro kumaat e lelaya’annu i ti’i wia nikoo. ²³ Wo witu e nendo ni’itu kouw reiy’ laa mueiyla sapa-sapa wia-Niaku. Niaku lumila’me wia nikoo: Kaulitna e reiy’ sa mina’asa eng kiniwee miouw wia si Ama’, e laa i wee-Nala wia nikoo witu e ngaran-Ku. ²⁴ I ka’ayomi en teakan kouw reiy’pe’ kimiwee wo’o sapa tu’u witu e ngaran-Ku, Kiweenouw takar kouw laa maka’ato, rio mawuta mouw e mepa’a-pa’armu. ²⁵ Em baya nyi’a i yi’i ni’i lila’-Kula wia nikoo ampit eng kiasan. E laa i ka’ayo e nedona Niaku ku reiy’ kasi mengila-ngila’ wia nikoo ampit eng kiasan, ta’an e makaredeiy ma’abarla si Ama’ wia nikoo. ²⁶ Witu e nendo ni’tu kouw laa sumombayang witu e ngaran-Ku. Wo reiy’ i lila’-Kula wia nikoo, kaa Niaku kumiwee nikoo wia si Ama’, ²⁷ karengan si Ama’ nuesa si meupusela nikouw, karengan nikouw kouw mineupusola Niaku wo ma’eman, kaa Niaku waki si Empung o meiy. ²⁸ Niaku ku waki si Empung o meiy wo Niaku ku mineiy wia eng kaoatan; Niaku ku tumele’ula eng kaoatan kangkasi wo mea waki si Ama’.” ²⁹ Pokeiy ne murid-murid-Na: “Loo’on, teakan Koo makaredeiy mengila-ngila’ wo Nikoo koo reiy’ mepake eng kiasan. ³⁰ Teakan keiy mete’u, kaa Nikoo koo mete’u e reiy’ sa mina’asa wo reiy’ mepadung tou mewewueiy wia-Nikoo. Kaa ni’itu keiy ma’eman, kaa Nikoo koo waki si Empung o meiy.” ³¹ Wingkot ni Yesus wia nisea: “Ma’emanouw ku’a re’en kouw teakan? ³² Loo’on, e nedona mineiy, awes tare e mineiy mouw, kaa nikouw kouw i tabuke’isla siesa o siesa waki tampana nuesa wo nikouw kouw tumele’ula Niaku maesa-esa, ta’anouw Niaku ku reiy’ maesa-esa, karengan si Ama’ si rimapitla Niaku. ³³ Em baya nyi’a i ti’i ni’i lila’-Kula wia nikoo, rio koo maka’ato en damai sejahtera wia Niaku. Wia eng kaoatan kouw peme’itan eng gheghioan, ta’an ente’enola e natemu, Niaku ku kimala mola eng kaoatan.”