En tampa kudus wia em bumi wo waki sorga ¹ Memang en teta’aran kasa ketare-tare kangkasi e makapunya natoran-natoran i wee e raghes wo i wee en tampa kudus en siniwo e lawas ni tou. ² Karengan wawean en tiniro’la e nesa dasing, nyi’a i ti’i e weteng kasa muka wo e witu niatoan e ne’ana en solo wo e meja ampit e roti sesakeiyan. E weteng i yi’i em patotoren tampa kudus. ³ Witu muri em peremel karua niatoan e nesa dasing kasi em patotoren tampa kasa kudus. ⁴ Witu niatoan e mezbah mas patunuan e nukupan, wo en tabut teta’aran, e minapekasana en sino’okep ampit e mas; witu eng gorem en tabut teta’aran i ti’i en tinu’utulan em buli-buli mas pinumpunan e manna, em bewulu’ ni Harun e mekasa mouw sumuru wo e loh-loh watu pinatikan en teta’aran, ⁵ wo witu natas nyi’a e rua kerub kewangko’an en timerungla en songkouw pale’osan. Ta’an eng kapualitan i yi’i e reiy’ mete’u susuiyentala en teakan pengesa-ngesan. ⁶ Tuana mouw eng kenaramenna en tampa kudus i ti’i tinu’utul. Takar se imam-imam se reiy’ siena’na maghorem witu eng gorem en dasing kasa muka i ti’i kaa laa metetuanala e raghes nea, ⁷ ta’an mea witu eng gorem en dasing e karua se Imam Wangko’ i te se toro ghumorem mekasa esa nge te’un, wo e lewo’ sa reiy’ ampit e raa’ neiyna i sempela karengan en touna nuesa wo karengan eng kaselokan-kaselokan, siniwo ne umatna ampit e reiy’ minete’ula. ⁸ Ampit e nyi’i e Roh Kudus e minapaloo’o-loo’ola, kaa e lalan mea waki tampa kudus i ti’i e reiy’pe’ minawuka’, eng keurean en dasing kasa ketare-tare i ti’i em biape’. ⁹ E ni’itu nyi’a mouw en tanula e masa en teakan, Minatoroan ampit e ni’itu neiy i papasempela en tetule wo en sesempe reiy’ mete’u manginreiy’siperoala nisea se simempela nyi’a i ki’it e nate leno nea, ¹⁰ karengan em baya nyi’a i ti’i, reiy’kan i te kekaanen kekoo’on wo e reiy’ sa mina’asa minegheghioan em paoasan, ta’a i te e natoran-natoran kaa laa tumou insani, em paken i te i ka’ayo ma’ayona e nedo paweruan. ¹¹ Ta’an si Kristus si mineiy mouw tanume si Imam Wangko’ i wee eng kapualitan-kapualitan e le’os e laa meiy: Nisia si limeasome en dasing lebe sela wo e lebe reiy’ siperoan, e reiy’ siniwo e lawas ni tou, – em penoronna e reiy’ neiy i kaghorem en siniwo i yi’i, – ¹² wo Nisia si ghimoremola mekasa i wee eng keure-urena mea witu eng gorem en tampa e kudus e reiy’ ampit maali e raa’ ni domba raghar wo e raa’ ni sapi oki’, ta’an ampit e mali en daa’-Na nuesa. Wo ampit e ni’itu Nisia si minaka’ato mouw eng kewaya’an e ke’ekel. ¹³ Karengan, sa en daa’ ni domba raghar wo en daa’ ni sapi raghar wo em pi’ipikan e riawu ni sapi sobor eng kumudusla nisea nu seremor, i ka’ayo sea linenasla eng kenaramen lahiriah, ¹⁴ kumura e lebena en daa’ ni Kristus, karengan e Roh ke’ekel e minapasempe mola en tou-Na nuesa wia si Empung tanume en sesempe reiy’ siwalulang, e laa lumenasla e nate lenas ta witu em pasiwo-siwon e reiy’ sipenoron, rio kita toro rumaghes wia si Empung matou-tou. ¹⁵ Karengan e ni’itu Nisia nyi’a mouw si Pangelet waki e nesa teta’aran e weru, rio nisea se kinakeretanouw se toro sumungkul e weteng ke’ekel neiy i ta’arla, Karengan Nisia si minate mouw kaa laa metetubuus eng kaselokan-kaselokan en tinuana mola eng keurean en teta’aran eng kasa ketare-tare. ¹⁶ Karengan wisa wawean e wasiat, witu e lewo’ sa reiy’ i pakite’ula en tanume em pinatean ni simiwo e wasiat i ti’i. ¹⁷ Karengan e nesa wasiat en tare mouw i te sah, sa si simiwo e wasiat i ti’i si minate mouw, karengan e ni’itu e reiy’ mete’u paken, eng keurean si simiwo e wasiat i ti’i si matou-toupe’. ¹⁸ Ni’itu mouw eng karenganna, takar en teta’aran eng kasa ketare-tare e reiy’ sinahla sa reiy’ ampit en daa’. ¹⁹ Karengan nu reiy’ mouw si Musa nu minakite’ula em baya em perenta e nukum Torat wia se minapekasa umat, nisia si minedo en daa’ ni oki’ ni sapi wo en daa’ ni domba raghar ma’an en dano, wo em bu’uk mea’ wo em pepi’ipik, laa o mi’ipikla eng kaol i ti’i nuesa wo se minapekasa umat, ²⁰ kasuatan limila’: “Nyi’i mouw en daa’ en teta’aran neiy i tantula ni Empung wia nikouw.” ²¹ Wo kangkasi en dasing wo em baya em pakakas i wee e raghes em pini’ipikannala eng kenaramen tuana ampit en daa’. ²² Wo ta’arouw e reiy’ sa mina’asa wo’o sapa e linenasla i ki’it e nukum Torat ampit en daa’, wo reiy’ ampit em patoa’an raa’ e rereiy’la em paampungan. ²³ NI’itu mouw e reiy’ sa mina’asa wo’o sapa e mapasine’ula sapa em baki sorga e lewo’ sa reiy’ mouw lenasen eng kenaramen tuana, ta’an em barang-barang sorgawi nuesa karengan en sesempe-sesempe e lebe le’os ta’an e ni’itu. ²⁴ Karengan si Kristus si reiy’ ghimorem witu eng gorem en tampa kudus en siniwo lawas ni tou en tanu i te e lumian waki kaulitenna, ta’an mea waki ghorem en sorga nuesa kaa laa sumaru witu en sinaru ni Empung i wee em pe’uku-ukumen ta. ²⁵ Wo Nisia si reiy’ ghimorem kaa laa menou-noup mapasempela en tou-Na nuesa, tanu eng kumura se Imam Wangko’ susur en te’un se ghumorem mea witu eng gorem en tampa kudus ampit e raa’ e reiy’ raa’na nuesa. ²⁶ Karengan sa tuana Nisia si lewo’ sa reiy’ menou-noup peme’itan rengane’ eng kaoatan i yi’i siniwola. Ta’an en teakan Nisia si mekasa i te mapaloo’o-loo’ola en tou-Na, wia en zaman kesampetan kaa laa merere’ila en dosa karengan en tetule-Na. ²⁷ Wo masuat tanu sitou neiy i tantula kaa laa mate mekasa i te, wo nu reiy’ mouw i tu si akimen, ²⁸ tuanakan mouw kangkasi si Kristus si mekasa i te tumulela en tou-Na kaa laa tumanggong en dosa ne laker tou. Nu reiy’ mouw i tu Nisia si laa mapaloo’o-loo’ola en tou-Na mekasape’ kasi reiy’ ampit tumanggong en dosa kaa laa ma’anugerahla eng kelawiran wia nisea, se mengena-ngena’la Nisia.