Imam Wangko’ en teta’aran weru ¹ Em be’ina e reiy’ sa mina’asa em pinasusuiytala i ti’i nyi’a mouw: nikita ta makapunya Imam Wangko’ si tuana, si rimuber witu esa nga weka lele’os e reruberan Ni Kasawangko’ waki sorga, ² wo si masempungla e raghes witu en tampa kudus, nyi’a i ti’i witu eng gorem en dasing karengan, neiy i redeiyla ni Tuhan wo e reiy’ ni tou. ³ Karengan susur Imam Wangko’ se neiy i tantula laa mapasempela en tetule wo en sesempe wo eng karengan e ni’itu Yesus si mepadung makapunyala e wo’o sapa kaa laa i pesesempela. ⁴ Sa wona’na Sia wia em bumi i yi’i, Nisia si kasa reiy’ laa mamuali imam, karengan wia nyi’i waweanouw se tou-tou simempela en sesempe i ki’it e nukum Torat. ⁵ Em pasempungan nea nyi’a mouw e lumian wo eng kumalenoan waki sapa em baki sorga, masuat tanu neiy i pakite’ula wia si Musa, eng katoroan nisia nu minereredeiyla en dasing: “Ghenangenouw,” en tuana e nuwu’-Na, “kaa nikoo koo simiwo em baya nyi’a i ti’i i ki’it e nasaran neiy mouw i tudu’la wia nikoo waki atas eng kuntung i ti’i.” ⁶ Ta’an en teakan Nisia si minaka’ato mola e nesa pasempungan e wa’akat lebe wangko’, karengan Nisia si minamuali Paelet waki teta’aran e lebe wangko’, neiy i to’otolela witu en ta’ar e lebe rakek. ⁷ Karengan sawona’na en teta’aran kasa ketare-tare i ti’i e reiy’ siwalulang, e reiy’ mouw laa seron kasi en tampa i wee eng karua. ⁸ Karengan Nisia si timogor nisea eng katoroan Nisia nu limila’: “Eng kaulitna, e laa meiy e nedona,” tuana mouw e nuwu’ ni Tuhan, “Niaku ku laa sumiwola teta’aran weru ampit se kaum Israel wo ampit se kaum Yehuda, ⁹ e reiy’ tanu en teta’aran en siniwo-Ku mola ampit se nene moyang nea, witu e nedo Niaku nu timiboiy e lawas nea kaa laa ma’ali nisea rumo’umi waki tana’ Mesir. Karengan nisea se reiy’ lale’ wia en teta’aran-Ku wo Niaku ku sumede’ nisea,” en tuana e nuwu’ ni Tuhan. ¹⁰ “Takar e nyi’i mouw en teta’aran en siniwo-Kula ampit se kaum Israel nu reiy’ mouw e nedo ni’itu,” en tuana mouw e nuwu’ ni Tuhan. “Niaku ku laa meela e nukum-Ku witu e akal budi nea wo matikla nyi’a witu e nate nea, takar Niaku ku laa mamuali Empung nea wo nisea se laa mamuali umat-Ku. ¹¹ Wo nisea se reiy’ mouw laa mee teturu’ kasi se kasuat wargana, ka’apa se kasuat ne patuarina ampit e limila’la: Sine’unouw si Tuhan! Karengan nisea nu waya, sela o rintek, se laa sumine’u Niaku. ¹² Karengan Niaku ku laa mee en tongkoupusen witu eng kaselokan nea wo reiy’ mouw kasi ghumenang en dosa-dosa nea.” ¹³ Eng karengan Nisia si mengila-ngila’ en tanume en teta’aran e weru, Nisia si minapaloo’o-loo’ola eng kasa ketare-tare si tanume en teta’aran e mina tu’a mouw. Wo sapa e mina tu’a mouw wo e nure mouw, en tawi mouw wia eng kapunenganna.