Kristus wo si Melkisedek ¹ Karengan si Melkisedek nyi’a mouw si raja Salem wo si imam ni Empung Si Kasarakek; nisia si minea sumungkul si Abraham eng katoroan si Abraham nu marengi waki kimalala se raja-raja, wo merkatla nisia. ² Wia nisia tu’u si Abraham si mineela esa nga mapulu’ waki em baya nyi’a. I ki’it em penoron e ngaranna Melkisedek nyi’a mouw si kasa ketare-tare raja eng kaulitan, wo kangkasi si raja Salem, nyi’a i ti’i si raja e le’os eng kale’osan. ³ Nisia si reiy’ meke ama’, si reiy’ maka ina’, si reiy’ maka silsila, e nendona e reiy’ si kinetareani wo em patou-touanna e reiy’ sikinesampetan, wo eng karengan nisia si siniwola masuat ampit si Oki’ ni Empung nisia si minena-ena’ minamuali imam i ka’ayo eng keure-urena. ⁴ Weeanola ghenang kumura eng kewangko’na ni tou i ti’i, wia nisia si Abraham, ama’ ne opo’ ta, si mineela esa nga mapulu’ waki e reiy’ sa mina’asa eng kinaat kasa le’os. ⁵ Wo nisea se waki se oki-oki’ ni Lewi, se minaka’ato en jabatan imam, se minaka’ato lukar, i ki’it e nukum Torat, kaa laa mapurut esa nga mapulu’ wia se umat Israel, nyi’a i ti’i wia se patuari-patuari nea, ma’anouw tu’u nisea i yi’i kangkasi nyi’a mouw se see’ ni Abraham. ⁶ Ta’an si Melkisedek, si reiy’ see’ nea, si mapurut esa nga mapulu wia si Abraham wo maberkatla nisia, ma’anouw tu’u nisia mouw si makapunya en ta’ar. ⁷ Memang e reiy’ mete’u kelongen, kaa si lebe kumeng si berkatela ni lebe rakek. ⁸ Wo wia nyi’i se tou-tou reiy’ ke’ekel se minaka’ato esa nga mapulu, wo maname Nisia, en tanume Nisia wineean kasairian, kaa Nisia si matou-tou. ⁹ Takar en toro mouw i lila’la, kaa ampit e nieletan ni Abraham em pinuruti kangkasi esa nga mapulu’ waki si Lewi, si mekehak maka’ato esa nga mapulu’, ¹⁰ karengan nisia si witupe’ e nouwak ni ama’ ni opo’na, eng katoroan si Melkisedek nu simungkul si ama’ ni opo’na i ti’i. ¹¹ Karengan e ni’itu, sa wona’na karengan e imamat ni Lewi o ka’ayoanola eng kareiy’siperoan – eng karengan e imamat i ti’i se umat Israel se simungkulola en Torat – sapa ku’a re’en eng karenganna mepadunge’ siesa tou walina i tataapla mamuali imam wangko’ i ki’it e natoran ni Melkisedek wo en tanume nisia si reiy’ neiy i lila’la i ki’it e natoran ni Harun? ¹² Karengan, sa wona’na e imamat e masoup, ampit e nuesana e laa masoup kangkasi e nukum Torat i ti’i. ¹³ Karengan Nisia, si neiy i maksutla wia nyi’i, si neiy i kaghorem suku walina; wia se suku i yi’i e reiy’la siesa tou tu’u si mekasa mouw sumempungla waki mezbah. ¹⁴ Karengan eng kinete’uanola em baya ne tou, kaa si Tuhan ta si asal waki se suku Yehuda wo en tanume se suku i ti’i si Musa si reiy’pe’ ma’an mekasa limila’la wo’o sapa tu’u en tanume se imam-imam ¹⁵ Wo eng kapualitan i ti’i e wa’akat lebe pakaloo’o-loo’ola, sa wona’na i tantula siesa imam walina i ki’it eng kenaramen ni Melkisedek, ¹⁶ si mamuali imam si reiy’ tumo’otolela witu e natoran-natoran ni tou, ta’an si tumo’otolela witu em patou-touan e reiy’ mete’u mapuneng. ¹⁷ Karengan en tanume Nisia si wineean kasairian: “Nikoo nyi’a mouw si Imam i wee eng keure-urena, ki’it e natoran ni Melkisedek.” ¹⁸ Memang e nesa ukum neiy i ro’umi eng ketareanna em po’opolela, sa e nukum i ti’i e reiy’ makapunyala kaente’an wo karengan e ni’itu e reiy’ maka ka’ara’an, ¹⁹ – karengan e nukum Torat eng kasa reiy’ maali eng kareiy’siperoan – ta’an en teakan neiy i lentuti em paarapen e lebe le’os, e metetawila nikita wia si Empung. ²⁰ Wo masuat tanu eng kapualitan i yi’i e reiy’ minamuali sa reiy’ ampit en tiwa’ – memang nisea se minamuali mouw imam reiy’ ampit en tiwa’, ²¹ ta’an Nisia ampit en tiwa’, si tinotorla ni Sia si minee nuwu’ wia-Nisia: “Tuhan si timiwa’ mola wo Nisia si reiy’ laa menesel: Nikoo nyi’a mouw si Imam i wee eng keure-urena” – ²² tuanakan kangkasi si Yesus nyi’a mouw si eram waki e nesa teta’aran e lebe ente’. ²³ Wo witu eng kasa ka’asa’an eng kelakerna nisea se minamuali mouw imam, karengan nisea se niape’ ni patean kaa laa mena-ena’ jumabat imam. ²⁴ Ta’an, karengan Nisia si minena-ena’ eng keure-urena, imamat-Na e reiy’ mete’u mera wia se tou walina. ²⁵ Karengan e ni’itu Nisia si makawoo kangkasi lumawirla ampit eng kareiy’siperoan em baya ne tou kaa Nisia se mineiy wia si Empung. Karengan Nisia si matou-tou e reiy’ maena-ena’ kaa laa mamuali Pengelet nea. ²⁶ Karengan si Imam Wangko’ tuana mouw si pemandungentala: nyi’a i ti’i si lale’, reiy’ siselok, reiy’ sisering, si neiy i ketampasi waki se tou-tou makadosa wo si lebe rakek ta’an e ransun-ransun en sorga, ²⁷ si reiy’ tanu se imam-imam wangko’ walina, se susur nendo se lewo’ sa reiy’ mapasempe’la en tetule i wee en dosana nuesa wo nu reiy’ mouw i tu tare mouw i wee en dosa ne umatna, karengan eng kapualitan i ti’i en tinuana-Na mola pinekasa i wee eng keure-urena, eng katoroan Nisia nu minapasempela en tou-Na nuesa tanume en tetule. ²⁸ Karengan e nukum Torat en timantula se tou-tou se lini’iker eng kaleme’an se minamuali Imam Wangko’, ta’an en tiwa’, neiy i totorla kamurian ta’an e nukum Torat, en timantula si Oki’, si minamuali e reiy’siperoan i ka’ayo eng keure-urena.