¹ Karengan e ni’itu meiy mouw kita tumele’ula en to’otolan-to’otolan kasa ketare-tare waki teturu’ en tanume si Kristus wo mera wia eng kapaselana kasa. Te’a mouw kita rumeta’la kasi en to’otolan pakedo’an waki pasiwo-siwon – pasiwo-siwon e reiy’ si penoron, wo en to’otolan ka’emanan wia si Empung, ² nyi’a i ti’i en teturu’ en tanume minegheghioan pebaptisan, pate’upan e lawas, kato’oran ne tou-tou minate wo e nukuman ke’ekel. ³ Wo e ni’itu mouw e laa siwon ta, sa si Empung si miyonla nyi’a. ⁴ Karengan nisea se mekasa mouw tinerangla e natena, se mekasa mouw me’an eng karunia sorgawi, wo se mekasa mouw maka’ato weteng witu e Roh Kudus, ⁵ wo se mine’ani e nuwu’ e le’os waki si Empung wo eng karunia-karunia eng kaoatan e laa meiy, ⁶ ta’anouw se timele’u e neman kasi, se reiy’ wona’na werunela mekasape’ kasi tanu en tuana, i ka’ayo sea makedo’, karengan nisea se simalibla kasi si Oki’ ni Empung i wee en tou nea wo simero’la-Nisia witu en saruan ne kelakeran. ⁷ Karengan en tana’ e mase’esep en dano naro e re’eregh matumpami witu natasna, wo mawua’la en tanemen-tanemen makaka’ara’an wia nisea nu mina’ayangla nyi’a, se minaka’atomi berkat waki si Empung; ⁸ ta’an sa wona’na en tana i ti’i e minua’la kongkom tetunean wo en dukut tetunean, e reiy’ mouw sia makaka’ara’an wo tawi mouw witu eng kutok, eng kimawus ampit em pinatunuan. ⁹ Ta’an, heiy patuari-patuariku i koupus, ma’anouw tu’u keiy lumila’ tuana en tanume nikouw, keiy ma’eman, kaa nikouw kouw makapunya e wo’o sapa lebe le’os, en tima’apung kelawiran. ¹⁰ Karengan si Empung si reiy’ e reiy’ adil, i ka’ayo Sia limiurla em pepa’ayangennu wo nupusmu neiy miouw i papa’atola witu e ngaran-Na kaa em pasempungan niouw wia se tou-tou kudus, em patuanan niouwpe’la i ka’ayomi en teakan. ¹¹ Ta’an nikeiy keiy pa’ar, rio kouw siesa o siesa mapa’atola eng kauli-ulitan e masuat kaa laa mememualila em paarapennu esa kapunya’an en tantu, i ka’ayo wia eng kesampetanna, ¹² rio kouw te’a mamuali kepa’, ta’an mamuali maki’i-ki’it – maki’i-ki’it nisea eng karengan e neman wo eng kasabaaran maka’ato weteng witu en sapa neiy i ta’arla ni Empung. ¹³ Karengan eng katoroan si Empung nu mineela en ta’ar-Na wia si Abraham, Nisia si timiwa’ kaa en tou-Na nuesa, karengan e reiy’la tou si lebe rakek ta’an Nisia, ¹⁴ em pokeiy-Na: “Eng kaulitna Niaku ku laa merkatla nikoo makaloko-lokon wo laa sumiwo nikoo kasa laker.” ¹⁵ Abraham si mina’ena’ ampit en sabaar wo ampit en tuana nisia si minaka’ato sapa neiy i ta’arla wia nisia. ¹⁶ Karengan sitou si tumiwa’ kaa sitou lebe rakek, wo en tiwa’ i ti’i e mamuali esa kate’etepan i wee nisia si kimawusla e reiy’ sa mina’asa peroan. ¹⁷ Karengan e ni’itu, kaa laa lebe mapa’emanla nisea nu mekehak sumungkul en ta’ar i ti’i witu eng katantuan eng katenggolan-Na, Empung si mina’akesola en tou-Na ampit en tiwa’, ¹⁸ rio karengan e rua pakaloo’o-loo’ola e reiy’ masou-soup, en tanume e wisa si Empung si reiy’ wona’na matowo, nikita si masero en teterungan, kita minaka’ato e lelupu kaente’ kaa laa mekeka’apang em paarapen e rimeta’ witu en saruan ta. ¹⁹ Em paarapen i ti’i nyi’a mouw em belangouw kaente’ wo aman i wee si imukur ta, e neiy mouw i suwa’la i ka’ayo mea waki muri em peremel, ²⁰ witu e wisa si Yesus si ghimoremouw tanume si Timani’’ i wee nikita, eng katoroan Nisia, i ki’it e natoran ni Melkisedek, si mamuali Imam Wangko i ka’ayo eng keure-urena.