¹ Karengan susur imam wangko’, se pinelengi waki elet ne tou, neiy i tataapla i wee se tou witu em paato-atoan nea ampit si Empung, rio sia mapasempela en sesempe wo en tetule karengan en dosa. ² Nisia si lewo’ sa reiy’ mete’u mangarti se tou-tou waluiy wo se tou-tou e seip, karengan nisia nuesa si wuta eng kalewea’an, ³ e malewo’sareiy’la nisia kaa laa mapasempela en tetule karengan en dosa, e reiy’ i te i wee se umat, ta’an kangkasi i wee en touna nuesa. ⁴ Wo e reiy’ siesa tou tu’u si medo eng kaorematan i ti’i i wee en touna nuesa, ta’an si kineret ni Empung i wee e ni’itu, tanu e minamuali mola ampit si Harun. ⁵ Tuana mouw kangkasi si Kristus si reiy’ mewangko’la en tou-Na nuesa ampit e mamuali Imam Wangko’, ta’an si winangko’la ni Sia si minee nuwu’ wia-Nisia: “Oki’-Ku Nikoo! Nikoo koo neiy mouw i peurang-Kula wia e nendo i yi’i”, ⁶ tanu eng kumura nuwu’-Na witu e nesa nats walina: “Nikoo nyi’a mouw si Imam i wee eng keure-urena, i ki’it e natoran ni Melkisedek.” ⁷ Witu em patou-touan-Na tanume sitou, Nisia si minapasempe mola en sombayang wo em paaleiyen ampit e rebek wo e nga’angal wia Nisia, si makawoo limawiri-Nisia waki patean, wo karengan eng kelale’an-Na Nisia si lininga mola. ⁸ Wo ma’anouw tu’u Sia nyi’a mouw si Oki’, Nisia si minetete’u mola minamuali lale’ waki sapa em pineme’itan-Na momi ⁹ wo nu treiy’ mouw Nisia nu mina’ayola eng kareiy’siperoan-Na, Nisia si minamuali poong eng kelawiran e ke’ekel i wee em baya ne tou se lale’ wia-Nisia, ¹⁰ wo Nisia si kineret ni Empung minamuali Imam Wangko’, i ki’it e natoran ni Melkisedek. [Nge’enge’ rio te’a tumele’u e neman] ¹¹ En tanume eng kapualitan i ti’i kelaker e lewo’ sa reiy’ i lila’ meiyla, ta’an em pedis laa i pewewelarla, karengan nikouw kouw kepa’ mouw witu eng kapualitan melelingala. ¹² Karengan ma’anouw tu’u kouw, loo’oni waki ruuna e nedo, e lewo’ sa reiy’na mouw mamuali menenuru’, nikouw kouw mepadunge’ kasi turu’unla en to’otolan-to’otolan em poong waki pinapaloo’-loo’an ni Empung, wo nikouw kouw mepadunge’la en susu, e reiy’ kekaanen kete. ¹³ Karengan seiy i te si mepadunge’la en susu nisia si reiy’ mamangartila en teturu’ en tanume eng kaulitan, karengan nisia nyi’a mouw si anakoki. ¹⁴ Ta’an eng kekaanen kete nyi’a mouw i wee se tou-tou sela mouw, eng karengan se makapunyala em pancaindra minelati kaa laa mememange’ala e le’os waki e lewo’.