¹ Karengan e ni’itu, le’osouw kita tumegham, rio te’a wawean tou witu nelet miouw si’i papokeiyla neiy i katele’u, ma’anouw tu’u en ta’ar laa ghumorem mea witu eng gorem e nena’an-Na em pepakene’. ² Karengan wia nikita neiy i abarla kangkasi e nabar mekepa’aren masuat tanu wia nisea, ta’an e nuwu’ i paabaran i ti’i e reiy’ si ka’ara’an i wee nisea, karengan e reiy’ timou mewali-wali karengan e neman ampit nisea se liminga nyi’a ³ Karengan nikita nu maka eman, ta laa ghumorem mea witu en tampa ena’an tanu neiy i lila’-Nala: “I ka’ayo Niaku ku timiwa’ witu e nupi’-Ku: Nisea se reiy’ laa ghumorem mea witu en tampa niena’ang-Ku,” ma’anouw tu’u em pepa’ayangen-Na en simampetouw rengan eng kaoatan siniwola. ⁴ Karengan en tanume e nendo kapitu e mekasa mouw neiy i lila’la witu e nesa nats: “Wo si Empung si minena’ witu e nendo kapitu waki reiy’ sa mina’asa em pepa’ayangen-Na.” ⁵ Wo witu e nats i ti’i e wacan ta: “Nisea se reiy’ laa ghumorem mea witu en tampa niena’ang-Ku.” ⁶ Ni’itu mouw e leno mouw, kaa wawean kelakerna ne tou se laa ghumorem mea witu en tampa niena’an i ti’i, kasuatan nisea e wia nisea lebe ketareanna neiy i abaran e nabar mekepa’aren i ti’i, se reiy’ ghimorem karengan eng kareiy’lale’an nea. ⁷ Karengan e ni’itu Nisia si timataapla kangkasi e nesa nendo, nyi’a i ti’i “e nendo i yi’i”, eng katoroan Nisia nu pira mola eng keure mawee nuwu’ ampit nieletan ni Daud tanu neiy i lila’la witu natas: “Wia nendo i yi’i, sa kouw luminga en totor-Na, te’a mouw i pekeketenla natemu!” ⁸ Karengan, sa wona’na si Yosua si minali mola nisea ghimorem mea witu en tampa niena’an, tantu mouw si Empung si reiy’ laa mengila-ngila’ kamurian en tanume e nesa endo walina. ⁹ Ni’itu mouw en timiro’pe’ e nesa endo ena’an, e nendo kapitu, i wee se umat ni Empung. ¹⁰ Karengan seiy i te si ghimoremouw mea waki tampa niena’an-Na, nisia nuesa si minena’ momi waki e reiy’ sa mina’asa em pepa’ayangenna, masuat tanu si Empung minena’mi waki pepa’ayangen-Na. ¹¹ Karengan e ni’itu le’osouw kita me’inakut kaa laa ghumorem mea witu eng gorem e niena’an i ti’i, rio te’a siesa tou tu’u si’i kawolon karengan kimi’itla e nasaran eng kareiy’lale’an i ti’i kangkasi. ¹² Karengan e nuwu’ ni Empung e matou-tou wo nente’ wo e lebe tarem ta’an en santi makaweren rua wisa i te tu’u; sia si matude’ kasa ghorem i ka’ayo tuma’atasla si imukur wo e roh, em buku-wukuna wo em be’enek; sia si makawoo mememange’anla em pemili-milingen wo eng genang e nate ta. ¹³ Wo reiy’la siesa makhluk tu’u si neiy i kakirong witu en sinaru-Na, karengan e reiy’ sa mina’asa wo’o sapa em poteiy wo neiy i kawuka’ witu en sinaru em beren-Na, e wia-Nisia kita lewo’ sa reiy’ meela e wewingkotna. ¹⁴ Karengan nikita en teakan kita makapunyala si Imam Wangko’ Kewangko’, si limeasome em baya e langit, nyi’a i ti’i si Yesus, Oki’ ni Empung, le’osouw kita te’etep tumiboiy witu em paakuan e neman ta. ¹⁵ Karengan si Imam Wangko’ punya ta, si reiy’ mouw i te imam wangko’ reiy’ mete’u kumi’it me’anla eng kalewea’an-kalewea’an ta, eng kapurikitna si masuat ampit nikita, Nisia si wina’awa’anola, ta’an i te si reiy’ simiwo en dosa. ¹⁶ Karengan e ni’itu meiy mouw kita ampit wuta eng kaberanian kita tumawila e reruberan e nupus karunia, rio kita maka’ato e nupus o rendem wo matola e nupus karunia kaa laa maka’ato e na’ale’an ta witu nedona.