Yesus si lebe rakek ta’an si Musa ¹ Karengan e ni’itu, heiy patuari-patuari e kudus, se minaka’ato weteng witu em pakeretan sorgawi, tumu’usouw wia si Rasul wo si Imam Wangko’ paakun tala, nyi’a i ti’i si Yesus, ² si lale’ wia Nisia si timataapola-Nisia, tanu eng kumura si Musa tu’u si lale’ witu se pakasa’an em bale-Na. ³ Karengan Nisia si paloo’on waar maka’ato eng kewangko’an lebe wangko’ ta’an si Musa, masuat tanu si kasasigha’ em bangunan si lebe pasighi’in ta’an em bale siniwona. ⁴ Karengan susur em bale neiy i redeiy niesa tou kasasigha’ em bangunan, ta’an si kasasigha’ em bangunan e reiy’ sa mina’asa wo’o sapa nyi’a mouw si Empung. ⁵ Wo si Musa si memang lale’ witu se pakasa’an em bale ni Empung tanume si sumesempung kaa laa mee kasairian en tanume en sapa e laa i abarla kamurian, ⁶ ta’an si Kristus si lale’ tanume si Oki’ mekapalala em bale-Na; wo em bale-Na nyi’a mouw nikita, sa kita i ka’ayola witu eng kesampetanna o ta te’etep timiboiy witu em pa’emanen wo em paarapen ni’i pesawa’ tala. ⁷ Karengan e ni’itu, tanu neiy i lila’la e Roh Kudus: “Wia nendo i yi’i, sa kouw luminga en totor-Na, ⁸ te’a mouw pekeketen e natemu tanu witu eng kaupi’an witu e nedo pewa’awa’an waki patar kaerisan, ⁹ witu e wisa se nene moyangmu mina’awa’la Niaku ampit e lalan mewewa’awa’ Niaku, ma’anouw tu’u sea limoo’ em pasiwo-siwon – pasiwo-siwongKu, e nepat nga pulu’ nge te’un eng keurena. ¹⁰ Ni’itu mouw eng karenganna Niaku ku moupi’ wia se makateper i ti’i, wo lumila’: Reiy’ sea seip ate, wo nisea se reiy’ sumine’u e lalan-Ku, ¹¹ i ka’ayo Aku timiwa’ witu eng kaupi’ang-Ku: Nisea se reiy’ laa ghumorem mea witu en tampa niena’ang-Ku.” ¹² Mategha-teghamouw, heiy patuari waya, rio witu nelet miouw te’a ka’atoan siesa tou e natena e lewo’ wo si reiy’ ma’eman eng karengan nisia si timele’umi e neman waki si Empung matou-tou. ¹³ Ta’an nge’enge’anola siesa wia se walina susur e nendo, eng keurean torope’ ni’i lila’la “nendo i yi’i”, rio te’a wawean witu nelet miouw si minakete natena karengan e le’ekok wiles en dosa. ¹⁴ Karengan nikita ta minaka’ato mola weteng witu si Kristus, asal i te kita te’etep tumiboiy i ka’ayo wia eng kesampetanna witu eng ka’emanan e neman ta eng ketarena. ¹⁵ Ta’an sakawisa e mekasa mouw i lila’la: “Wia nendo i yi’i, sa kouw luminga en totor-Na, te’a mouw pekeketenla e natemu tanu witu eng kaupi’an”, ¹⁶ Seiy ku’a re’en nisea se timo’ori eng kaupi’an ni Empung, ma’anouw tu’u sea liminga en totor-Na? E reiy’ ku’a re’en nisea nu waya se rimo’umi waki Mesir witu em pa’aka-aka’an ni Musa? ¹⁷ Wo seiy ku’a re’en si neiy i kakeupi’-Nala epat nga pulu’ ngete’un eng keurena? E reiy’ ku’a re’en nisea se simiwo en dosa wo e mayat nea e mineteta’ateran waki patar kaerisan? ¹⁸ Wo seiy ku’a re’en si neiy mouw i tiwa’-Nala, kaa nisea se reiy’ laa ghumorem mea waki tampa niena’an-Na? E reiy’ ku’a re’en nisea se reiy’ lale’? ¹⁹ Tuana mouw kita lumoo’, kaa nisea se reiy’ mete’u ghumorem eng karengan e reiy’ kapa’emanan nea.