Eng kelawiran e wangko’ ¹ Karengan e ni’itu e lewo’ sa reiy’ lebe maato-ato kita mawee ghenangla sapa e lininga ta mola, rio kita te’a i ayur alin en so’oso’. ² Karengan sa e nuwu’ neiy i lila’la ampit e nieletan ne malaikat-malaikat e minena-ena’ pepaken, wo susur eng kaselokan wo eng kareiy’lale’an e maka’ato sesuli’ kewaarna, ³ kumura ku’a re’en o kita laa i kaliseiyi, sa wona’na kita meghio-ghiola eng kelawiran kaselana i ti’i, eng ketare-tarena neiy i abarla ni Tuhan wo nisea se liminga mola nyi’a, wia nikita ampit eng kenaramen toro emanela, kasuatan ⁴ Empung si time’etepla eng kasairian nea karengan eng kowa’-kowa’ wo e maka’erangen-maka’erangen wo karengan e mineghio-ghioan em pinapaloo-loo’an eng kakuwasa’an wo eng karunia e Roh Kudus, em pinemete-meteng-Nala i ki’it eng kepa’aran-Na. ⁵ Karengan e reiy’ wia se malaikat-malaikat o neiy mouw i tu’utuk-Nala eng kaoatan e laa meiy, em pasusuiyentala i yi’i. ⁶ Wawean tou si mekasa mouw mee kasairian witu e nesa nats, em pokeiyna: “Sapa ku’a re’en sitou, i ka’ayo Koo maghenang nisia, ka’apa oki’ ni tou, i ka’ayo Koo mepadungla nisia? ⁷ Ta’anouw Nikoo koo simiwo mola nisia i wee e nedo potot oki’ lebe kumeng ta’an se malaikat-malaikat, wo minahkota mola nisea ampit eng kewangko’an wo en sighi’, ⁸ e reiy’ sa mina’asa wo’o sapa e neiy-Mu mouw i tu’utukla witu e wawa’ e ne’a-Na.” Karengan witu metetu’utukla e reiy’ sa mina’asa wo’o sapa wia-Nisia, reiy’la e nesa tu’u neiy i kawi-Nala, o reiy’ tu’utuk wia-Nisia. Ta’an en teakan i yi’i e reiy’pe’ linoo’ ta, kaa e reiy’ sa mina’asa wo’o sapa e neiy mouw i tu’utukla wia-Nisia. ⁹ Ta’an Nisia, i wee e nedo potot si siniwo oki’ lebe kumeng ta’an se malaikat-malaikat, nyi’a i ti’i si Yesus, loo’on ta, eng karengan em peme’itan em patean, si minahkota’ala ampit eng kewangko’an wo en sighi’, rio karengan e nupus karunia ni Empung Nisia si me’anla em patean i wee em baya ne tou. ¹⁰ Karengan e memang minatoroan ampit eng ka’ada’an ni Empung – e niwee-Nisia wo karengan-Nisia e reiy’ sa mina’asa wo’o sapa en siniwola –, nyi’a i ti’i Empung si minaali kelaker tou wia eng kewangko’an, o kangkasi minanginreiy’siperoanla si Yesus, si mina’akala nisea witu eng kelawiran, ampit em peme’itan. ¹¹ Karengan Nisia si kimudusla wo nisea se kinudusla, nisea nu waya se asal waki si Esa; ni’itu mouw eng karenganna Nisia si reiy’ meirang matotorla nisea patuari, ¹² em pokeiy-Na: “Niaku ku laa mabarla e ngaran-Nu wia se patuari-patuari-Ku, wo melo’o-lo’or Nikoo witu eng keuneran ne jema’at,” ¹³ wo kasi: “Niaku ku laa meela ka’emanan wia-Nisia,” Wo kasi: “Eng kaulitna, i yi’i mouw Niaku wo se oki-oki’ neiy mouw i weela ni Empung wia-Niaku.” ¹⁴ Karengan se oki-oki’ i ti’i nyi’a mouw se oki-oki’ waki raa’ wo le’ona, takar Nisia kangkasi si minamuali masuat ampit nisea wo si minaka’ato weteng witu eng ka’ada’an nea, rio karengan eng kinepatean-Na Sia munengla nisia, nyi’a i ti’i si Iblis, si makuwasa witu em patean; ¹⁵ wo rio ampit e lalan tuana Nisia si mayala nisea se esa nga umur em patou-touan nea se witu eng gorem em pehamba’an eng karengan e nide’na witu em patean. ¹⁶ Karengan eng kaulitna, e reiy’ se malaikat-malaikat se i koupus-Nala, ta’an se see’ ni Abraham se i pakeupus-Nala. ¹⁷ Ni’itu mouw eng karenganna, takar witu e reiy’ sa mina’asa kapualitan Nisia si lewo’ sa reiy’ i pasuatela ampit se patuari-patuari-Na, rio Sia mamuali Imam Wangko’ si minee en tongkoupusen wo si lale’ wia si Empung kaa laa melele’osela en dosa ne minapekasa bangsa. ¹⁸ Eng karengan Nisia nuesa si pineme’itanola karengan em pewa’awa’an, takar Sia toro male’ nisea se wina’awa’ala.