Empung minee nuwu’ ampit nieletan ni Oki’-Na ¹ Nu reiy’ mouw witu en zaman eng ketareanna Empung si minenou-noupouw wo witu e reiy’ sa mina’asa eng kenaramen simusuiy wia se nene moyang ta ampit em pinaeletan ne nabi-nabi, ² takar wia en zaman kesampetan i yi’i Nisia si masusuiy mola wia nikita ampit e nieletan ni Oki’-Na, si neiy mouw i tataap-Nala tanume si mekehak sumungkul e reiy’ sa mina’asa em bia. Karengan Nisia Empung si simiwo mola eng kaoatan minapekasana. ³ Nisia nyi’a mouw si sena’ eng kewangko’an ni Empung wo lumian e nasar si Empung wo timobol e reiy’ sa mina’asa em bia ampit e nuwu’-Na wuta eng kakuwasa’an. Wo Nisia nu simampetouw timuanala em palenasan en dosa, Sia rumuber witu esa nga weka lele’os Ni Kasawangko’, waki tampa rakek, ⁴ e wa’akat lebe rakek ta’an se malaikat-malaikat, masuat tanu e ngaran neiy i karuniala wia-Nisia e wa’akat lebe wangun ta’an e ngaran nea. Oki’ ni Empung si lebe rakek ta’an se malaikat-malaikat ⁵ Karengan wia si seiy ku’a re’en witu e nelet ne malaikat-malaikat i ti’i e mekasa mouw Sia lumila’la: “Oki’-Ku Nikoo! Nikoo koo neiy mouw i peurang-Kula wia e nendo i yi’i?” wo “Niaku ku laa mamuali Ama’-Na, wo Nisia si laa mamuali Oki’-Ku?” ⁶ Wo eng katoroan Nisia nu mali kasi si Oki’-Na si polon meiy wia eng kaoatan, Nisia si limila’: “Em baya ne malaikat ni Empung se lewo’ sa reiy’ sumempe Nisia.” ⁷ Wo en tanume se malaikat-malaikat Nisia si limila’: “En simiwo se malaikat-malaikat-Na minamuali reghes tumokol wo se sumesempung-sumesempung-Na minamuali layas e napi.” ⁸ Ta’an en tanume si Oki’ Nisia si limila’: “Reruberan-Nu, ee Empung, en tataap i wee e mapawee-weena wo eng keurena, wo e wulu’ eng karaja’an-Nu nyi’a mouw e wulu’ eng kaulitan. ⁹ Nikoo koo meupusla eng ka’adilan wo mari’iris eng kawurukan; karengan e ni’itu si Empung, Empung-Mu si minisu’ mola Nikoo ampit e lana tanume eng kowa’ kepa’aran, e limantouwla se ka’ampit-ka’ampit kaasa-Mu.” ¹⁰ Wo: “witu eng ketareanna, ee Tuhan, Nikoo koo rimeta’ mola en to’otolan em bumi, wo e langit nyi’a mouw en siniwo e lawas-Mu. ¹¹ Em baya nyi’a i ti’i e laa mapuneng, ta’an Nikoo koo minena-ena’ wia, wo em baya nyi’a i ti’i e laa mamuali ure tanu e labung; ¹² tanu eng karaiy Koo laa lumangkunla nisea, wo tanu em pematimea’an nisea laa soupen, ta’an Nikoo koo minena-ena’ masuat, wo en te’un-te’un-Nu e reiy’ sikinesampetan.” ¹³ Wo wia si seiy ku’a re’en witu nelet ne malaikat i ti’i e mekasa mouw Sia lumila’: “Rumuberouw witu esa nga weka lele’os-Ku, i ka’ayo siwong-Ku se kesaru-kesaru-Mu mamuali kontoiyan e ne’a-Mu?” ¹⁴ E reiy’ ku’a re’en nisea nu waya nyi’a mouw se roh-roh masempungla, se neiy i toke kaa laa mesesempungla nisea nu lewo’ sa reiy’ maka’ato kelawiran?