Sesempe e reiy’ siperoan ¹ Witu eng gorem e nukum Torat niatoan eng kumalenoan i te waki kelawiran e laa meiy, wo e reiy’ kaulitan waki kelawiran i ti’i nuesa. Karengan e ni’itu ampit en tetule masuat, susur en te’un e reiy’ maena-ena’na ni’i pasempela, e nukum Torat e reiy’ wona’na manginreiy’siperoanla nisea se mineiy medo weteng witu eng gorem nyi’a. ² Karengan sa eng kapualitan i ti’i e wona’na, tantu sitou si reiy’ mouw mapasempela en tetule kasi, karengan nisea se timuanala e raghes i ti’i se reiy’ mouw mete’ula kasi en dosa nu reiy’ mouw nu linenasla mekasa i wee eng keure-urena. ³ Ta’an awes tare karengan en tetule-tetule i ti’i susur en te’un se tou se ngine’enge’anla laa waweanna en dosa. ⁴ Karengan e reiy’ wona’na e raa’ ni sapi raghar ka’apa e raa’ ni domba raghar e rume’ila en dosa. ⁵ Karengan e ni’itu eng katoroan Nisia nu ghimorem meiy wia eng kaoatan, Nisia si limila: “En tetule wo en sesempe reiy’ i kepa’ar-Mula – ta’an Nikoo koo timiro’ mola e nouwak i wee niaku – ⁶ Wia en tetule tinunu wo en tetule pare’i en dosa Nikoo koo reiy’ minepa’ar. ⁷ Laa o Ku lumila’: E nulit, Niaku ku mineiy; witu langkunan eng kaol wawean neiy’ i kepatik en tanume Niaku kaa laa metetuanala eng kepa’aran-Nu, ee Empung-Ku.” ⁸ Witu natas Nisia si limila’: “Tetule wo en sesempe, tetule tinunu wo en tetule pare’i en dosa e reiy’ i kepa’ar-Mula wo Nikoo koo reiy’ mepa’ar wia nyi’a” – ma’anouw tu’u neiy i sempela i ki’it e nukum Torat –. ⁹ Wo kamurian em pokeiy-Na: “E nulit, Niaku ku mineiy kaa meiy metetuanala eng kepa’aran-Nu.” Eng kasa ketare-tare e rine’i-Nala, rio malinto’orla eng karua. ¹⁰ Wo karengan eng kepa’aran-Na i yi’i mouw kita kinudusola mekasa i wee eng keure-urena karengan en sesempe nouwak ni Yesus Kristus. ¹¹ Tumodongla nyi’a susur imam se tumuanala susur e nendo em pasempunganna wo meneu-neup mapasempela en tetule e masuat, eng kasa reiy’ mete’u rume’ila en dosa. ¹² Ta’an Nisia, nu reiy’ moiuw e minapasempela esa i te tetule karengan en dosa, Sia rumuber i wee eng keure-urena witu esa nga weka lele’os ni Empung, ¹³ wo en teakan Nisia si mengena-ngena’ mokan e nedona, witu e wisa se kesaru-kesaru-Na se laa siwonla kontoiyan e ne’a-Na. ¹⁴ Karengan kaa siesa tetule i te Nisia si minangin-reiy’siperoanola i wee eng keure-urena nisea se kinudus-Nala. ¹⁵ Wo en tanume eng kapualitan i ti’i e Roh Kudus kangkasi e minee kasairian wia nikita, ¹⁶ karengan nu reiy’ mouw Nisia nu minee nuwu’: “Nyi’i mouw en teta’aran e laa Ku siwonla ampit nisea nu reiy’ mouw e nedo ni’itu,” Sia mee nuwu’ kasi: “Niaku ku laa rumeta’ e nukum-Ku witu eng gorem e nate nea wo matikla nyi’a witu e akal budi nea, ¹⁷ wo Niaku ku reiy’ mouw kasi ghimenang en dosa-dosa wo eng kaselokan nea.” ¹⁸ Ni’itu mouw sakawisa i wee em baya nyi’a i ti’i em bawean paampungan, e reiy’ mouw padungen kasi i sempela en tetule karengan en dosa. ¹⁹ Ni’itu mouw, ee patuari waya, karengan en daa’ ni Yesus nikita en teakan ta wuta eng kaberanian o toro ghumorem mea witu eng gorem en tampa kudus, ²⁰ karengan Nisia si minuka’ mola lalan e weru wo si timou i wee nikita timoromi em peremel, nyi’a i ti’i en tou-Na nuesa, ²¹ wo nikita ta makapunyala siesa Imam Wangko’ tanume si kokong e Wale ni Empung. ²² Karengan e ni’itu meiy mouw kita sumaru si Empung ampit e nate kasa uli-ulit wo eng ka’emanan e neman e te’etep, eng karengan e nate ta em bineresi momi waki ate e lewo’ wo e nouwak ta e nioasanouw ampit en dano lenas. ²³ Meiy mouw kita te’etep tumiboiy witu em paakuan en tanume em paarapen ta, karengan Nisia, si tima’arla nyi’a, si lale’. ²⁴ Wo meiy mouw kita meweweean ghenangla rio kita melelupuan witu e nupus wo witu em pepa’ayangen le’os. ²⁵ Te’a mouw kita mewewa’akti en tou waki pinasungkulan – pinasungkulan e raghes ta, tanu neiy i naramla ne pirala tou, ta’an meiy mouw kita mengenge’enge’an wo makalingkama’la matuanala nyi’a melelaa e nendo ni Tuhan e metawimi. ²⁶ Karengan sa kita tumu’utu’ sumiwo en dosa, nu minaka’ato mola en tine’u en tanume eng kaulitan, takar e reiy’ mola kasi en tetule kaa laa i perere’i en dosa i ti’i. ²⁷ Ta’an em bia nyi’a mouw em patean mekeide’en lumaa em paakiman wo e napi kasa hebat e laa rumengisla em baya ne tou lewo’. ²⁸ Sa wawean tou si masede’ e nukum ni Musa, nisia si ukumen paten reiy’ ampit en tongkoupusen witu e lelila’an ne rua ka’apa telu tou sairi. ²⁹ Kumura lebe wuterna e nukuman e lewo’ sa reiy’ i weela witu nisia, si mele’e-le’ek si Oki’ ni Empung, si mapokeiyla seremor e raa’ teta’aran kimudusla nisia, wo si masero’ e Roh nupus karunia? ³⁰ Karengan nikita ta sumine’u Nisia si limila’: “Sesuli’an nyi’a mouw eng hak-Ku. Niaku mouw si laa kume’i en sesuli’an.” Wo kasi: “Tuhan si laa makimla se umat-Na.” ³¹ Mekeide’en ulit, sa i ka’anu mea witu eng gorem e lawas ni Empung matou-tou. ³² Ghenangenola e masa limangkoiyla. Nu reiy’ mouw nikouw nu simungkul en terang, nikouw kouw laker pineme’itan eng karengan nikouw kouw timaang witu em pe’inakutan e wuter, ³³ le’os e nedo nikouw nu siniwola pa’aton karengan en sesero’an wo em peme’itan ka’apa tu’u witu e nedo nikouw nu minedo weteng witu em peme’itan nea se pinatuanala eng katuanana. ³⁴ Memang nikouw kouw kimi’itola minedo weteng witu em peme’itan ne tou-tou ukuman wo eng katoroan em budel miouw eng kinaat, nikouw kouw simungkul eng kapualitan i ti’i ampit e mepa’a-pa’ar, karengan nikouw kouw mete’u, kaa nikouw kouw makapunyala em budel e lebe le’os wo e lebe timataap en sifatna. ³⁵ Karengan e ni’itu te’a mouw kouw mewewayala eng ka’emanannu, karengan wangko’ en tetoro e ma’ena’ nyi’a. ³⁶ Karengan nikouw kouw mepadungla eng katenteman, rio nu reiy’ mouw nikouw nu tumuanala eng kepa’aran ni Empung, kouw maka’ato sapa neiy i ta’arla i ti’i. ³⁷ “Karengan en toyo’, awes tare eng kasa toyo’ e nedo kasi, wo Nisia si laa ma’eiy, si mawia mouw, reiy’ ampit meleodokla eng ke’e eiy-Na. ³⁸ Ta’an se tou-Ku se ulit se laa tumou karengan e neman, wo sakawisa sia rumou’mi en tou, takar Niaku ku reiy’ mepa’ar wia nisia.” ³⁹ Ta’an nikita e reiy’ mouw se tou-tou se rimou’mi en tou wo mapuneng, ta’an se tou-tou ma’eman wo se minaka’ato em patou-touan.