9
1
मे़म्दीङ् नो:था येसु रोबोदी ओ:तामेको़ हाम्बाला लाम्तामे, को़दीङ् आम्द आनी सहर्दी राम्तामे।
2
मु़रु़द:मी कङ् पक्छेघात् दु़म्आ मु़रु़लाई खाट्दी ईम्पा:ना आम्द:केदी रा:तामे, येसुमी मे़म्द:मी रे़प्तामेम् ताम्तामेको़ रु़:आ मु़रु़लाई मो़:तामे, "तावा, आँट् पाओ़। ईसाम्से तील्स्ता।"
3
मुलु चे़न्आद:दीम् गेसोमी आनीदबदी दा:तामे, "ए़म्चामी पर्मेस्वर्लाई सुवा जे:सोङ् ब:।"
4
येसुमी मे़म्द:के मीम्खा तु़त्तामेको़ मे़म्द:लाई मो़:तामे, "गो़नीमी ईनी ग्वादी दुस्ट मीम्खा माराङ् पानी?"
5
माराङ्खेदा, मारा पा:चो सजीलो ब: 'ईके साम्से तील्स्ता' दा:चो खी 'बो़को़ को़दीङ् गको़' दा:चो?'
6
खेदायो मु़रु़के तावालाई चे़ङ्माखोदी साम्से तील्चोम् हक् ब: दा:सो गो़नी तु़:तीने।" मेत्तीको़ आम्द:मी मे़म् पक्छेघात् दु़म्आलाई मो़:तामे, "बो़को़, ईओछे़न् कु़रो़को़ खीम् लाओ़।"
7
मेत्तीको़ मे़म् बोक्ताको़ आखीम् लाता।
8
भीड्मी मे़म् ताप्ता, मेत्तीको़ मे़म्द ङी:तामे, को़दीङ् मु़रु़द:लाई ओ़खो़म् सा: गीआ पर्मेस्वर्के महीमा पाम्तामे।
9
येसु मेकेदीङ् लाम्तामेना मत्ती दा:ना कङ् मु़रु़लाई तीरो पोक्चोम् टेबल्दी नी:सीआ ताम्तामे, को़दीङ् मे़म्लाई मो़:तामे, "गुनुङ् गको़," मेत्तीको़ मे़म् बोक्ताको़ आम्द:नुङ् गक्ता।
10
आम्द जाथा नीस्तामेना हक्सीङ् तीरो पोक्आद नुङ् साम्सेचाद राम्तामेको़ येसु नुङ् आनी चे:लाद:नुङ् जाचो जाथा नीस्तामे।
11
गे़ना फरीसीद:मी मे़म्ताम्तामे, मेत्तीको़ आनी चे:लाद:लाई मो़:तामे, "माराङ् ईनी गुरु तीरो पोक्आद को़दीङ् साम्सेचाद:नुङ् जामेम्?”
12
ए़म् आम्द:मी ङीन्तामेको़ दा:तामे, "आलामोमी मासीक्आलाई बईदे चाईमा:दु़म्, खेदायो सीक्आलाई दु़म्।
13
खेदायो ए़म् लो: लानेको गो़नी चे़ईसीने: 'गु जार्चोम् माआ, सीस्को:को पा:आ चाईपाङा। मेत्तीको़ माराङ् गु ए़म् दा:तीम् हो खेदा गु धर्मीद:लाई माआ, साम्सेचाद:लाई ब्रेत्था रातीम् हो।”
14
मेत्तीको़ युहन्नाके चे:लाद आनीकेदी राम्तामे, को़दीङ् आम्द:लाई हीलो पाम्तामे, "माराङ् गुकु नुङ् फरीसीद उपास् बक्का, खेदायो ईनी चे:लाद उपास् माब:मे?"
15
येसुमी मे़म्द:लाई मो़:तामे, "गे़नासम्म बेउला जन्तीद:नुङ् ब: मारा मे़म्द:मी सोक् पामे ङा? खेदायो मे़म् नाम्ती रा:, गे़ना बेउला मे़म्द:दीङ् लामे:, मेत्तीको़ मे़म्द उपास् ब:मे।
16
"सु़मीयो आमाईसाम् वा:दी आनीन्ता टा:लो टा:ले मापावा। माराङ्खेदा आनीन्ता टा:लोमी वा: चीदा, को़दीङ् वा: झन् जी:।
17
सु़मीयो आमाईसाम् कोक्तेके तुम्बीदी आनीन्ता अङ्गुर् ळ:कु़ मा:जु़ल्, मा:खेदा तुम्बी चीदा, को़दीङ् अङ्गुर् ळ:कु़ लुङ्से को़दीङ् तुम्बी पीलुक्ची ला:। खेदायो आनीन्ता अङ्गुर् ळ:कु़ आनीन्ताङ् कोक्तेके तुम्बीदी जु़ल्याना नीम्फोङ् जोगेदु़म्से।
18
ए़म् लो:द येसुमी मे़म्द:लाई मो:सोङ् बक्तामे, मुलुखीम् दीम् कङ् सासन् पाआ राता, को़दीङ् आम्द:लाई सेवा चन्सो दा:ता, "अतामी अखनाङ् बे़क्ता, खेदायो रानेको़ मे़म् त:रे ईनी गु़ जु़ल्तीगीने, को़दीङ् मे़म् लीङ्से।
19
येसु बोक्तामे, को़दीङ् आनी चे:लाद:नुङ् मे़म् मु़रु़के आनो:था नो:था लाम्तामे।
20
मखना कदे़म् नीक्सी थोचेदीङ् हु़सी लाआ आलामोमी सीक्आ कङ् मीन्चामी आनी नो:थालाङ् पीताको़ आनी वा:के आफु़र्का खु़त्ता।
21
माराङ्खेदा मे़म्चामी आग्वादी मीम्स्ताम् बक्ता, "गु आनी वा: मत्तई खु:तु खेदा यो गु नु़ईवार्दु।"
22
येसुमी घङ् ले:तामेको़ को:तामेना मे़म् मीन्चालाई ताम्तामे, को़दीङ् दा:तामे, "तामी, आँट् पाओ़, गो़ रे़प्तीम्चामी गो़ नु़तेम् ब:।" मे़म् मीन्चा मखनाङ् नु़ईवार्ता।
23
मेत्तीको़ येसु सासन् पाआके खीम्दी झक्राम्तामे, आम्द:मी बाँसुरी ताब्ळाद नुङ् भीड्मी से़गासे़गा पासोङ् बक्आ ताम्तामे।
24
आम्द:मी मे़म्द:लाई मो़:तामे, "आ:तोला लाने, माराङ्खेदा मीन्चा बे़क्आ मा:बो, खेदायो ईप्ळा ब:।" मे़म्द:मी आम्द:लाई रीत्तामे।
25
भीड्द:लाई आ:तोला घ्लुन्सोमामी आम्द आ:घोला ओ:तामे, को़दीङ् मे़म् मीन्चाके आगु़ झात्तामे, को़दीङ् मे़म् मीन्चा हु़:बोक्ता।
26
मेत्तीको़ ए़म् तेके लो: मे़म् दे़ल्भरी फु़स्ता।
27
येसु मेकेदीङ् लाम्तामेना नीक्सी काती-माताआ द:सी आनी नो:था नो:था लातासे को़दीङ् ब्रे:तासे, "ए दाउद्के तावा, गुसुलाई सीस्को:को पा:तीसीनी।"
28
आम्द मे़म् खीम्दी ओ:तामेको़दीङ् काती माताआ नीक्सी मु़रु़द:सी आनीकेदी रातासे। येसुमी मे़म्द:सीलाई मो़:तामे, "गु ए़म् पाने चाबु दा:सो गो़सी रे़प्तीसी?" मे़म्द:सीमी आम्द:लाई मो़:तासे, "हजुर् प्रभु।"
29
मेत्तीको़ आम्द:मी मे़म्द:सीके आसी मीची खु:सोङ् मो़:तामे, "गो़सी रे़प्तीसीम् खो़ङ् गो़सीलाई दु़म्ला।"
30
को़दीङ् मे़म्द:सीके आसी मीची होङ्स्ता। येसुमी ओ़खो़ दा:सोङ् मे़म्द:सीलाई आरे पाम्तामे, "ए़म् लो: सु़मीयो था: मातावाला।"
31
खेदायो मे़म्द:सी लातासे, को़दीङ् मे़म् वालेकोभरी आनी तेके लो: फु़:तासे।
32
आम्द घ्लु:तामेको़ लासोङ् बक्तामे, भुत्मी सीक्आ कङ् ला:टा मु़रु़ आम्द:केदी रा:तामे।
33
भुत् घ्लु़न्ती गीम्तामेको़दीङ् मे़म् ला:टा ळक्ता। मेत्तीको़ "ईस्राएल्दी गे़नायो ओ़खो़म् ताने मा:दु़म्वा!" दा:सोङ् भीड् सीङ्लङ् दुम्ता।
34
मे़म् ताम्तामेको़ फरीसीद:मी दा:ने प्रे़ँस्तामे, "भुत्द:के आनी होपोलाङ् मे़म्चामी भुत् घ्लु़न्दा।"
35
येसु हप्पे सहर्द नुङ् दे़ल्दी लाम्तामे को़दीङ् मे़म्द:के आनी मुलुखीम्द:दी चे़न्सोङ् पाईमाखोके लो: ङीन्पा:सोङ् ककङ् खा:ले आलामो नुङ् रु़:आद:लाई नु़पा:सोङ् गक्तामे।
36
खेदायो भीड्द:लाई तासो आम्द:मी आनी ग्वादी मे़म्द:लाई सीस्को:को पात्तामे। माराङ्खेदा मे़म्द गोठाला मान्थीम् भे़डाद खो़मेङ् हईरान् नुङ् ग्वा:दी बाल्आ बक्ता।
37
मेत्तीको़ आम्द:मी आनी चे:लाद:लाई मो़:तामे, का: खुप्चोम् हक्सीङ् ब:, खेदायो खेतालाद दो़खो़ ब:मे।
38
ए़म्चामी का: खुप्चोम् प्रभुलाई प्रार्थना पाने, को़दीङ् आम्द:मी का: खु़प्ळा खेतालाद फ्ली:मेला।