8
1
येसु कोङ्कोलाङ् तोस्तामे को़दीङ् ङो:लो भीड् आनी नो:थाला ला:गेदु़म्ता ।
2
कङ् लेचाळार् पा:आ मु़रु़ राताको़ येसुके आनी ङाल्लादी आपोक्ची तीङ्स्ताको़ ओ़खो़ दा:ता, "ए प्रभु, गो़नी ग्वा पानी खेदा गुलाई नु़पा:ने चाम्ईनी।"
3
आम्द:मी आनी गु़मी मे़म्लाई खु़त्तामे, को़दीङ् दा:तामे, "गु ग्वा पाङा, गो़ नु़ई्वार्दो़।" धवाङ् मे़म्के आळार् नु़ता।
4
मेत्तीको़ येसुमी मे़म्लाई मो़:तामे, "सु़लाई यो मामोचोमी। खेदायो लाओ़, को़दीङ् गो़ पुजाहारीकेदी कोईसो़ पा:सो़, को़दीङ् मोसामी जुल्चो दा:ना भे:टी जु़लो़, को़दीङ् मे़म् मु़रु़द:मी तामेला।
5
येसु कफर्न्हुम्दी ओ:तामेना कङ् रोम्दीम् कप्तान् आनीकेदी राताको़ ले़म्को पाप्ता। आम्चामी दा:ता,
6
"ए प्रभु, अवा:ली पक्छेघात्मी हक्सीङ् दु़खा ताप्ता:को़ खीम्दी ओछे़न्दी ईप्ळा ब:।"
7
येसुमी मे़म्लाई मो़:तामे, "गु राङाको़ मे़म्लाई नु़:पादु।"
8
खेदायो कप्तान्मी दा:ता, "ए प्रभु, गो़नीलाई अखीम्दी स्वागत् पाचो दार्सीआ गु माब:ङा। खेदायो लो: मत्तई ळक्तीगीईनी, को़दीङ् अवा:ली नु़ईवार्दा।
9
माराङ्खेदा गु यो आ:तोरेम्द:के गु़दी ब:ङा, को़दीङ् अगु़दी सीपाईंद ब:मे। गु कङ्लाई "लाओ़" मोदु, मेत्तीको़ मे़म् ला:, को़दीङ् आकङ्मेलाई "पीओ़" मोदु, मेत्तीको़ मे़म् पी:, अवा:लीलाई ओ़खो़ पाओ़ मोदु, मेत्तीको़ मे़म्चामी मे़म् पावा।"
10
कप्तान्के आलो: ङीन्तामेको़ येसु सीङ्लङ् दु़म्तामे, को़दीङ् आम्द पु़म्दी राआद:लाई मो़:तामे, "आजेङ् गु गो़नीलाई मो़:नानी, ईस्राएल्दी यो एत्ती सा:रो रे़प्आ मु़रु़ गु थी:तङ्मे मा:बो।
11
गु गो़नीलाई मो़:नानी, सयाला नुङ् नेवालालाङ् हक्सीङ् मु़रु़ रामे, को़दीङ् अब्राहाम्, ईस्हाक् को़दीङ् याकुब्नुङ् परुदीम् पाईमाखोके खाउमादी नी:सीमे।
12
खेदायो पाईमाखोदी दुम्चो दु़म्आद चाईं आ:तोलाम् तु़कु़म्चीमादी घ्रम्सीमे, मेकेदी मु़रु़द ङङ्मे को़दीङ् ख्लु़: सीर्दीमे।
13
मेत्तीको़ येसुमी कप्तान्लाई मो़:तामे, "लाओ़, गेखो़म् गो़ रे़प्तीम् ब:, मो़खो़मेङ् गो़लाई दु़म्ला।" मेत्तीको़ मे़म् वा:ली मखनाङ् नु़ता।
14
पत्रुस्के आखीम्दी राम्तामे को़दीङ् येसुमी मे़म्के आसासुलाई जुसारा पा:आको़ ईप्ळा ताम्तामे।
15
आम्द:मी मे़म्के आगु़ खु़त्तामे, को़दीङ् जुसारामी मे़म्लाई प्लन्ता। मेत्तीको़ मे़म् बोक्ता, को़दीङ् येसुके सेवा पाप्ता।
16
नाम् रीक्ताको़दीङ् मे़म्द:मी येसुकेदी भुत्मी सीक्आ हक्सीङ् मु़रु़द रा:तामे। येसुमी लो:लाङ् भुत्द:लाई घ्लु़न्तामे, को़दीङ् गेसो रु़:आ बक्तामे, हप्पेलाई नु़पात्तामे।
17
यसईया पर्मेस्वर्के लो: ळक्आमी ळक्ताम् लो: झक्चोलाई ए़म् दु़म्ताम् बक्ता, "आम्द आनीदबमीङ् ईक्के आलामोद, को़दीङ् ईक्के रुचो-खाचोद पोक्तामेको़ ला:तामे।
18
गे़ना येसुमी आनीके पु़म्दी ङो:लो भीड् ताम्तामे, आम्द:मी सदु़कु़दीङ् हाम्बा लाने मो़:तामे।
19
कङ् मुलु चे़न्आ येसुकेदी राता, को़दीङ् आम्द:लाई मो़ता:मी, "गुरु, गो़नी गे़ला-गे़ला लानी, गु गो़नीनुङ् गङ्ङा।
20
येसुमी मे़म्लाई मो़:तामे, से़ल्के कुर्, धमोदीम् चीक्ळालुक्ळाद:के जो: दु़म्, खेदायो मु़रु़के तावाके लागी दा पीया थार्चोम् ठङ् यो मा:बो।
21
आम्द:के चे:लाद:दीम् आकङ्मे कङ्चामी दा:ता, "प्रभु, ङाल्ला गुलाई अपापालाई थीम्ने गीईनी।"
22
खेदायो येसुमी मे़म्लाई मो़:तामे, "अनो:थाला पीओ़, सीप्खोद:मीङ् आनी सीप्खोद थीम्तीमेला।
23
आम्द रोबोदी ओ:तामेको़दीङ् आनी चे:लाद आम्द:नुङ् लाम्तामे।
24
अचानक् याक्के सदु़कु़दी ङो:लो जु: खीत्ता, को़दीङ् ळ:कु़के छल्कोमी रोबो सु़म्चो ओ़स्ता। येसु याल्आ बक्तामे।
25
चे:लाद आनीके पु़म्दी राम्तामेको़ ओ़खो़ दा:सोङ् आम्दलाई से़ंस्पात्तामे, " प्रभु ब्लन्पा:कीनी! गुकु बे़क्चो ओ़स्ताकु़।"
26
येसुमी मे़म्द:लाई मो़:तामे, "दो़खो़ रे़प्आ मु़रु़द, गो़नी माराङ् ङी:नी?" मेत्तीको़ बोक्तामेको़ येसुमी जु: नुङ् सदुकुलाई हु़त्तामे, को़दीङ् सदु़कु़ सान्ता दु़म्ता ।
27
"ए़म् दा गेखो़म् मु़रु़ हो, माराङ्खेदा जु: नुङ् सदु़कु़मी यो ए़म्चामी दा:ना ऱेम्स्चे रेछा!" दा:सो मे़म् मु़रु़द सीङ्लङ् दु़म्तामे।
28
मेत्तीको़ येसु हाम्बा गदरीनीद:के दे़ल्दी राम्तामे, मेके भुत्मी सीक्आ नीक्सी मु़रु़द:सीमी सु़लु़म्लाङ् पीसोङ् बक्तासेना आम्द:लाई थी:तासे। मे़म्द:सी एत्ती ङी:मा दक्आ बक्तासे, खी सु़यो मे़म् लाम् गङ्ने माचाम्मेवाम् बक्ता।
29
मे़म्द:सी ओ़खो़ दा:सोङ् ब्रे:तासे, "ए पर्मेस्वर्के तावा, गो़नी गुकुनुङ् मारा ग्वा पानी? अक्के समय मारु़प्थु़ङ् गुकुलाई दु़खा गीथा गो़नी एके रान्तानीम् हो?"
30
मे़म्द:सीदीङ् की:ची हार्ला हक्सीङ् पो:द चा:रे पास्चोङ् बक्तामे।
31
भुत्द:सीमी येसुलाई ओ़खो़ मो़:तासेको़ ले़म्को पातासे, गो़नीमी गुकुलाई घ्लु़न्दीकीनी खेदा गुसुलाई पो:द:के बथान्दी फ्ली:कीनी।
32
मेत्तीको़ येसुमी मे़म्द:लाई मो़:तामे, "लाने।" मेकेङ् मे़म्द घ्लु:तामेको़ पोद:केदी ओ:तामे, को़दीङ् हप्पे पो:द हुर्रे दुम्सोङ् से़र्ते़लु़क्चु़ दोक्तामेको़ ळ:कु़दी वाम्ता:मीको़ बे़क्तामे।
33
पो: चा:रे पाआद झुक्का:तामे, को़दीङ् सहर्दी लासोमाम् हप्पे लो: नुङ् मे़म् भुत्मी सीक्आद:सीलाई मारा दु़म्ता हप्पे ङीन्पात्तामे।
34
मेत्तीको़ हप्पे सहर् ङ येसुलाई घ्रु़म्था हुरुमक्सी राम्तामे, को़दीङ् आम्द:लाई ताम्तामेको़ मु़रु़द:मी मे़म्द:के वालेकोलाङ् लाने दा:सोमाम् येसुलाई ले़म्को पाम्तामे।