7
1
"आफाके नीसाफ् मापाने, को़दीङ् गो़नी यो नीसाफ्दी मादु़म्नी।
2
माराङ्खेदा गेक्सो़ गो़नी आफाद:लाई नीसाफ् पानी, मो़क्सो़ङ् गो़नीलाई यो नीसाफ् पानीमी। गेक्सो़ गो़नी थाम्नी मो़क्सो़ङ् गो़नी यो थाम्सीनी।
3
माराङ् गो़ ईङप्सीके आमीचीदीम् जीम् ताई, खेदायो ईमीचीदीम् मुढा चाईं माताई?
4
ईमीचीदी मुढा ब: खेदा गेक्सो़ ईङप्सीलाई 'गुलाई ईमीचीदीम् जीम् थे़क्चो गीई' दा:सो गो़ दा:ने चाबी?
5
ए नाक्ले़न्ती, ङाल्ला ईमीचीदीम् मुढा थे़को़, मेत्तीको़ ईङप्सीके आमीचीदीम् जीम् थे़क्चोलाई गो़ रीम्मो़खो़ ताने चाबी।
6
मारा से:आ ब: मे़म् ख्लीचाद:लाई मागीओ़मी। ईमोतीद पो:के आङाल्लादी माघ्रप्तो़, मा:खेदा मे़म्चामी आखु़लीमी मे़म्लाई दीम्दा को़दीङ् ले:मेको़ गो़लाई क्रानेमी।"
7
"पु़न्नेमो़खो़ ब:ने को गो़नी तानी, लाम्नेमो़खो़ ब:ने को गो़नी थी:नी, ढक्ढक् पानेमो़खो़ ब:ने को ईनीके लागी होङ्से।
8
माराङ्खेदा गे़म्चामी पु़न् मे़म्चामी तावा, गे़म्चामी लाम् मे़म्चामी थीदा, गे़म्चामी ढक्ढक् पावा मे़म्के लागी लाप्चो होङ्से।
9
गो़नीदीम् सु़ हला, मे़म्के आतावामी सभ्ले़म् पु़न्ना मे़म्लाई लुङ् गीवा?
10
खी ङाँ पु़न्ना मे़म्लाई बु़सा गीवा?
11
ए़म्चामी गो़नी दुस्ट दुम्सोमाम् ईनी तावातामीद:लाई रीम्ळा थोक् गीसु़ जोङ्नी खेदा, परुदी बक्आ ईनी पापामी आम्द:नुङ् पु़न्आलाई गेसो थे: पासोमाम् रीम्ळा थोक् गीनीमी।
12
मु़रु़द:मी गो़नीनुङ् गेखो़म् बे़बहार् पामेला दा:सोमाम् गो़नीमी मीम्तीनी, गो़नीमी यो आम्द:नुङ् मो़खो़मेङ् बे़बहार् पाने, माराङ्खेदा मे़मेङ् मुलु नुङ् पर्मेस्वर्के लो: ळक्आमी चे़न्ना ए़म् हो।
13
याक्के लाप्चोलाङ् आ:घोला ओ:ने, माराङ्खेदा पीलुक्ची दु़म्दीखा ठङ्दी चक्आ लाप्चो नुङ् लाम् ङो:लो दु़म्, को़दीङ् ए़म्लाङ् आ:घोला ओ:आद हक्सीङ् दु़म्मे।
14
माराङ्खेदा राम्साम्दी चक्आ लाप्चो याक्के दु़म्, को़दीङ् लाम् याक्के दु़म्, मे़म्चामी चाईं राम्साम्दी चक्सो, को़दीङ् मे़म् थी:आद दो़खो़ङ् दु़म्मे।
15
पर्मेस्वर्के लीमो लो: ळक्आद:दीङ् होस् ब:ने, मे़म्द ईनीकेदी भे़डाके वा: फीस्चोमाम् रामे, खेदायो आ:घोला चाईं ङी:मा दक्आ बँसोद खो़म् दु़म्मे।
16
मे़म्द:के आनी सी:चीलाङ् गो़नी मे़म्द:लाई से़न्तीनी। मारा चु़:के ढ़ेक्सीदीङ् अङ्गुर् को़दीङ् खबा:चीके झाङ्दीङ् फोस्ची प्रो़:या ङा?
17
मो़क्सो़ङ् ककङ् रीम्ळा ढे़क्सीमी रीम्ळा आसी:ची सी:पादा, खेदायो मारीम्ळा ढे़क्सीमी मारीम्ळाङ् आसी:ची सी:पादा।
18
रीम्ळा ढे़क्सीमी मारीम्ळा आसी:ची सीपा:ने माचाबा, ना मारीम्ळा ढे़क्सीमी रीम्ळा आसी:ची सीपा:ने चाबा।
19
रीम्ळा सी:ची मासी:आ ककङ् ढे़क्सी चर्याको़ भ्लु़या, मेत्तीको़ मी:दी घ्रप्तीया।
20
ओ़क्सो़ मे़म् पर्मेस्वर्के लो: ळक्आद:लाई आनी सी:चीदीङ् से़न्तीयामी।
21
"गुलाई हक्सीङ्मी 'प्रभु, प्रभु' दा:मे खेदायो मे़म्द हप्पे परुदीम् पाईमाखोदी माओ:मे। परुदी बक्आ अपापाके ग्वा रे़प्आ मु़रु़द मत्तई पर्मेस्वर्के पाईमाखोदी ओ:।
22
मे़म् नाम्ती हक्सीङ्मी गुनुङ् दा:मे ‘प्रभु, प्रभु, मारा गुकु ईनी नीङ्दी पर्मेस्वर्के लो: माळक्कावा? ईनी नीङ्दी भुत्द माचु़:तीकावा? को़दीङ् ईनी नीङ्दी हक्सीङ् सा:के ते मापाकावा ङा?'
23
मेत्तीको़ गु मे़म्द:लाई रीम्मो़खो़ मोदुमी, 'गु गो़नीलाई गे़नायो से़न्तानानीम् मा:बो। ए मारीम्ळा ते पाआद, गुदीङ् हारे ब:ने। "
24
ए़म्चामी सु़मी अके ए़म् लो:द ङीन् को़दीङ् रे़प्ता, गु कङ् बुद्दी थीआ मु़रु़नुङ् मे़म्लाई थाबु, मे़म्चामी आखीम् लुङ् त:रे पाप्ता।
25
मेत्तीको़ रे़वा यु़ता, भल् यु़ता, मेत्तीको़ जु: खीत्ता: को़दीङ् मे़म् खीम् त:रे धेस्ता, मखना यो मे़म् खीम् माभ्लु़:वा। माराङ्खेदा मे़म् लुङ् त:रे राम्पा:ना बक्ता।
26
सु़मी ए़म् अके लो: ङीन्को़ यो मारे़प्ता, मे़म्लाई गु कङ् मुर्ख मु़रु़नुङ् थाबु। मे़म्चामी आके खीम् बालुवा त:रे पाप्ता।
27
रे़वा यु़ता, को़दीङ् भल् यु़ता, मेत्तीको़ जु: खीत्ता, को़दीङ् मे़म् खीम् त:रे धेस्ता, को़दीङ् मे़म् खीम् भ्लु़ता, मेत्तीको़ मे़म्के ङो:लो नक्सान् दु़म्ता।"
28
येसुमी ए़म् लो: दा:ने थु़म्तामेको़दीङ् मेकेदी बक्आ भीड् आम्द:मी चे़न्तामेम् ङीन्ता:को़ सीङ्लङ् दु़म्ता।
29
माराङ्खेदा येसुमी मे़म्द:के आनी मुलु चे़न्आद:मी दा:तामेम् खो़ङ् माआ, खेदायो हक् ताआ मु़रु़मी दा:ना खो़ङ् पासो चे़न्दीमेवा।