6
1
होस् ब:ने, गो़नी मु़रु़द:लाई कोईसो़ पा:चोके लागी धर्म मापाने। मा:खेदा परुदी बक्आ ईनी पापालाङ् गो़नी मारायो ईनाम् मातानी।
2
ए़म्चामी गो़नी गे़ना दान् गीनी, मखना ईनी ङाल्लादी तुरही माताम्ने, गेक्सो़ नाक्ले़न्तीद:मी मुलुखीम्द नुङ् सडक्द:दी मु़रु़द:लाङ् प्रसंसा ताचोके लागी पामे। आजेङ्, गु गो़नीलाई मो़:नानी, मे़म्द:मी आनी ईनाम् ताने थु़म्तामेम् ब:।
3
खेदायो गे़ना गो़ दान् गीई, ईझुम्रो गु़मी मारा पासोङ् ब: मे़म् ईपे:रो गु़मी था: मातावाला।
4
ईके दान् सु़मीयो था: मातावाला, को़दीङ् मीचीमी माताना ईपापामी गो़लाई ईनाम् गीएमी।
5
गे़ना गो़ प्रार्थना पाई, मखना नाक्ले़न्तीद खो़ङ् मापासी:ने, माराङ्खेदा मे़म्द मुलुखीम्द नुङ् सडक्द:के कु:नादी मु़रु़द:मी तामेला दा:सो राप्सोमाम् प्रार्थना पाचोम् ग्वा पामे।
6
खेदायो गो़ गे़ना प्रार्थना पाई, मखना ईके आ:घोलाम् कोठादी ओ़ङो़, को़दीङ् लाप्चो चोक्सोमाम् आ:घोला बक्आ ईपर्मेस्वर्लाई प्रार्थना पाओ़, को़दीङ् आ:घोला ताआ ईपापामी गो़लाई ईनाम् गीएमी।
7
को़दीङ् प्रार्थना पायाना मारे़प्आद खो़मेङ् म:मसीसीदी माब्रे:चो। माराङ्खेदा हक्सीङ् लो: ळङ्याना मे़म्द:के लो: ङीन्या दा:चोम् मे़म्द मीम्सीमे।
8
ए़म्चामी गो़नी मे़म्द खो़म् मादु़म्ने। माराङ्खेदा गो़नीमी आम्द:नुङ् पुन्चोदीङ् ङाल्लाङ् गो़नीलाई गे़म् गे़म् थोक् चाईदु़म्आ ब:, मे़म् ईनी पापामी तु़:तीमे।
9
खेदायो गो़नी चाईं ओ़क्सो़ प्रार्थना पाने: 'ए अक्के पापा, गो़नी परुदी ब:नी, ईनी नीङ् से:आ दु़म्ला।
10
ईनी पाईमाखो राला। ईनी ग्वा परुदी गेखो़म् ब:, मो़खो़मेङ् ए़म् ब्लोयुदी झङ्ला।
11
गुकुलाई आना नाम्तीम् जाचो गीकीनी।
12
अक्के साम्से तील्ती गीकीनी, गेक्सो़ गुकु अक्के साम्से पाआद:के साम्से तील्ती गीक्ताकु़म् ब:।
13
गुकुलाई परीक्छे़दी दु़म्ने मागीकीनी, खेदायो दुस्टदीङ् फक्कीनी। माराङ्खेदा पाईमाखो सा: नुङ् महीमा गे़नाखेदायो ईनीकेङ् हो, आमीन्।'
14
माराङ्खेदा गो़नी मु़रु़द:के साम्से तील्नी खेदा ईनीके परुदी बक्आ पापामी यो गो़नीलाई तील्ती गीनीमी।
15
खेदायो गो़नी मु़रु़द:के साम्से मातील्नी खेदा ईनी पापामी ईनी साम्से मातील्मे।
16
गे़ना गो़नी उपास् ब:नी, मखना नाक्ले़न्तीद खो़ङ् ङालीद:द कु़ली कोईसो़ मापाने। माराङ्खेदा मु़रु़द:लाई उपास् ब:ना कोईसो़ पाचोके लागी मे़म्द आनी कु़ली के़के़ मो़पा:मे। आजेङ् गु गो़नीलाई मो़:नानी, मे़म्द:मी आनी ईनाम् ताने थु़म्तामेम् ब:।
17
खेदायो गो़ चाईं उपास् बङेना ईपीयादी गे़वा ख्ले़को़, को़दीङ् ईकु़ली ची:सो़।
18
को़दीङ् ईके उपास् मु़रु़द:मी माआ, आ:घोला बक्आ ईपापामी तामेला, को़दीङ् आ:घोला ताआ ईपापामी गो़लाई ईनाम् गीएमी।
19
ईनीके लागी चे़ङ्माखोदी सम्पती माउ़प्तीने। मेके बु़सा नुङ् गार्मी मे़म् पीलुक्ची पामे को़दीङ् कु़न्चाद:मी खीम् पङ्मेको़ कु़मे।
20
खेदायो ईनीके लागी परुदी सम्पती उ़प्तीने, मेके बु़सा नुङ् गार्मी पीलुक्ची मापावा, को़दीङ् कु़न्चामी यो माकु़वा।
21
माराङ्खेदा गे़ला ईनीके सम्पती दु़म्, मेकेङ् ईनी ग्वा यो दु़म्।
22
मीची राम्दीम् तो:सी हो, ए़म्चामी ईमीचीद:सी से:आ बक्से खेदा ईके हप्पे राम् उजे़लो दु़म्।
23
खेदायो ईमीचीद:सी माताआ बक्से खेदा, ईके हप्पे राम् तु़कु़म्ची दु़म्। ए़म्चामी ईकेदी बक्आ उजे़लो चाईं तु़कु़म्चीमा दु़म् खेदा, मे़म् तु़कु़म्चीमा गेखो़म् के़के़मो़आ दु़म्।
24
सु़मीयो नीक्सी होपोके सेवा पाने माचाबा। माराङ्खेदा मे़म्चामी कङ्लाई ग्राम्दा को़दीङ् आकङ्मेलाई माया पावा। खी मे़म्चामी कङ्के सेवा पावा, को़दीङ् आकङ्मेलाई मे़म्चामी आ:चा मीम्सेम् दु़म्। गो़नी पर्मेस्वर् नुङ् सम्पती नीम्फोके सेवा पाने माचाम्नी।
25
मे़म्चामी गो़नीलाई मो़:नानी, 'मारा जाचो, मारा तु:चो' दा:सो ईनी साम्के लागी को़दीङ् 'मारा फीस्चो' दा:सो ईनी राम्के लागी सुर्ता मापाने। मारा राम्साम् जाचो नुङ् तु:चोदीङ् को़दीङ् राम् वा:सीम्दीङ् ङो:लो माआ ङा?
26
धमोदीम् चीक्ळाद को:ने। मे़म्द:मी ना वा:चे़र् फु़:मे, ना का: खु़म्मे, ना तुङ्ख्रोदी उ़प्तीमे, खेदायो परुदीम् ईनी पापामी मे़म्द:लाई जापा:मे। मारा गो़नी मे़म्द:दीङ् थे: आथीङ्के माब:नी ङा?
27
गो़नीदीम् आगे़म्चामी सुर्ता पावाको़ आके यु़दी कङ् घडी गाम्ने चाबा?
28
को़दीङ् वा:सीम्के लागी गो़नी माराङ् सुर्ता पानी? खापीदीम् लीली फुङ् को:ने, मे़म् गेक्सो़ बार्। मे़म्चामी ना खीप्ता पावा, ना साले पान्ता।
29
खेदायो गु गो़नीलाई मो़:नानी, सोलोमन् हङ् यो आके हप्पे ङो:लो ङो:लो थोक्दी मे़म्द:दीम् कङ् थीङ् रीम्ळा माबकावा।
30
आना बक्आ नुङ् दील्ला मी:दी पीक्चोम् घाँस्लाई पर्मेस्वर्मी ओ़क्सो़ङ् फीस्पा:मे खेदा, ए दो़खो़ रे़प्आद, मारा गो़नीलाई झन् थे: आम्द:मी फीस्मापा:नीमी ङा?
31
ए़म्चामी मारा जाचो? मारा तु:चो? मारा फीस्चो? दा:सोमाम् सुर्ता मापाने।
32
ओ़क्सो़ङ् आफादो:चाद:मी ए़म् हप्पे थोक् लाम्मे, को़दीङ् ईनीके परुदी बक्आ पापामी गो़नीलाई ए़म् हप्पे थोक् चाईदु़म्आ ब: दा:सो तु़:तीमे।
33
खेदायो ङाल्ला आनी पाईमाखो नुङ् आनी धार्मीक्ता लाम्ने, को़दीङ् मे़म् हप्पे थोक् ईनीके लागी गाम्सीमे।
34
ए़म्चामी दील्लाम्के लागी सुर्ता मापाने, माराङ्खेदा दील्लाम् नाम्तीमी आके सुर्ता आदबङ् पावा। आनाम् दु़खा आनाके लागी ले:ता।"