5
1
भीड्लाई ताम्तामेको़ आम्द कोङ्को त:रे लाम्तामे, को़दीङ् आम्द नीस्तामे को़दीङ् चे:लाद आनीकेदी राम्तामे।
2
आम्द:मी आनी सो़:मी चे़न्ने प्रे़ँस्तामे,
3
"आसीलोङ्मा ळालादी माथीङा मीम्सीआद, माराङ्खेदा परुदीम् पाईमाखो मे़म्द:के हो।
4
आसीलोङ्मा सोक् पाआद, माराङ्खेदा मे़म्द पर्मेस्वर्दी सन्तुक् दुम्मे।
5
आसीलोङ्मा मलीम्द, माराङ्खेदा मे़म्द:मी ब्लोयुदीम् हक् तामे।
6
आसीलोङ्मा धार्मीक्ताके लागी सो:ली बे़क्आद नुङ् ळ:कु़ दक्आद, माराङ्खेदा मे़म्द रु:मे।
7
आसीलोङ्मा सीस्को:को पा:आद, माराङ्खेदा मे़म्द:लाई सीस्को:को पा:तीमेमी ।
8
आसीलोङ्मा से:आ ग्वा थीआद, माराङ्खेदा मे़म्द:मी पर्मेस्वर् तामे।
9
आसीलोङ्मा दु़पा:आद, माराङ्खेदा मे़म्द:लाई पर्मेस्वर्के तावामीद मो:मेमी।
10
आसीलोङ्मा धार्मीक्ताके लागी दु़खा गीनाद, माराङ्खेदा परुदीम् पाईमाखो मे़म्द:के हो।
11
आसीलोङ्मा दु़म्ने गो़नी, गे़ना मु़रु़द:मी अके लागी गो़नीलाई सुवा जे:तीमे को़दीङ् दु़खा गीनीमी, को़दीङ् लीमो चल्सोमाम् ईनीके चीचीरे़म्दी हप्पे नानाओली लो: पामे।
12
मखना गे़र्सीने, को़दीङ् मारी खुसी दु़म्ने, माराङ्खेदा परुदी ईनीके ईनाम् ङो:लो दु़म्। माराङ्खेदा ओ़क्सो़ङ् गो़नीदीङ् ङाल्लाम् पर्मेस्वर्के लो: ळक्आद:लाई मु़रु़द:मी दु़खा गीम्तामेम् बक्ता।"
13
"गो़नी चे़ङ्माखोदीम् युक्सी हो, खेदायो युक्सी माछो़आ दु़म् खेदा मे़म् आनायो मारामी युक्सी छो़पा:चो? मे़म् दा आ:तोला घ्रप्चोम् नुङ् मु़रु़मी दीम्चोदीङ् आफा मारायो तेके मा:दु़म्।
14
गो़नी चे़ङ्मोखोदीम् छेछेवा हो। कोङ्कोदी नी:ना सहर् ख्लु़:सीने माचाबा।
15
मु़रु़द:मी तो:सी चो़मेको़ पाथीमी दा मासु़म्मे। खेदायो बर्सु त:रे जु़ल्मे को़दीङ् खीम्दी बक्आ हप्पेके लागी मे़म्मी थ:दा।
16
मो़क्सो़ङ् ईनी छेछेवा मु़रु़द:के आनी ङाल्लादी थ:दाला, को़दीङ् मे़म्द:मी गो़नी पानीम् रीम्ळा ते तामेला, को़दीङ् परुदी बक्आ ईनी पापाके महीमा पामेला।
17
मुलु खी पर्मेस्वर्के लो: ळक्आद:लाई साम्था गु रातीम् दा:सो मामीम्सीने। गु साम्था माआ, खेदायो थु़म्था राती।
18
माराङ्खेदा आजेङ् गु गो़नीलाई मो़:नानी, "गे़नासम्म परु नुङ् ब्लोयु मा:जाम्से मखनासम्म हप्पे थोक् माझक्थु़ गे़क्सो खेदायो मुलुदीम् ईती कल्आ खी कङ् थोप्लो मा:जाम्।
19
ए़म्चामी सु़मी ए़म् आरे पानाद:दीम् हप्पेदीङ् याक्केलाई मारे़प्ता, को़दीङ् मु़रु़द:लाई मो़खो़मेङ् चे़न्दा, परुदीम् पाईमाखोदी मे़म् हप्पेदीङ् याक्के दा:चोम् दु़म्। खेदायो सु़मी मे़म् आरे पानाद रे़प्ता को़दीङ् चे़न्दा परुदीम् पाईमाखोदी मे़मेङ् ङो:लो दा:चोम् दु़म्।
20
माराङ्खेदा गु गो़नीलाई मो़:नानी, ईनी धार्मीक्ता मुलु चे़न्आ नुङ् फरीसीद:केदीङ् थे: मा:दु़म् खेदा गो़नी गे़नायो परुदीम् पाईमाखोदी माओ:नी।"
21
"गो़नी ङीन्तानीम् ब:, नेसेम् मु़रु़द:लाई ओ़खो़ दा:ना बक्ता, 'गो़ मासातो़, को़दीङ् गे़म्चामी सादा मे़म्लाई सुरीम् गीचो दार्से।
22
गु गो़नीलाई मो़:नानी, सु़मी आङप्सीनुङ् सोक्सो पावा मे़म्लाई सुरीम् गीचो दार्से, सु़मी आङप्सीके रीम्ळा मापावा मे़म् आङो:लो-मुलुखीम्दी राप्चो दु़म्। खेदायो सु़मी आङप्सीलाई 'गो़ मुर्ख' मो़दा, मे़म् नरक्दीम् मी:दी ओ:चोम् ङी:मादी दु़म्।
23
ए़म्चामी गो़ थान्दी ईभे:टी पीगीना ईङप्सीके ग्वादी ईके चीचीरे़म्दी सोक्सो थी: दा:सो मीम्ती खेदा,
24
ईभे:टी मे़म् थान्पु़म्दी जु़लो़, को़दीङ् लाओ़। ङाल्ला ईङप्सीनुङ् दु़से, मेत्तीको़ राओ़को़ ईभे:टी थान्दी पीको़।
25
ईके बा:दीनुङ् अदालत्दी लाएना लाम्दीङ् दु़ईवार्दो़, मा:खेदा बा:दीमी गो़लाई नीसाफ् पाआके आगु़दी गीए, को़दीङ् नीसाफ् पाआमी आङो:लो मु़रु़के आगु़दी गीए, को़दीङ् गो़ झे़ल्खान्दी ओ़ङे।
26
आजेङ् गु गो़नीलाई मो़:नानी, "गो़ कङ् कङ् खोपीलुङ् माचोङीम्सम्म गो़ मेकेदीङ् घ्लु:ने माताई।"
27
"गो़नी ओ़खो़ दा:ना ङीन्तानीम् ब:, 'गो़ बे़भीचार् मापाओ़'।
28
खेदायो गु गो़नीलाई मो़:नानी, सु़मी कोई मीन्चालाई मारीम्ळा ग्वामी को:, मे़म्चामी ङाल्लाङ् आग्वादी बे़भीचार् पाने थु़म्मे दु़म्।
29
ईझुम्रो मीचीमी गो़लाई साम्से पा:पाने खेदा मे़म्लाई थे़क्सोमाम् घ्रप्तो़, माराङ्खेदा ईके हप्पे राम् नरक्दी घ्रम्स्चोदीङ् कङ् ईमीची घ्रप्चो गो़लाई रीम्ळा दु़म्।
30
ईझुम्रो गु़मी गो़लाई साम्से पा:पाने खेदा मे़म्लाई कोक्सोमाम् घ्रप्तो़। माराङ्खेदा ईके हप्पे राम् नरक्दी लाचोदीङ् कङ् ईगु़ कोक्सोमाम् घ्रप्चो गो़लाई रीम्ळा दु़म्।"
31
"ओ़खो़ यो दा:ना ब:, खी 'सु़मी आनाम्नामीलाई प्लन् , मे़म्चामी आम्लाई प्लन्चोम् कागत् रे़क्ताला।'
32
खेदायो गु गो़नीलाई मो़:नानी, सु़मी आनाम्नामी बे़भीचार् मान्थी आफा लो:मी प्लन्, मे़म्चामी आम्लाई बे़भीचार् पाआ पावा, को़दीङ् सु़मी मे़म् प्लन्ना मीन्चानुङ् लालु़खा पावा मे़म्चामी यो बे़भीचार् पावा।
33
गो़नी ङीन्तानीम् ब:, नेसेम् मु़रु़द:लाई दा:ना ब:, गो़ लीमो रोळो माखीक्तो़, खेदायो परम्प्रभुके लागी खीङ्ना रोळो चको़ ।
34
गु गो़नीलाई मो़:नानी, रोळो गे़नायो माखीक्तीने। परुदीम् नीङ्दी रोळो माखीक्तीने, माराङ्खेदा मे़म् पर्मेस्वर्के खोसीम्बा हो,
35
ना चे़ङ्माखोदीम्, माराङ्खेदा मे़म् आम्द:के खु़ली जु़ल्दीखा हो। ना यरुसलेम्दीम्, माराङ्खेदा मे़म् आङो:लो हङ्के सहर् हो।
36
ईपीयाके रोळो माखीक्तो़, माराङ्खेदा गो़ कङ् चाम् बुबुम् खी के़के़म् पाने माचाबी।
37
गो़नी दा:नीम् लो: चाईं 'हो' खेदा 'हो' 'माआ' खेदा 'माआ', कङ्ङा दु़म्ला। 'ए़म्दीङ् थेपो़ चाईं दुस्टलाङ् रा:।
38
"गो़नी ङीन्तानीम् ब:, ओ़खो़ दा:ना बक्ता, 'मीचीके सा:टो मीची नुङ् ख्लु़:के सा:टो ख्लु़:'।
39
खेदायो गु गो़नीलाई मो़:नानी, "दुस्टनुङ् रीळुसी मापाओ़, सु़मी ईझुम्रो चो:चो घीवा, मे़म्नुङ् आकङ्मे चो:चो यो धा:तो़।
40
मेत्तीको़ कोई मु़रु़मी मुद्दा पासो ईदोउरा ब्लाचो लाम् खेदा ईखास्टो यो गीओ़।
41
कोईमी गो़लाई कङ् कीलोमीटर् लाओ़ दा: खेदा मे़म्नुङ् नीक्सी कीलोमीटर् लाओ़।
42
गो़नुङ् पु़न्आलाई गीओ़, को़दीङ् ईकेदी जे़र् ब्लाचो लाम्आलाई गीओ़।
43
"गो़नीमी ओ़खो़ दा:ना ङीन्तानीम् ब:, 'ईछीमेकीलाई माया पाओ़, को़दीङ् ईसत्तुर्लाई ग्राम्दो़।'
44
खेदायो गु गो़नीलाई मो़:नानी, "ईनी सत्तुर्लाई माया पाने, को़दीङ् गो़नीलाई दु़खा गीआद:के लागी प्रार्थाना पाने,
45
को़दीङ् गो़नी परुदी बक्आ ईनी पापाके तावा दु़म्नी। आम्द:मी दुस्ट नुङ् रीम्ळा नीम्फोलाई नाम्के ता:तो गीमे, को़दीङ् धर्मी नुङ् साम्सेचा नीम्फोलाई ङ रे़वा यु़पा:मे।
46
माराङ्खेदा गो़नीलाई माया पाआद:लाई मत्तई माया पानी खेदा गो़नीलाई मारा ईनाम् ब:? मारा तीरो पोक्आद:मी यो मो़खो़ङ् मापामे ङा?
47
गो़नी ईनी ङप्सीलआद:लाई मत्तई सेवा पानी खेदा आफाद:दीङ् थे: मारा पान्तानी ङा? आफा दो:चाद:मी यो मो़खो़ङ् मापामे ङा?
48
ए़म्चामी गेखो़म् ईनीके परुदीम् पापा जोक्आ ब:मे, मो़खो़मेङ् गो़नी यो जोक्आ दुम्चो दु़म्।"