4
1
मेत्तीको़ दीयाबलस्लाङ् परीक्छे़ दु़म्चोलाई से:आ ळालालाङ् येसु तते़र्खा-बुरीखदी ला:तामेमी।
2
आम्द लेक्ना नाम्ती नुङ् लेक्ना तु़ङाची उपास् बक्तामे को़दीङ् आम्द सो:ली बे़क्तामे।
3
मेत्तीको़ परीक्छे़ पाआमी आम्द:केदी राताको़ दा:ता, "गो़नी पर्मेस्वर्के तावा हो खेदा ए़म् लुङ्द:लाई सभ्ले़म् दु़म्ने दा:सो आरे पाने।"
4
खेदायो येसुमी मो़:तामे, "रे़ङ्ना ब:, 'मु़रु़ सभ्ले़म्मी मत्तई माआ, खेदायो पर्मेस्वर्के आनी सो़:लाङ् घ्लु:आ ककङ् लो:मी ब्लन्।'"
5
को़दीङ् दीयाबलस्मी आम्द:लाई से:आ सहर्दी लाता:मीको़ मन्दीर्के आजु़जु़दी राम्पात्ता:मी,
6
को़दीङ् आम्द:लाई मो़ता:मी, "गो़नी पर्मेस्वर्के तावा हो खेदा एकेदीङ् आलु़क्चु़ झुक्तीने, माराङ्खेदा ओ़खो़म् रे़ङ्ना ब:, 'आम्द:मी आनी परुचाद:के गु़दी गो़लाई गीएमी, को़दीङ् मे़म्द:मी गो़लाई गु़-गु़दीङ् तीङेमी, मा:खेदा ईखु़ली लुङ्दी दु़:'।"
7
येसुमी मे़म्लाई मो़:तामे, "रे़ङ्ना ब:, 'गो़ परम्प्रभु ईपर्मेस्वर्के परीक्छे़ मापाचो'।"
8
आनायो दीयाबलस्मी आम्द:लाई कङ् ला:आ कोङ्को त:रे लाता:मीको़ चे़ङ्माखोदीम् हप्पे पाईमाखो नुङ् मे़म्के ङो:लो ङो:लो थोक्द आम्द:लाई कोईसो़ पात्ता:मी,
9
को़दीङ् आम्द:लाई मो़ता:मी, "गो़नी खु़म्नीको़ गुलाई सेवाचन्दीनी खेदा ए़म् हप्पे थोक् गु गो़नीलाई गीनानी।"
10
मेत्तीको़ येसुमी मे़म्लाई मो़:तामे, "सईतान्, गो़ हारे लाओ़! माराङ्खेदा रे़ङ्ना ब:, 'गो़ परम्प्रभु ईपर्मेस्वर्लाई सेवा चन्चो, को़दीङ् आम्द:के मत्तई सेवा पाचो'।"
11
को़दीङ् दीयाबलस्मी आम्द:लाई जु़ल्वात्ता:मीको़ लाता, को़दीङ् परुचाद:मी राम्तामेको़ आम्द:के सेवा पाम्तामे।
12
युहन्ना चोक्तामे दा:आ ङीन्तामेको़ येसु गालील्ला लाम्तामे,
13
को़दीङ् नास्रत् प्लन्तामेको़ कफर्न्हुम्दी लासोमाम् मेकेदी ब:ने प्रेँस्तामे। ए़म् सहर् जबुलुन् नुङ् नप्तालीके वालेकोदी, सदु़कु़ पु़म्दी पा:ता ।
14
यसईया पर्मेस्वर्के लो: ळक्आमी दा:ताम् लो: ओ़क्सो़ झक्ता,
15
"जबुलुन्दीम् वालेको नुङ् नप्तालीदीम् वालेको, यर्दन् हाम्बा, सदु़कु़ला, आफादो:चाद:के गालील्,
16
तु़कु़म्चीमादी बक्आ मु़रु़द:मी कङ् ङो:लो छेछेवा ताम्तामेम् ब:। बे़क्खाके रीप्झुम्के देस्दी बक्आद त:रे कङ् छेछेवा धाप्ताम् ब:।"
17
मे़म्दीङ् ओ़खो़ येसुमी आनी सुसमाचार् ङीन्पासोङ् दा:ने प्रे़ँस्तामे, "पस्चाताप् पाने, माराङ्खेदा परुदीम् पाईमाखो ने़न्था झक्राताम् ब:।"
18
गालील् सदु़कु़के छेउ-छेउ गक्सोङ् बक्तामेना आम्द:मी पत्रुस् दा:ना सीमोन् नुङ् आवापो अन्द्रीयास्, नीम्फोलाई सदु़कु़दी ळा:लुङ् आप्सोङ् बक्आ ताम्तामे। मे़म्द:सी ळा:लुङ्चा बक्तासे।
19
आम्द:मी मे़म्द:सीलाई मो़:तामे, गुनुङ् गक्से, गु गो़सीलाई मु़रु़द:के ळा:लुङ्चा पानासी।"
20
मखनाङ् ळा:लुङ् जु़ल्वात्तासेको़ मे़म्द:सी आम्द:नुङ् गक्तासे।
21
मेकेदीङ् लासो-लासोङ् आम्द:मी आकङ्मे नीक्सी ङप्सी, जब्दीयाके आतावाद:सी याकुब् नुङ् आलआ युहन्नालाई आसी पापा जब्दीयानुङ् रोबोदी आसी ळा:लुङ् फे़र्सोङ् बक्आ ताम्तामे, को़दीङ् आम्द:मी मे़म्द:सीलाई ळात्तामे।
22
मेत्तीको़ मखनाङ् रोबो नुङ् आसी पापालाई जु़ल्वात्तासेको़ मे़म्द:सी आम्द:नुङ् गक्तासे।
23
को़दीङ् येसु मे़म्द:के मुलुखीम्द:दी चे़न्सोङ्, पाईमाखोके लो: ङीन्पा:सोङ्, मु़रु़द:केदी बक्आ ककङ् खा:ले आलामो नुङ् आफा राम्दीम् रु़आ-खाआद नु़पा:सोङ् हप्पे गालील्भरी खीर्स्तामे।
24
आम्द:मी पाम्तामेम् तेके लो: सीरीयाभरी फु़स्ता, को़दीङ् रु़:आद, नानाओली आलामो नुङ् खा:आमी दु़खा ताआ, भुत्मी सीक्आ, छा:रे आलामोमी सीक्आ, पक्छेघात् दु़म्आद हप्पेलाई मु़रु़द:मी आनीकेदी रा:तामे। आम्द:मी मे़म्द:लाई नु़पात्तामे।
25
को़दीङ् गालील्, डेकापोलीस्, यरुसलेम्, यहुदीया नुङ् यर्दन् हाम्बालाम् ङो:लो भीड् आम्द:नुङ् गक्तामे।