3
1
मखना बप्तीस्मा-गीआ युहन्ना यहुदीयादीम् तते़र्खा-बुरीखादी राता, को़दीङ् ओ़खो़ दा:सोङ् ङीन्पा:ने प्रे़ंस्ता,
2
"पस्चाताप् पाने, माराङ्खेदा परुदीम् पाईमाखो ने़न्था राताम् ब:।
3
माराङ्खेदा ए़म् मे़मेङ् हो, आके लो:दी यसईया पर्मेस्वर् लो: ळक्आलाङ् ओ़खो़ दा:ना बक्ता: "तते़र्खा-बु़रीखादी कङ् ब्रे:आके से़न्दा, 'परम्प्रभुके लाम् झु़म्सीने, आम्द:के लाम् सो:झे पाने।'"
4
युहन्नामी उँट्के आसुङ्के वा: फी:सेवा, आकम्बर्दी कोक्तेके कीप्सारी कीम्सेवा। आम्चामी रुई नुङ् साआला खुदो जाउवा।
5
यरुसलेम् नुङ् हप्पे यहुदीया, को़दीङ् यर्दन् पु़म्पीत्थाम् वालेकोद:दीम् हप्पे मु़रु़द मे़म्केदी लाम्तामे,
6
को़दीङ् मे़म्द:मी साम्से पाक्ताकु़म् ब: दा:सो बीस्तामे को़दीङ् यर्दन् ङाकु़दी मे़म्नुङ् बप्तीस्मा ब्लाम्तामे।
7
खेदायो फरीसीद नुङ् सदुकीद:दीम् हक्सीङ् मु़रु़द:लाई बप्तीस्मा ब्लाथा रासोङ् ताप्ता:मीको़ मे़म्द:लाई मो़ता:मी, "बु़साके आबेबाचाद, गो़नी राचो ओ़:सीआ पर्मेवरके नीसाफ् दीङ् झुक्का:चो दा:सो सु़मी मो़:तानी?
8
ए़म्चामी पस्चाताप् दार्सीआ आका सीपा:ने
9
अब्राहाम् ङ अक्के पापा हो दा:सोमाम् ईनीदबदी मादा:ने। माराङ्खेदा गो़नीलाई गु मो़:नानी, पर्मेस्वर्मी ए़म् लुङ्द:दीङ् अब्राहाम्के लागी चाचावारी घ्लु़न्ने चाम्मे।
10
अखनाङ् ढे़क्सीके आपु़म्दी खा झुङ्ने थु़म्स्ताम् ब:। ए़म्चाम् रीम्ळा सी:ची मासीपा:आ ककङ् ढे़क्सी चर्याको़ भ्लु़या, को़दीङ् मी:दी घ्रप्तीया।
11
"गु चाईं गो़नीलाई पस्चाताप्के लागी बप्तीस्मा गीनानी, खेदायो गुदीङ् नो:था राआ गुदीङ् थे: सा: थीआ ब:मे, गु आनी जुता यो कु़र्चो दार्सीआ माब:ङा। आम्द:मी गो़नीलाई से:आ ळाला नुङ् मी:मी बप्तीस्मा गीनीमी।
12
आनी जे:चोम् नाङ्लो आनीकेङ् गु़दी ब:, को़दीङ् आम्द:मी आनी खालालाई हप्पे फीङ्मे, को़दीङ् आनी चोउजा तुङ्ख्रोदी पीङ्मे, खेदायो भुस् चाईं गे़नायो माबे़क्आ मी:दी चो़मे।"
13
मेत्तीको़ येसु गालील्लाङ् युहन्नाकेदी आम्लाङ् बप्तीस्मा ब्लाथा यर्दन्दी राम्तामे।
14
खेदायो युहन्नामी ओ़खो़ दा:सो आम्द:लाई ते़क्चो लाम्ता:मी, "बरु गुलाई का गो़नीमी बप्तीस्मा गीचोदु़म्, को़दीङ् मारा गो़नी अकेदी रानी?"
15
खेदायो येसुमी मे़म्लाई मो़:तामे, "अखना ओ़खो़ङ् दु़म्ने गीओ़। माराङ्खेदा ओ़क्सो़ङ् गो़ईमी हप्पे धार्मीक्ता चक्चो दु़म्।" मेत्तीको़ युहन्ना बीस्ता।
16
को़दीङ् येसु बप्तीस्मा ब्लासो धवाङ् ळ:कु़दीङ् आ:तोरे घ्लु:तामे, को़दीङ् परु होङ्स्ता, को़दीङ् आम्द:मी पर्मेस्वर्के ळालालाई तुक्तुकुर्मा खो़ङ् तोस्चोङ् बक्आ नुङ् आनीदब त:रे युसोङ् बक्आ ताम्तामे।
17
मेत्तीको़ परुलाङ् ओ़खो़ दा:ना से़न्दा यु़ता, "ए़म् अके दङ्ना तावा हो, ए़म्नुङ् गु मारी गे़र्सीआ ब:ङा।"