2
1
हेरोद् हङ्के समयदी यहुदीयाके बेथ्लेहेम्दी येसु गीक्तामे, सयलादीम् जोतीसीद यरुसलेम्दी झक्राम्तामे को़दीङ् मे़म्द:मी दा:तामे,
2
"यहुदीद:के हङ् दुम्सोमाम् गीक्आ गे़ला ब:मे? माराङ्खेदा गुकु आम्द:के तारा सयलादी ताक्ताकु़ को़दीङ् आम्द:लाई सेवा-चन्था राक्ताकु़म् हो।
3
हेरोद् हङ्मी ए़म् ङीन्ता:, मे़म्के ग्वा माब्रो:सेवा, को़दीङ् मे़म्नुङ् हप्पे यरुसलेम् यो माब्रो:सेवा।
4
को़दीङ् आम्चामी आङो:लो पुजाहारीद नुङ् मु़रु़द:के मुलु चे़न्आद:लाई खु़प्ता:मी, को़दीङ् "ख्रीस्ट गे़ला गीक्आ हो?" दा:सोमाम् हीलोहीसी पाप्ता।
5
मे़म्द:मी आम्लाई मो़:तामे, "यहुदीयादीम् बेथ्लेहेम्दी। माराङ्खेदा पर्मेस्वर्के लो: ळक्आद:मी रे़क्तामेम् ब:
6
'ए बेथ्लेहेम्, यहुदाके वालेकोदीम् दे़ल्, गो़ गेक्सो़ई यहुदादी सासन् पाआद पु़म्दी सु़नुङ् यो याक्के माब:ङे, माराङ्खेदा गो़लाङ् कङ् सासन् पाआ घ्लु:, आम्चामी अमु़रु़, ईस्राएल्लाई क्रीवा।"
7
हेरोद्मी जोतीस्द:लाई सु़मीयो मातादीखादी ब्रेत्ता:मीको़ सोर्लुङ् गेना कोईसो़ पास्ताम् हो, मे़म् मे़म्द:लाङ् तु़त्ता।
8
हेरोद्मी आम्द:लाई ओ़खो़ दा:सो बेथ्लेहेम्दी फ्लीता:मी, "लाने, को़दीङ् रीम्मो़खो़ मे़म् बेबाचा लाम्ने। मे़म्लाई थी:नीको़दीङ् गुलाई खबर् पाईनी, को़दीङ् गु यो आम्लाई सेवा चन्दु।"
9
मेत्तीको़ हङ्के आलो: ङीन्सो मे़म्द आनी लाम् लाम्तामे। मे़म् सोर्लुङ् मे़म्द:मी सयलादीङ् ताम्तामेम् बक्ता, गे़म् सोर्लुङ् मे़म्द:के आनी ङाल्ला-ङाल्ला लाता, को़दीङ् बेबाचा बक्आ ठङ्दी झक्ताको़दीङ् अडेदु़म्ता।
10
मे़म्द:मी मे़म् सोर्लुङ् ताम्तामेको़ मे़म्द मारी आनन्द दु़म्सोमाम् गे़र्स्तामे।
11
को़दीङ् खीम् ग:रे ओ:तामेको़ मे़म् बेबाचालाई आनी मामा मरीयम्नुङ् ताम्तामे, को़दीङ् खु़म्तामेको़ आम्द:लाई सेवा चन्तामे। मेत्तीको़ आनी सालामा प्रक्तामेको़ आम्द:लाई सेनारी, आरी ब्रो:आ धुप् नुङ् मुर्रके भे:टी गीम्तामे।
12
को़दीङ् हेरोद्केदी ले:सो मालाचो दा:ना ङामोदी नीवासे़ङ्मा ताम्तामेको़ मे़म्द आकङ्मेङ् लाम् दु़म्सोमाम् आनी देस्दी ले:तामे।
13
मे़म्द लाम्तामे को़दीङ्, परम्प्रभुके कङ् परुचा ङामोदी योसेफ्केदी कोईसो़ पास्ता को़दीङ् दा:ता, "बो़को़, को़दीङ् बेबाचा नुङ् आमामालाई कङ्खङ् ला:सोमाम् मीस्र देस्दी झुक्कातो़ वार्दो़, को़दीङ् गु गो़लाई मामो़:नाम्सम्म मेकेङ् बको़। माराङ्खेदा हेरोद्मी बेबाचालाई सा:चोलाई आम्द:लाई लाम्सोङ् ब:।"
14
को़दीङ् आम् बोक्ताको़ बेबाचा नुङ् आनी मामालाई कङ्खङ् ला:सोमाम् मीस्र देस्दी तु़ङाचीङ् लाम्तामे,
15
को़दीङ् हेरोद् माबे़क्थीसम्म मेकेङ् बक्तामे। पर्मेस्वर्के लो: ळक्आलाङ् परम्प्रभुके लो: ओ़क्सो़ झक्ता, "गु अतावालाई मीस्र देस्लाङ् ब्रेत्तङ्।"
16
मेत्तीको़ जोतीस्द:मी हेरोद्लाई हान्ना लो: हेरोद्मी था: ताप्ता, को़दीङ् मे़म् आसोक्सोमी नीक्ता:। जोतीस्द:लाङ् था: दु़म्आ समय खो़ङ् बेथ्लेहेम् नुङ् मे़म् वालेको ग:रेम् नीक्सी थोचे नुङ् मे़म्दीङ् आधोयु़म् हप्पे बेबाचाद:लाई सापात्ता:मी।
17
यर्मीया पर्मेस्वर्के लो: ळक्आमी दा:ताम् लो: ओ़क्सो़ झक्ता,
18
"रामादी कङ् युप्ती ङीन्ने दु़म्ता, ब्रे:सो-ब्रे:सो ङङ्ना नुङ् सोक्के ङो:लो से़न्दा, राहेल् आबेबाचाद:के लागी ङक्सोङ् बक्आ, आँट् गीम्तामेना मे़म्चामी माब्लाउवा, माराङ्खेदा आके बेबाचाद आबो माब:मे।
19
मेत्तीको़ हेरोद् बे़क्ताको़दीङ्, परम्प्रभुके कङ् परुचा ङामोदी योसेफ्केदी मीस्रदी कोईसो़ पास्ता, को़दीङ् ओ़खो़ दा:ता,
20
"बो़को़, बेबाचा नुङ् आमामालाई कङ्खङ् ला:सोमाम् ईस्राएल् देस्दी लाओ़, माराङ्खेदा बेबाचालाई सा:चो लाम्आद बे़ङ्ने थु़म्स्तामेम् ब:।"
21
मे़म् बोक्ताको़ बेबाचा नुङ् आमामालाई कङ्खङ् ला:सो ईस्राएल् देस्दी लाता।
22
खेदायो यहुदीयादी हेरोद्के आतावा अर्खीलाउस्मी पाईमाखो पासोङ् ब: दा:आ ङीन्ता:को़ योसेफ् मे़म्ला लाचो ङी:ता, को़दीङ् ङामोदी नीवासे़ङ्मा ताप्ता:को़ गालील्दीम् वालेकोदी लाता।
23
आम् लाताको़ नास्रत् दा:ना नगर्दी बक्ता। ओ़क्सो़ पर्मेस्वर्के लो: ळक्आद:लाङ् दा:ना लो: झक्ता, 'आम्द:लाई नास्री मो:मेमी।'