10
1
आम्द:मी आनी कदे़म् नीक्सी चे:लाद:लाई ब्रेत्तामेको़ मासे:आ ळालाद घ्लुन्चोम् नुङ् ककङ् खा:ले आलामो नुङ् रु़:आद नु़पा:चोम् सा: मे़म्द:लाई गीम्तामे।
2
कदे़म् नीक्सी प्रेरीत्द:के नीङ् ए़म् हो, पत्रुस् दा:ना सीमोन् नुङ् मे़म्के आङप्सी अन्द्रीयास्, जब्दीयके आतावा याकुब् नुङ् मे़म्के आलआ युहन्ना,
3
फीलीप् नुङ् बार्थोलोमाई, थोमा नुङ् तीरो पोक्आ मत्ती, अल्फायस्के आतावा याकुब् नुङ् थेदीयस्,
4
सीमोन् कनानी नुङ् यहुदा ईस्करीयोत्, मे़म्चामी येसुलाई सीपात्ता:मी।
5
येसुमी मे़म् कदे़म् नीक्सी चे:लाद:लाई ओ़खो़म् आरे पासो फ्ली:तामे, "आफा दो:चाद:के वालेकोदी मालाने, को़दीङ् सामरीद:के सहर्दी माओ:ने।
6
खेदायो ईस्राएल् दो:चाके जाम्ळा भे़डाद:केदी लाने।
7
गो़नी लानीना परुदीम् पाईमाखो ने़न्था झक्राताम् ब:, दा:सोङ् ङीन्पा:ने।
8
रु़:आद:लाई नु़पा:ने, बे़क्आद:लाई ब्लन्पा:ने, लेचाळार् पा:आद:लाई से:आ पा:ने, भुत्द घ्लु़न्दीने। गो़नी मो़खो़ङ् तान्तानी, मो़खो़ङ् गीने।
9
गो़नी ईनी कीप्सारीदी सेनारी, रु़पा नुङ् ताँबोके खोपीलुङ् माकु़र्ने।
10
गक्चोके लागी सालामा, नीक्सी दोउरा, जुता, कोक्चो माकु़र्ने। माराङ्खेदा खेतालाद:मी आनी जाचो ताचोदु़म्।
11
"गे़म् सहर् खी दे़ल्दी गो़नी ओ:नी, मेके सु़ जु़प्ळा ब: दा:सो लाम्ने, को़दीङ् मेकेदीङ् माब्र:सीनीम् सम्म मेकेङ् ब:ने।
12
मे़म् खीम्दी ओ:नीना सेवा पाने।
13
मे़म् खीम् जु़प्ळा ब: खेदा ईनी सान्ती मे़म् खीम्दी राला। मे़म् जु़प्ळा मा:बो खेदा ईनी सान्ती ईनीकेदीङ् ले:ला।
14
सु़मी गो़नीलाई माब्लावा, ईनी लो: मा:ङीन्, मे़म् खीम् खी सहर्लाङ् घ्लु:नीना ईनी खु़लीदीम् फु़र्कु़ थे़प्तीगीने।
15
आजेङ् गु गो़नीलाई मो:नानी, "नीसाफ्के नाम्ती सदोम् नुङ् गमोराके गती मे़म् सहर्के दसादीङ् थे: ते़र्ने झाम्।
16
को:ने, गु गो़नीलाई बँसोद:के आनीलु़म्बु़दीम् भे़डा खो़ङ् फ्ली:सोङ् ब:नानी, मे़म्चामी गो़नीलाई बु़सा खो़ङ् चङ्खा को़दीङ् तुक्तुकुर्मा खो़ङ् सो:झो दु़म्ने।
17
खेदायो मु़रु़द:दीङ् होस् पा:सीने, माराङ्खेदा मे़म्द:मी गो़नीलाई आङो:लो मुलुखीम्द:दी गीनीमी, को़दीङ् मे़म्द:के आनी मुलुखीम्द:दी गो़नीलाई कोर्रामी घीनीमी।
18
गो़नी अके लागी रोम्दीम् हाकीम् नुङ् सासन् पाआद:के आनी ङाल्लादी राम्पा:नीमी, को़दीङ् मे़म्द नुङ् आफादो:चाद:के लागी साँची दु़म्नी।
19
खेदायो मे़म्द:मी गो़नीलाई सीपा:नीमी, मेत्तीको़ गेक्सो़ नुङ् मारा ळक्चो दा:सो सुर्ता मापाने। माराङ्खेदा गो़नीमी मारा ळक्चो दु़म्ळा हो, मखनाङ् गो़नीलाई मो़:नीमी।
20
माराङ्खेदा ळक्आ गो़नी मादु़म्नी, खेदायो ईनी पापाके ळाला गो़नीदीङ् ळङ्मे।
21
ङप्सीमी ङप्सीलाई सा:चोलाई सी:पादा, को़दीङ् पापामी तावातामीद:लाई, को़दीङ् तावातामीद:मी मामा-पापाद:के चीचीरे़म् पाथा बोङ्मे, को़दीङ् मे़म्द:लाई सापा:मे।
22
अनीङ्के लागी हप्पेलाङ् गो़नी ग्राम्सीनी, खेदायो सु़ नो:थासम्म क:नास्मी ब:, मे़म् ब्लन्।
23
मे़म्द:मी गो़नीलाई कङ् सहर्दी दु़खा गीनीमीना आकङ्मेला झुक्का:ने। माराङ्खेदा आजेङ् गु गो़नीलाई मो़:नानी, "मु़रु़के तावा युचोदीङ् ङाल्ला गो़नी गेक्सो़ई ईस्राएल्दीम् हप्पे सहर्द खीर्सीने माथु़म्नी।"
24
"चे:ला आके चे़न्आदीङ् को़दीङ् वा:ली आके होपोदीङ् ङो:लो मा:दु़म्।
25
चे:ला आके चे़न्आ खो़म् नुङ् वा:ली आके होपो खो़म् दुम्चो आथा दु़म्। मे़म्द:मी खीम्दीम् होपोलाई ङ बाल्जीबुल् मो़:मेम् ब: खेदा आके जहान्दीम्द:लाई झन् गेसो थे: मो़:मे हला?
26
"ए़म्चामी मे़म्द:नुङ् माङी:ने। माराङ्खेदा सुम्सोमाम् माघ्लु:आ को़दीङ् ख्लु:सोमाम् था: मादु़म्ळा मारायो मा:बो।
27
गु गो़नीलाई तु़कु़म्चीमादी मारा मो़:नानी, मे़म् गो़नी उजे़लोदी दा:ने, को़दीङ् गो़नी ईनी नो़:मी सीपी लो:दी मारा ङीन्नी, मे़म् खीम्के धुरीलाङ् ब्रे:सो ङीन्पा:ने।
28
मे़म्द:नुङ् माङी:ने, सु़मी राम् सादा, ळालालाई सा:ने माचाबा। बरु ळाला नुङ् राम् नीम्फो नरक्दी पीलुक्ची पाने चाप्ळानुङ् ङी:ने।
29
मारा कङ् पईसादी नीक्सी भङ्गेरी ले:ने मा:झाम्? मे़म्द:सीदीम् कङ् यो ईनी पापामी ग्वा मापाथु़ खापीदी मा:दोङ्।
30
ईनी पीयादीम् चाम्द यो हप्पे हीङ्ना ब:मे।
31
ए़म्चामी गो़नी माङी:ने, गो़नी हक्सीङ् भङ्गेरीद:दीङ् थे: आथीङ्के ब:नी।
32
"ए़म्चामी सु़मी मु़रु़द:के आनी ङाल्लादी गुलाई ब्लाई, गु यो मे़म्लाई परुदी बक्आ अपापाके आनी ङाल्लादी ब्लाङा।
33
खेदायो सु़मी गुलाई मु़रु़द:के आनी ङाल्लादी माब्लाई, गु यो मे़म्लाई परुदी बक्आ अपापाके आनी ङाल्लादी माब्लाङा।
34
"गु चे़ङ्माखोदी सान्ती रा:था रातीम् हो दा:सो मामीम्सीने। गु सान्ती रा:था माआ, तर्वार् थु़न्था रातीम् हो।
35
माराङ्खेदा गु मु़रु़लाई आपापाके चीचीरे़म्दी, को़दीङ् तामीलाई आमामाके चीचीरे़म्दी, को़दीङ् चाईमीलाई आसासुके चीचीरे़म्दी पाथा रातीम् हो।
36
मु़रु़के सत्तुर् आके आदबके जहान् ग:रेम्द ङ दु़म्मे।'
37
"गे़म्चामी गुदीङ् थे: आपापा आमामालाई माया पावा, मे़म् अके लागी जु़प्ळा मा:दु़म्, गे़म्चामी गुदीङ् थे: आतावातामीलाई माया पावा, मे़म् अके लागी जु़प्ळा मा:दु़म्।
38
सु़मी आक्रुस् पोगाको़ अनो:थाला मा:गङ्, मे़म् अके लागी जु़प्ळा मा:दु़म्।
39
गे़म्चामी आसाम् ब्लन्पादा मे़म्चामी मे़म् गुमेपावा, को़दीङ् आसाम् अके लागी गुमेपाआमी मे़म् ब्लन्पादा।
40
"गो़नीलाई ब्लाआमी गुलाई ब्लावा, को़दीङ् गुलाई ब्लाआमी गुलाई फ्ली:आद:लाई ब्लावा।
41
पर्मेस्वर्के लो: ळक्आलाई पर्मेस्वर्के लो: ळक्आ ब:मेचाम् आम्लाई ब्लाआमी पर्मेस्वर्के लो: ळक्आके ईनाम् तावा। धर्मी मु़रु़लाई धर्मी ङ ब:मेचाम् आम्लाई ब्लाआमी धर्मी मु़रु़केङ् ईनाम् तावा।
42
गे़म्चामी ए़म् आ:चाद:दीम् कङ्लाई अके चे:ला मा:ने पासो क-कान्छु़रा चीसो ळ:कु़ मत्तई खेदा यो तु:चो गीवा, गु गो़नीलाई मो़:नानी, मे़म्चामी आके ईनाम् गे़नायो गुमेमापावा।"