11
1
आनी कदे़म् नीक्सी चे:लाद:लाई आरे पाम्तामे को़दीङ् येसु मेकेदीङ् मे़म्द:के सहर्द:दी चे़न्था नुङ् सुसमाचार् ङीन्पात्था दीम्तामे ।
2
युहन्नामी ख्रीस्ट्मी पाम्तामेम् तेद:के लो: झे़ल्खान्दी ङीन्ता, को़दीङ् आचे:लाद:लाई आम्द:केदी ए़म् लो: हीलो पाथा फ्लीता:मी।
3
"मारा रासोङ् बक्आ चाईं गो़नी ङ हो, खी गुकु कोई आफाके लाम् को:का?"
4
येसुमी मे़म्द:लाई मो़:तामे, "गो़नी ङीन्सोङ् ब:नीम् लो: नुङ् तासोङ् ब:नीम् थोक्द युहन्नालाई मो़:ने,
5
काती-माताआद:मी काती तामे, को़दीङ् आनी खु़ली मागक्आद गङ्मे, लेचाळार् पा:आद नु़म्तामेम् ब:। नो़: माङीन्आद:मी ङीन्ने चाप्ळा दु़म्तामेम् ब:। बे़क्आद आसेली दुम्सो बोक्तामेम् ब:, दु़खाचाद:मी सुसमाचार् ङीन्सोङ् ब:मे।
6
आसीलोङ्माके हो मे़म्, गे़म्चामी गुमी पाचोना गुदीङ् मा:ले।"
7
मेत्तीको़ मे़म्द लाम्तामेना येसुमी युहन्नाके लो: भीड्लाई मो़:ने प्रे़ँस्तामे: "गो़नी तते़र्खा-बुरीखादी मारा को:था घ्लु:तानी? जु:मी यो:सोङ् बक्आ चीन्दालाई को:था घ्लु:तानीम्?
8
गो़नी मारा को:था घ्लु:तानी? मारा मयाम् वा: फी:सीआ मु़रु़लाई को:था? मयाम् वा: फी:सीआद दा हङ्द:के खीम्दी ब:मे।
9
गो़नी मारा को:था घ्लु:तानी मो़को़? मारा पर्मेस्वर्के लो: ळक्आलाई को:था? हो, गु गो़नीलाई मो़:नानी, पर्मेस्वर्के लो: ळक्आदीङ् यो ङो:लो मु़रु़लाई।
10
ए़म् मे़मेङ् हो, आके लो: धर्म-सास्त्रदी रे़ङ्ना ब:, 'को़ङो़, गु अके दु:चालाई ईङाल्ला-ङाल्ला फ्लीङु, मे़म्चामी ईङाल्लादी ईके लाम् झु़म्से।'
11
आजेङ् गु गो़नीलाई मो़:नानी, "मीन्चाद:लाङ् गीक्आद:दीम् बप्तीस्मा-गीआ युहन्नादीङ् ङो:लो आफा गे़मेयो दु़म्तामेम् मा:बो। खेदायो परुदीम् पाईमाखोदी गे़म् हप्पेदीङ् याक्के ब:, मे़म् आम्दीङ् ङो:लो हो।
12
बप्तीस्मा-गीआ युहन्नाके समयदीङ् अखनासम्म सा: थीआ मु़रु़द परुदीम् पाईमाखोके चीचीरे़म्दी मोसोङ् ब:मे।
13
माराङ्खेदा युहन्नाके समयसम्म हप्पे पर्मेस्वर्के लो: ळक्आद नुङ् मुलुमी पर्मेस्वर्के लो: ळक्तामे।
14
गो़नी ब्लाचो बी:सीनी खेदा, राचोम् एलीया ए़मेङ् हो।
15
सु़के ङीन्चोम् नो़: ब:, मे़म्चामी ङीन्ला।
16
ए़म् नीनीनाप्चालाई गु मारानुङ् थाबु? ए़म् दा बजार्दी चाम्सीआ याक्के याक्के बेबाचाद खो़म् हो, मे़म्द:मी आनी वार्चाद:लाई ब्रे:तीमे, को़दीङ् मो़:मे।
17
गुकु ईनीके लागी गे़र्चोङ् बाँसुरी ताप्ताकु़को़ स:लङ् पाक्ताकु़, खेदायो गो़नी सीली मामो़नीवा। गुकु ङक्सोङ् स:लङ् पाक्ताकु खेदायो गो़नी माङङ्नी।
18
माराङ्खेदा युहन्ना जासोङ् तु:सोङ् मारा:वा, को़दीङ् मे़म्द:मी आम्लाई भुत् ला:गेदु़म्ळा ब: दा:सो मो़:मे।
19
मु़रु़के तावा जासोङ् तु:सोङ् राता, को़दीङ् मे़म्द:मी दा:तामे, "को:ने, घीचुवा नुङ् तु:आ, तीरो पोक्आ नुङ् साम्सेचाद:के वार्चा!" नीवा जु़प्ळा ब: दा:चोम् लो: मे़म्के तेद:दीङ् ता:से।"
20
गे़म् गे़म् सहर्दी आम्द:मी हक्सीङ् सा:के तेद पाम्तामेम् बक्ता, आम्द:मी मे़म्लाई धीक्कार् मा:ने पाने प्रे़ँस्तामे, माराङ्खेदा मे़म्द:मी पस्चाताप् मापामेवा।
21
"धीक्कार् गो़लाई, खोराजीन्! धीक्कार् गो़लाई, ए बेथ्सेदा! माराङ्खेदा गो़सीदी पाना सा:के तेद टुरोस् नुङ् सीदोन्दी पाना खेदा मे़म्द:सीमी नेसेङ् भाङ्ग्रा पास्चोमाम् नुङ् पुलु ख्ले़ंस्चोमाम् पस्चाताप् पाने थु़म्सेवा।
22
खेदायो गु गो़नीलाई मो़:नानी, नीसाफ्के नाम्ती टुरोस् नुङ् सीदोन्मी पस्चाताप् मापासेवा खेदायो मे़म्द:सीके दु़खा ईनीकेदीङ् थे: ते़र्ने झाम्।
23
ए कफर्न्हुम्, मारा गो़ धमोसम्मङ् रोङ्से ङा? गो़ खादीदीङ् आधो सम्मङ् तोङ्पा:से। माराङ्खेदा गो़दी पाना सा:के तेद सदोम्दी पाना खेदा मे़म् आनाम् नाम्तीसम्म रईदु़म्वा।
24
खेदायो गु गो़नीलाई मो़:नानी, नीसाफ्के नाम्ती ईनीकेदीङ् दा सदोम् मुलुक्के दु़खा थे: ते़र्ने झाम्।"
25
मखना येसुमी दा:तामे, "ए पापा, परु नुङ् चे़ङ्माखोदीम् प्रभु, गो़नीलाई आनीमखला मो़:नानी, माराङ्खेदा गो़नीमी ए़म् लो: जोक्आ तु़:आ नुङ् बुजेपाआदीङ् ख्लु:सो जु़ल्तानी, खेदायो बेबाचाद:लाई मे़म् कोईसो़ पान्तानी।
26
हो पापा, माराङ्खेदा गो़नीलाई ए़मेङ् जु़प्ळा नास्तानी।
27
"अपापामी हप्पे थोक् गुलाई गीती:मीम् ब:। पापादीङ् आफा सु़मीयो तावालाई मासे़न्ता, को़दीङ् तावादीङ् आफा पापालाई सु़मीयो मासे़न्ता, मेत्तीको़ मे़म्द:मी यो से़न्तीमे आगे़म्द:लाई तावामी पापा कोईसो़ पा:चोम् ग्वा पावा।"
28
"ए हप्पे बाल्आद नुङ् कु़रामी चीप्ळाद अकेदी राने, गु गो़नीलाई नास्पा:नानी।
29
अजुवा गो़नी कु़र्ने, को़दीङ् गुनुङ् चे़ईसीने, गे़ङ्खेदा गु मलीम् नुङ् लोओ ग्वाके ब:ङा। को़दीङ् गो़नी ईनी ळालादी ना:सीने तानी।
30
माराङ्खेदा अजुवा सजीलो ब:, को़दीङ् अके कु़रा हाम्तो ब:।"