12
1
नास्चोम् नाम्ती येसु का: लाईपाना रु:लाङ् लासोङ् बक्तामे, आनी चे:लाद आनी जाथु़मी का:के आबा:ला प्रो:सोङ् जाने प्रे़ँस्तामे।
2
खेदायो फरीसीद:मी ए़म् ताम्तामेको़ येसुलाई मो़:तामे, 'को:ने, ईनी चे:लाद:मी नास्चोम् नाम्ती मारा पासु़ मा:नु़ मे़मेङ् पासोङ् ब:मे।
3
खेदायो आम्द:मी मे़म्द:लाई मो़:तामे, दाउद्मी आम् को़दीङ् आम्नुङ् बक्आद सो:ली बे़क्तामेना मारा पाप्ताम् बक्ता? मारा गो़नी तो़त्तानीम् मा:बो?
4
गेक्सो़ आम्चामी पर्मेस्वर्के खीम् ग:रे ओ:ताको़ पर्मेस्वर्लाई गीना सभ्ले़म् जाप्ताम् बक्ता? मे़म् सभ्ले़म् ना दाउद्मी ना आम्नुङ् बक्आद:मी जासु़ नु़:वा, खाली पुजाहारीद:मी मत्तई जासु़ नु़:वा।
5
मारा मुलुदी मातो़त्थु़ङ् ब:नी, गेक्सो़ नास्चोम् नाम्ती गो़ईमी मारायो पासु़ मा:नु़ खेदायो पुजाहारीद:मी मन्दीर्दी ते पामे, को़दीङ् यो दोस् मान्थीम् थीङ्सीमे?
6
गु गो़नीलाई मो़:नानी, मन्दीर्दीङ् ङो:लो कङ् एके ब:।
7
खेदायो 'गु जार्चोम् माआ, सीस्को:को पा:आ चाईपाङा' ए़म् दा:ना मारा हो मे़म् गो़नी तु़:तीनीवाम् खेदा गो़नीमी दोस् मान्थीम्द:के मारीम्ळा नीसाफ् मापानीवाम् बक्ता।
8
माराङ्खेदा मु़रु़के तावा नास्चोम्के प्रभु हो।
9
मे़म्लाङ् घ्लु:तामेको़ आम्द मे़म्द:के आनी मुलुखीम्दी लाम्तामे।
10
मेके कङ् आगु़ सो़आ मु़रु़ बक्ता। मे़म्द:मी आम्द:लाई दोस् लाईपाचोके लागी हीलो पाम्तामे, "मारा नास्चोम्नाम्ती रु़:आलाई नु़पा:सु़ नु़?
11
आम्द:मी मे़म्द:लाई मो़:तामे, गो़नीदीम् कङ्के कङ् भे़डा ब:, को़दीङ् नास्चोम् नाम्ती मे़म् खाल्डोदी ओ: खेदा, मारा गो़ मे़म्लाई झा:तीको़ आ:तोला माघ्लु़न्दी ङा?
12
भे़डादीङ् मु़रु़ गीसो थे: आथीङ्के ब:? ए़म्चामी नास्चोम् नाम्ती रीम्ळा पाचो मुलुनुङ् दु़आ लो: हो।
13
मेत्तीको़ येसुमी मे़म् मु़रु़लाई मो़:तामे, ईगु़ कीन्तो़। मे़म्चामी आगु़ कीन्ता:, को़दीङ् मे़म् आगु़ आकङ्मे खो़मेङ् रीम्ळा दु़म्वार्ता।
14
फरीसीद:मी आ:तोला लाम्तामेको़ येसुलाई गेक्सो़ सा:चो दा:सो आम्द:के चीचीरे़म्दी मु़लु़ पाने प्रे़ँस्तामे।
15
मेत्तीको़ मे़म् लो: था: ताम्तामेको़ येसु मेकेदीङ् लाईवार्तामे, को़दीङ् हक्सीङ् मु़रु़ येसुनुङ् गक्तामे, को़दीङ् येसुमी मे़म्द हप्पेलाई नु़:पात्तामे।,
16
आम्द सु़ हो, ए़म् सु़लाई यो मामो:चो दा:सोमाम् मे़म्द:लाई नीवासे़ङ्मा गीम्तामे।
17
यसईया पर्मेस्वर्के लो: ळक्आमी दा:ताम् लो: झक्चोलाई ङ ए़म् दु़म्ताम् हो।
18
"को:ने, अवा:ली मे़म्लाई गु यो:तङ्मे ब:, अके दङ्ना,
मे़म्नुङ् गु खुसी ब:ङा,
गु अळाला मे़म्केदी जु़ल्ती गीङा,
को़दीङ् दो:चा-दो:चालाई नीसाफ् ङीन्पादामी।
19
मे़म् ना खीवामो़वा, ना मारी ब्रे:, ना कोईमी मे़म्के से़न्दा लाम् भेक् ङीन्।
20
बुक्आ चीन्दा मे़म्चामी माजीगा,
को़दीङ् बे़क्चो ओ़:सीआ तो:सी मे़म्चामी मासादा,
को़दीङ् मे़म् लो:द नीसाफ्लाई घ्ल:चोम्सम्म आम्द:मी चङ्मे।
21
आकेङ् नीङ्दी दो:चा-दो:चाद:मी आस् पामे।
22
मेत्तीको़ आम्द:केदी भुत्मी सीक्आ काती माताआ नुङ् आसो़ माळक्आ कङ् मु़रु़ रा:तामे। येसुमी मे़म्लाई नु़:पात्तामे, एत्तीसम्म खी मे़म् माळक्आ मु़रु़ ळक्आ नुङ् काती-ताआ दु़म्ता ।
23
मेत्तीको़ हप्पे भीड् सीङ्लङ्दुम्ताको़ दा:ता, मारा ए़म् दाउद्के आतावा ङ दु़म्ने चाबा?
24
खेदायो ए़म् लो: ङीन्तामेको़ फरीसीद:मी दा:तामे, "ए़म् मु़रु़मी भुत्के होपो बाल्जीबुल्लाङ् मत्तई भुत्द:लाई चु़:तामी।"
25
आम्द:मी मे़म्द:के आनी नीवा था: ताम्तामेको़ मे़म्द:लाई मो़:तामे, "आनीदबदी बुक्आ ककङ् पाईमाखो रु़म्मे, को़दीङ् ककङ् सहर्खी खीम् आकेङ् ग:रे बुक्ता खेदा मे़म् ब्री:।
26
सईतान्मी सईतान्लाई घ्लु़न्दा खेदा मे़म् आकेङ् चीचीरे़म्दी फ:से, को़दीङ् मो़खो़ खेदा मे़म्के पाईमाखो गेक्सो़ रईदु़म्ने चाबा?
27
गु बाल्जीबुल्लाङ् भुत्द चु:तु खेदा ईनी तावाद:मी चाईं सु़लाङ् मे़म् घ्लु़न्दीमे? ए़म्चामी मे़म्द ङ ईनीके नीसाफ् पाआ दु़म्मे।
28
खेदायो पर्मेस्वर्के ळालालाङ् गु भुत्द चु:तुमी खेदा पर्मेस्वर्के पाईमाखो ईनीकेदी राने थु़म्स्ताम् ब:।
29
ङाल्ला सा: थीआ मु़रु़लाई माचुक्थु़सम्म, मे़म्के आखीम् ग:रे ओ:सोमाम् मु़रु़द:मी मे़म्के सम्पती ला:ने माचाम्मे, को़दीङ् मत्तई मे़म्द:मी मे़म्के आखीम् पङ्ने चाम्मे।
30
गे़म् गुनुङ् मा:बो, मे़म् अके चीचीरे़म्दी ब:, को़दीङ् सु़मी गुनुङ् माखु़बा, मे़म्चामी फु़दा।
31
मे़म्चाम् गु गो़नीलाई मो़:नानी, मु़रु़द:मी पाम्तामेम् हप्पे साम्से नुङ् ईस्वर्लाई सुवा जे:ना साम्से तील्से, खेदायो से:आ ळालाके चीचीरे़म्दी सुवा जे:ना साम्से मातील्से।
32
कङ्चामी मु़रु़के तावाके चीचीरे़म्दी मारायो दा:ता खेदा मे़म्लाई दु़म्आ साम्से तील्से, खेदायो कोईमी से:आ ळालाके चीचीरे़म्दी ळक्ता खेदा मे़म्लाई दु़म्आ साम्से ए़म् चे़ङ्माखो नुङ् राआ चे़ङ्माखोदी यो मातील्से।
33
"खी ढ़ेक्सीलाई रीम्ळा पाने, को़दीङ् मे़म्के आसी:ची रीम्ळा दु़म्। खी ढ़ेक्सीलाई मारीम्ळा पाने को़दीङ् मे़म्के आसी:ची यो मारीम्ळा दु़म्। माराङ्खेदा आसी:चीदीङ् ढ़ेक्सीलाई से़न्तीया।
34
ए बु़साके बेबाचाद! गो़नी ईनीदबङ् दुस्ट ब:नी, रीम्ळा लो: गेक्सो़ ळङ्ने चाम्नी? माराङ्खेदा ग्वादी भरेदु़म्ळा लो:द ङ सो़:लाङ् घ्लु:मे।
35
रीम्ळा मु़रु़मी आदब ग:रे भरेदु़म्ळा रीम्ळा थोक्लाङ् रीम्ळाङ् थोक् घ्लु़न्दा, खेदायो दुस्ट मु़रु़मी आदबदी भरेदु़म्ळा दुस्टमी दुस्ट थोक्ङ घ्लु़न्दा।
36
गु गो़नीलाई मो़:नानी, हप्पे मीम्खा मापाथु़ ळङ्ना लो:, मे़म् मु़रु़द:मी ळङ्मे, नीसाफ्के नाम्ती राप्सोमाम् मे़म् हीक्चोदु़म्।
37
माराङ्खेदा ईके लोद:मी गो़ दोस् मान्थीम् थीङ्से, को़दीङ् ईके लोद:मी गो़ दोस् लाईमापाएमी।
38
मेत्तीको़ मुलु चे़न्आद नुङ् फरीसीद:दीम् कोई कोईमी आम्द:लाई मो़:तामे, "गुरु, गुकु ईनीकेलाङ् कङ् चीङ्खा को:चो लाम्का।"
39
येसुमी मे़म्द:लाई मो़:तामे, "दुस्ट नुङ् बे़भीचार् पाआ नीनीनाप्चामी चीङ्खा लाम्। खेदायो ए़म् नीनीनाप्चालाई योना पर्मेस्वर्के लो: ळक्आके चीङ्खादीङ् आफा चीङ्खा मागीया।
40
माराङ्खेदा गेक्सो़ योना ङो:लो ङाँके आको:जा ग:रे साम् नाम्ती नुङ् साम् तु़ङाची बक्ता, मो़क्सो़ङ् मु़रु़के तावा यो ब्लोयुके ङे़ले़ग्वादी साम् नाम्ती नुङ् साम् तु़ङाची ब:।
41
नीनबेदीम् मु़रु़द नीसाफ्के नाम्ती ए़म् नीनीनाप्चानुङ् राप्चोदु़म्, को़दीङ् ए़म्लाई दोस् लाईपामे, माराङ्खेदा मे़म्द:मी योनामी ङीन्पात्ता:मीम् लो:मी पस्चाताप् पाम्तामेम् बक्ता, खेदायो को:ने, योनादीङ् ङो:लो कङ् एके ब:।
42
मताम्लुदीम् रानी नीसाफ्के नाम्ती ए़म् नीनीनाप्चानुङ् राप्चो दु़म्, को़दीङ् ए़म्लाई दोस् लाईपावा, माराङ्खेदा आम् ब्लोयुके हार्लाम् छेउदीङ् सोलोमन्लाङ् बुद्दीके लो: ङीन्था राता। खेदायो को:ने, सोलोमन्दीङ् ङो:लो कङ् एके ब:।
43
मासे:आ ळाला मु़रु़दीङ् घ्लु़:सोमाम् ला:, मे़म् नास्चोम् लाम्सोङ् ओबा:नो ठङ्ला खीर्स्चोङ् गङ्, खेदायो गे़लायो माथीदा।
44
मेत्तीको़ मे़म्चामी दा:, गे़म्लाङ् गु घ्लु:सो पीती, मे़मेङ् अखीम्दी ले:सोमाम् लाङा। ले:सो ला:ना मे़म् खीम् आसे:ती, सेपा:ना, को़दीङ् हह-चे़म्चे़म् पाना थीदा।
45
मेत्तीको़ मे़म् ला: को़दीङ् आदबदीङ् थे: दुस्ट आफा चान्नी भुत्ळाला आदबनुङ् रादामी, को़दीङ् आ:घोला ओ:मेको़ मे़म्द मेकेदी बास् ब:मे, को़दीङ् मे़म् मु़रु़के नो:थाम् दसा ङाल्लाम्दीङ् झन् मारीम्ळा दु़म्। ए़म् दुस्ट नीनीनाप्चालाई यो मो़खो़ङ् दु़म्।
46
येसु भीड्द:नुङ् ळक्सोङ् बक्तामेना आनी मामा नुङ् लआद आ:तोला राप्ळा बक्तामे, को़दीङ् आम्द:नुङ् ळक्चो लाम्तामे।
47
मेत्तीको़ कङ्चामी येसुलाई मो़ता:मी, "को:ने, ईनी मामा नुङ् ईनी ङप्सीद आ:तोला राप्ळा ब:मे, को़दीङ् गो़नीनुङ् ळक्चो लाम्सोङ् ब:मे।"
48
खदायो आम्द:नुङ् ळक्आलाई येसुमी मो़:तामे, "अमामा सु़ हो? अलआद सु़ हो?"
49
मेत्तीको़ आम्द:मी आनी गु़मी आनी चे:लाद:लाई कोईसो़ पा:सोङ् दा:तामे, "को:ने, अमामा नुङ् अलआद!
50
माराङ्खेदा सु़मी परुदी बक्आ अपापाके ग्वा रे़म्से, मे़मेङ् अलआ नुङ् असामी, को़दीङ् अमामा हो।