13
1
मे़मेङ् नाम्ती येसु खीम्लाङ् घ्लु:तामेको़ सदु़कु़ पु़म्दी नीस्तामे।
2
मेत्तीको़ एत्ती ङो:लो भीड् आम्द:के ने़न्थादी खु़म्स्ता, खी आम्द रोबोदी ओ:तामेको़ नीस्तामे, मेत्तीको़ हप्पे मु़रु़द चोखेम्दी राप्तामे।
3
आम्द:मी मे़म्द:लाई कथालाङ् हक्सीङ् लो: मो़:तामे,
आम्द:मी दा:तामे, "कङ् वा:चे़र् फु़:आ वा:चे़र् फु़:था घ्लु:ता।
4
मेत्तीको़ ओ़क्सो़ फु़ता:ना, कोई वा:चे़र् लाम्भेक् फु़स्तामे, को़दीङ् चीक्ळालुक्ळाद राम्तामेको़ मे़म् गु़प्जाम्तामे।
5
कोई वा:चे़र् लुङ्द बक्आ ढडेनीदी फु़स्ता, को़दीङ् मेकेदी हक्सीङ् खापी माबकावा, धीरी खापी माबकावाम्चामी मे़म्द धवाङ् वा:तामे।
6
खेदायो नाम् धाप्ताना मे़म्द ङाल्तामे, को़दीङ् आनी सेङ्गीरी माबकावाम्चामी मे़म्द सो़म्तामे।
7
आफाद चाईं चु़द:के आनीलु़म्बु़ ग:रे फु़स्तामे, चु़:द बार्तामेको़ मे़म्द:के आनी साम् दी:ता।
8
आफा वा:चे़र् रीम्ळा खापीदी फु़स्तामे, को़दीङ् कोईमी हीथुम्, कोईमी रुक्वाना, कोईमी साक्ना गुना आका गीम्तामे।
9
सु़के ङीन्चोम् नो़: ब: मे़म्चामी ङीन्ला ।
10
मेत्तीको़ चे:लाद राम्तामेको़ आम्द:लाई मो़:तामे, "गो़नी मे़म्द:नुङ् माराङ् कथालाङ् ळङ्नीम्?"
11
येसुमी मे़म्द:लाई मो़:तामे, गो़नीलाई दा परुदीम् पाईमाखोके लो: जोक्चोम् नीवा गीना ब:, खेदायो मे़म्द:लाई चाईं गीना माब:मे।
12
माराङ्खेदा गे़म्नुङ् ब: मे़म्लाई गीया, को़दीङ् मे़म्नुङ् हक्सीङ् दु़म्। खेदायो गे़म्नुङ् मा:बो, मे़म्नुङ् बक्ळा यो मे़म्लाई रो़:तीया।
13
ए़म्चामी गु कथालाङ् ळङ्ङा, 'माराङ्खेदा मे़म्द:मी को:चो दा को:मे, खेदायो मातामे, ङीन्चो दा ङीन्मे, खेदायो ङीन्मेको़ यो बुजेमापामे।'
14
यसईयामी ळक्ताम् पर्मेस्वर्के लो: मे़म्द:दी झक्ताम् ब:, 'ङीन्चो दा गो़नी ङीन्नी, खेदायो गे़नायो बुजेमापानी, को:चो दा को:नी, खेदायो गे़नायो मातानी।'
15
माराङ्खेदा ए़म् मु़रु़द:के ग्वा बो:दो दु़म्ताम् ब:। को़दीङ् मे़म्द:के नो़: माङीन्आ दु़म्ताम् ब:। को़दीङ् मे़म्द:मी आनी मीची क्रीम्तामेम् ब:, मा:खेदा मे़म्द:मी मीचीमी तामेवा, नो़:मी ङीन्मेवा, ग्वामी बुजेपामेवा, को़दीङ् ले:मेवा को़दीङ् गु मे़म्द:लाई नु़:पातुमीवा।
16
खेदायो ईनी मीचीद आसीलोङ्माके ब:मे, माराङ्खेदा मे़म्द:मी तामे। ईनी नो़: आसीलोङ्माके ब:मे, माराङ्खेदा मे़म्द:मी ङीन्मे।
17
आजेङ् गु गो़नीलाई मो़:नानी, गो़नीमी तान्तानीम् थोक् हक्सीङ् पर्मेस्वर्के लो: ळक्आद:मी नुङ् धर्मी मु़रु़द:मी को:चोम् ङो:लो ग्वा पाम्तामेम् बक्ता, खेदायो मातामेवा, मेत्तीको़ गो़नी ङीन्तानीम् लो: ङीन्चोम् ङो:लो ग्वा पाम्तामे, खेदायो माङीन्मेवा।
18
वा:चे़र् फु़:आके कथा ङीन्ने।
19
गे़ना कङ्चामी पर्मेस्वर्के पाईमाखोके लो: ङीन्, खेदायो बुजेमापावा, मेत्तीको़ दुस्ट रा: को़दीङ् मे़म्के आग्वादी मारा फु़:ना बक्ता, मे़म् रो़:ताको़ लादा। लाम् भेक् फु़:सीआ वा:चे़र् चाईं मे़मेङ् हो।
20
लुङ् बक्आ रु:दी फु़:ना चाईं मे़म् हो, सु़मी लो: ङीन्यो नो:सोङ् खुसीमी मखनाङ् मे़म् ब्लावा।
21
खेदायो मे़म्के आदबके आसेङ्गीरी मा:बोम्चामी मे़म् दो़खो़ समय मत्तई ब्लन्, को़दीङ् लो:मी दु़खा खी सतेपाआ थोक् रा: यो नो:सो मे़म् नो:थाला ले:।
22
चु़द:दी फु़:सीआ चाईं मे़म् हो, सु़मी लो: ङीन्, मे़म्चामी ए़म् चे़ङ्माखोदीम् सुर्ता नुङ् सम्पत्तीदी ब्लोङ्सेको़ लो:लाई ब्लप्ता। को़दीङ् मे़म्चामी आका मागीवा।
23
खेदायो रीम्ळा रु:दी फु़:ना चाईं मे़म् हो, सु़मी लो: ङीन्, को़दीङ् बुजेपावा, को़दीङ् आजेङ् आका सी:पादा। मे़म्चामी फु़दाम् वा:चे़र्लाङ् हीथुम् गुना, रुक्वाना गुना, साक्ना गुना आका सी:पादा।
24
येसुमी मे़म्द:लाई आनायो आकङ्मे कथा ङीन्पात्तामे, परुदीम् पाईमाखो कङ् मु़रु़ खो़मेङ् हो, मे़म्चामी आघे़:रादी रीम्ळा वा:चे़र् फु़:ता।
25
खेदायो मु़रु़द ईप्तामेना आसत्तुर् राता, को़दीङ् चोउजाके आलो़-आलो़दी चोउचा खो़ङ् मो़आ मलीन्दो फु़ता:को़ लाता।
26
गे़ना वा:ताको़ मे़म्दी आका सीत्ता, मे़म् मखना मलीन्दो यो तास्ता,
27
खीम्दीम् होपोके वा:लीद:मी राम्तामेको़ आम्लाई मो़:तामे, "हजुर्, मारा गो़नी ईनी रु:दी रीम्ळा वा:चे़र्फु़:तानीम् माआ? मेके मलीन्दो गे़लाङ् राता?"
28
खीम्दीम् होपोमी मे़म्द:लाई मो़ता:मी, "कोई सत्तुर्मी ओ़खो़ पाप्ताम् हो।" वा:लीद:मी आम्लाई मो़:तामे, "मारा गुकु लाकाको़ रुक्का?"
29
खेदायो आम्चामी दा:ता, मो़खो़ मापाने, मा:खेदा गो़नी मलीन्दो रुङ्नीना चोउजा यो रुङ्नी।
30
आमीङ्ती बेलासम्म नीम्फोलाई ककङ्खङ् बार्ने गीने। मीङ्को़दीङ् खु़ब्ळाद:लाई गु मोदुमी, "ङाल्ला मलीन्दो रुङ्नेको़ चोचोलाई मुठा चुङ्ने, खेदायो चोउजा चाईं अतुङ्ख्रोदी जु़ल्ने।"
31
येसुमी मे़म्द:लाई आकङ्मे कथा मो़:तामे, "परुदीम् पाईमाखो पासाईके आसी:ची खो़मेङ् हो। मे़म् कङ् मु़रु़मी लाता:को़ आरु:दी ख्लु़म्ता।
32
मे़म् हप्पे वा:चे़र्दीङ् याक्के दु़म्, खेदायो गे़ना मे़म् बार्, मखना मे़म् हप्पे साग्द:दीङ् ङो:लो दु़म्, को़दीङ् ढे़क्सी ङ दु़म् वार्दा, धमोदीम् चीक्ळालुक्ळाद रामेको़ मे़म्के आळे़क्सीद:दी जो: पामे।
33
येसुमी मे़म्द:लाई आकङ्मे कथा मो़:तामे। परुदीम् पाईमाखो खमीर् खो़म् हो, मे़म् कङ् मीन्चामी कदे़म् कीलो ग्राम् फु़ल्दी हु़ल्ता (ङु़ल्ता), को़दीङ् मे़म् हप्पे खमीर्मी हम्सो जु़प्ळा मादु़म्थीसम्म मे़म्लाई कठङ् जु़ल्ता।
34
येसुमी ए़म् लो: हप्पे मु़रु़द:लाई कथादी मो़:तामे, कथा मान्थी आम्द:मी मे़म्द:लाई मारायो मामो:मेवा।
35
पर्मेस्वर्के लो: ळक्आलाङ् दा:ना लो: ओ़क्सो़ झक्ता, "गु असो़: कथाद:दी थु़न्दु, चे़ङ्माखो जो़स्तानाङ् ख्लु़:ना जु़ल्ना लो:द गु मो़:नानी।
36
मेत्तीको़ येसुमी भीड्लाई जु़ल्वात्तामेको़ खीम्दी ओ:तामे, को़दीङ् आनी चे:लाद:मी आनीकेदी राम्तामेको़ दा:तामे, "घे़:रादीम् मलीन्दोके कथाके आजे गुकुलाई मो़:कीनी।"
37
आम्द:मी मे़म्द:लाई मो़:तामे, "रीम्ळा वा:चे़र् फु़:आ चाईं मु़रु़के तावा हो।
38
घे़:रा चे़ङ्माखो हो। रीम्ळा वा:चे़र् चाईं पाईमाखोदीम् मु़रु़ हो। को़दीङ् मलीन्दो दुस्ट मु़रु़ हो।
39
मलीन्दो ख्लु़म्ळा सत्तुर् चाईं दीयाबलस् हो। मीङ्आ समय चाईं थोचे रुप्चो हो। चोउजा खु़प्आद चाईं परुचाद हो।
40
गेक्सो़ मलीन्दो रुङ्याको़ सो़पा:या, थोचे रु़म्ना यो मो़खो़मेङ् दु़म्।
41
मु़रु़के तावामी आनी परुचाद फ्ली:मे, को़दीङ् साम्से पापा:आ ककङ् थोक् नुङ् दुस्ट ते पाआ हप्पेलाई मे़म्द:मी आनी पाईमाखोलाङ् खु़म्मे।
42
को़दीङ् आम्द:लाई मी:के ग्रानामीदी घ्रप्तीमे। मेकेदी मु़रु़द ङङ्मे को़दीङ् आनी ख्लु़ सीर्दीमे।
43
मेत्तीको़ धर्मी मु़रु़द आनी पापाके पाईमाखोदी नाम् खो़म् हो़आ दु़म्मे। सु़के नो़: ब:, मे़म्चामी ङीन्ला।
44
परुदीम् पाईमाखो कङ् घे़:रादी थीम्सो जु़ल्ना सम्पती खो़म् हो, मे़म् कङ् मु़रु़मी थीदाको़ ख्लु़:ताको़ जु़ल्, को़दीङ् आनन्द दु़म्को़ ला:, मेत्तीको़ आकेनुङ् बक्आ हप्पे ले:, को़दीङ् मे़म् घे़:रा जाबा।
हक्सी आथीङ्के मोती
45
आनायो परुदीम् पाईमाखो रीम्ळा मोतीद लाम्आ कङ् बे़पारी खो़म् हो।
46
मे़म्चामी कङ् हक्सीङ् आथीङ्के मोती थी:ता, को़दीङ् ला:को़ आकेदी बक्आ हप्पे ले:को़ मे़म् मोती जाबा।
47
परुदीम् पाईमाखो सदु़कु़दी आम्ना कङ् ळा:लुङ् खो़मेङ् यो हो। मे़म्दी हप्पे खा:ले ङाद ओ:मे।
48
मेत्तीको़ ळा:लुङ् भरेदु़म्ताको़दीङ् मु़रु़द:मी मे़म्लाई चोखेम्दी सल्तामेको़ घ्लु़न्तामे, को़दीङ् नीस्तामेको़ रीम्ळा जत्ती भाँडोदी पीक्तामे, को़दीङ् मारीम्ळा जत्तीलाई आ:तोला घ्रप्तामे।
49
थोचे रु़म्ना ओ़खो़मेङ् दु़म्, परुचाद:मी रामेको़ दुस्टद:लाई धर्मीद:के आनीलु़म्बु़लाङ् फङ्मे।
50
को़दीङ् मे़म्द:लाई मी:के ग्रानामी:दी घ्रप्तीमे, मेके मु़रु़द ङङ्मे आनी ख्लु़: सीर्दीमे।"
51
येसुमी हीलो पाम्तामे, "मारा गो़नी ए़म् लो: हप्पे बुजे पान्तानी?" मे़म्द:मी दा:तामे, "बुजे पाक्ताकु़।"
52
मेत्तीको़ येसुमी मे़म्द:लाई मो़:तामे, "ए़म्चाम् परुदीम् पाईमाखोके लो: चे़न्ना ककङ् मुलु चे़न्आ कङ् खीम्दीम् होपो खो़म् हो। गे़म्चामी आके ढुकुटीलाङ् आनीन्ता नुङ् आमाईसाम् सर्दम्द आ:तोला घ्लु़न्दा।"
53
ए़म् कथा दा:ने थु़म्तामेको़दीङ् येसु मेकेदीङ् लाम्तामे।
54
मेत्तीको़ आनी सहर्दी राम्तामेको़ आम्द:मी मे़म्द:के मुलुखीम्दी मे़म्द:लाई ओ़खो़म् चे़न्तामे, खी सीङ्लङ् दुम्तामेको़ मे़म्द:मी दा:तामे, ए़म्लाई ए़म् बुद्दी नुङ् सीङ्लङ् पा:आ ते पाचोम् सा:द गे़लाङ् ताप्ता?
55
मारा ए़म् सीङ्के ते पाआके आतावा माआ? मारा ए़म्के आमामाके नीङ् मरीयम्, को़दीङ् ए़म्के आङप्सीद याकुब्, योसेफ्, सीमोन् नुङ् यहुदा माआ ङा?
56
मारा ए़म्के आसामीद हप्पे गो़ईनुङ् माब:मे ङा? ए़म् हप्पे लो: ए़म्चामी गे़लाङ् ताप्ता?"
57
मेत्तीको़ मे़म्द येसुनुङ् आनी सोक्सो बोक्ता। खेदायो येसुमी मे़म्द:लाई मो़:तामे, "पर्मेस्वर्के लो: ळक्आद:लाई आनी सहर् नुङ् आनीकेङ् खीम्दीङ् आफा हप्पे ठङ्दी सीलाखा दु़म्।"
58
मेत्तीको़ मे़म्द:मी मारे़प्तीमेवाम्चामी येसुमी मेकेदी सा:के हक्सीङ् तेद मापामेवा।