14
1
मखना गालील् नुङ् पेरीया प्रदेस्दी सासन् पाआ हेरोद्मी येसुके खबर् ङीन्ता।
2
मे़म्चामी आके वा:लीद:लाई मो़ता:मी "आम् बप्तीस्मा-गीआ युहन्ना हो। आम् बे़क्आदीङ् आसेली दु़म्ताम् ब:। मे़म्चाम् आम्लाङ् ए़म् सा:के ते दुम्सोङ् ब:।
3
माराङ्खेदा हेरोद्मी आलआ फीलीप्के आनाम्नामी हेरोदीयास्मी पाचोना युहन्नालाई सीसो चुक्ता:को़ कारागार्दी पीक्ताम् बक्ता।
4
युहन्नामी हेरोद्लाई ओ़खो़ मो़:ताम् बक्ता, "गो़नीमी मे़म्लाई नाम्नामी पासो जुल्चो नीयम्के चीचीरेम्दी दु़म्।"
5
मे़म्चाम् हेरोद्मी आम्लाई सा:चो लाम्ता, खेदायो मु़रु़द:दीङ् मे़म्ङी:वा, माराङ्खेदा मे़म्द:मी आम्लाई पर्मेस्वर्के लो: ळक्आ दा:सो मीम्सीमेवा।
6
खेदायो गे़ना हेरोद् गीक्ताम् नाम्ती राता, मेत्तीको़ हेरोदीयास्के आतामीमी मे़म्द:के आनी ङाल्लादी सीली मो़प्ता:को़ हेरोद्लाई गे़र्स्पात्ता।
7
मो़खो़ दु़म्ताना आम्चामी मे़म्लाई मारा पु़न् खेदायो गीचोम् रोळो खीक्ता:।
8
खेदायो मे़म्के आमामामी चे़न्ताम्चामी मे़म्चामी दा:ता, बप्तीस्मा-गीआ युहन्नाके आपीया गुलाई एकेङ् थाल्दी गीईनी।
9
हङ्लाई सोक् दु़म्ता खेदायो आके रोळो नुङ् बो:तीद बक्तामेम्चामी मे़म्चामी मो़खो़मेङ् हुकुम् गीप्ता:मी।
10
को़दीङ् मे़म्चामी कारागार्दी युहन्नाके आपीया चर्पात्ता:मी
11
मेत्तीको़ आपीया थाल्दी रा:तामेको़ मे़म् स:लमीलाई गीम्तामे, मे़म्चामी आमामाकेदी ला:ता।
12
मे़म्दीङ् नो:था युहन्नाके आचे:लाद राम्तामेको़ आके बे़क्आ राम् ला:तामेको़ थीम्तामे। मेत्तीको़ मे़म्द लाम्तामेको येसुलाई खबर्गीम्तामे।
13
गे़ना येसुमी ए़म् लो: ङीन्तामे आम्द रोबोदी ओ:सोमाम् आनीदबङ् मेकेदीङ् आकङ्मे फीत्तोदी लाम्तामे। ए़म् ङीन्तामेको़ भीड् सहर्दीङ् गक्सोङ् आम्द:केला लाता।
14
चोखेम्दी झक्तामेको़ मे़म्ङो:लो भीड् ताम्तामेको़ आम्द:मी मे़म्द:लाई सीस्को:को पात्तामे, को़दीङ् मे़म्द:के आनी रु़:आद:लाई नु़:पात्तामे।
15
नाम्फा चे:लाद:मी ओ़खो़ दा:सोङ् आम्द:केदी राम्तामे, "ए़म् सु़यो माबक्आ ठङ् हो, को़दीङ् नाम् रीङ्ने थु़म्स्ता। भीड्लाई फ्ली:ने, को़दीङ् ए़म्द दे़ल्दे़ल्दी लामेलाको़ आनीदबके लागी जाचोम् जाम्मेला।"
16
खेदायो येसुमी मे़म्द:लाई मो़:तामे, "मे़म्द लाचो मा:दु़म्। गो़नीमी ङ ए़म्द:लाई जाचो गीने।"
17
मे़म्द:मी आम्द:लाई मो़:तामे, "एके गुकुनुङ् ङो सभ्ले़म् नुङ् नीक्सी ङाँ मत्तई ब:।"
18
मेत्तीको़ आम्द:मी दा:तामे, "मे़म् अकेदी रा:ने।"
19
आम्द:मी भीड्लाई स्वादी नी:सीने मो़:तामे, को़दीङ् मे़म्ङो सभ्ले़म् नुङ् नीक्सी ङा ब्लाम्तामेको़ परुला को:सो पर्मेस्वर्लाई आनीमखला गीम्तामेको़ सभ्ले़म् जीक्सोमाम् चे:लाद:लाई गीम्तामे, को़दीङ् चे:लाद:मी मु़रु़द:लाई योक्ती गीम्तामे।
20
मे़म् हप्पेमी रु:मो़खो़ जाम्तामे, को़दीङ् हे़न्आ छे़स्कोद मे़म्द:मी कदे़म्नीक्सी कपाल् ठे़क्ठे़क् रु़प्तामे।
21
मीन्चा नुङ् बेबाचाद:दीङ् आफा जाआद झन्नई ङो हजार् वाईंसाद बक्तामे।
22
आम्द:मी भीड्लाई फ्ली:तामेना चे:लाद:लाई रोबोदी ओ:सो आम्द:दीङ् ङाल्ला हारे हाम्बा ला:पात्तामे।
23
भीड्लाई लापात्तामेको़दीङ् आम्द प्रार्थना पाथा कोङ्को त:रे लाम्तामे। नाम् रीक्ताना आम्द आनी गी:चाङ् मेके बक्तामे।
24
खेदायो रोबो मखनासम्म चोखेम्दीङ् सदु़कु़ त:रे हक्सीङ् हारे झङ्ने थु़म्स्ताम् बक्ता। मेत्तीको़ जु: कलीङ् खी:सोङ् बक्ताम्चामी रोबो छाल्मी हक्सीङ् यो:सोङ्बक्ता।
25
बीहान् साम् घ्री:ताना आम्द सदु़कु़ त:रे गक्सोङ् मे़म्द:केदी राम्तामे।
26
चे:लाद:मी आम्द:लाई सदु़कु़ त:रे गक्सोङ् ताम्तामे, मेत्तीको़ ङी:तामेको़ मे़म्द:मी दा:तामे, "ए़म् दा सीगाला हो!" को़दीङ् मे़म्द आनी ङी:मामी ब्रे:तामे।
27
खेदायो येसुमी मे़म्द:लाई ओ़खो़ मो़:तामे, "आँट् पाने, गु ङ हो, माङी:ने।"
28
पत्रुस्मी आम्द:लाई मो़ता:मी, "ए प्रभु, गो़नी ङ हो खेदा, गुलाई यो ईनीकेदी ळ:कु़ त:रे पीओ़ मो़:ईनी।"
29
आम्द:मी दा:तामे, "पीओ़", पत्रुस् रोबोलाङ् तोस्चो येसुकेदी लाचोलाई ळ:कु़ त:रे गङ्ने प्रे़ँस्ता।
30
खेदायो जु: मारी खीत्ताम्चामी मे़म् ङी:ता, को़दीङ् वाम्चोङ् ओ़स्ता, मेत्तीको़ मे़म्चामी ब्रे:सोङ् दा:ता, "ए प्रभु, गुलाई ब्लन्पा:ईनी।"
31
मेत्तीको़ येसुमी धवा धवा आनी गु़ गीम्तामेको़ मे़म्लाई झा:वार्तामे, को़दीङ् मे़म्लाई मो़:तामे, "ए दो़खो़ रे़प्आ मु़रु़, माराङ् सङ्का पाप्ती?"
32
आम्द रोबोदी ओ:तामे मेत्तीको़ जु: खी:चो वा:ता।
33
रोबोदी बक्आद:मी आम्द:लाई सेवा चन्तामे, को़दीङ् दा:तामे, "आजेङ् गो़नी पर्मेस्वर्के तावा हो।"
34
हारे हाम्बा झक्तामेको़दीङ् आम्द गनेसरेत्के वालेकोदी झक्राम्तामे।
35
गे़ना मे़म् ठङ्दीम् मु़रु़द:मी आम्द:लाई से़न्तामे, मेत्तीको़ मे़म्द:मी हर्ला अखलाम् दे़ल्ला खबर् फ्ली:तामे, को़दीङ् मु़रु़द:मी आलामोमी सीक्आद हप्पेलाई आम्द:केदी रा:तामे।
36
मे़म्द:मी आम्द:के वा:के आफु़र्का मत्तई खेदायो खु़:ने ताकाला दा:सो आम्द:नुङ् ले़म्को पाम्तामे, को़दीङ् गेसोमी खु़त्तामे मे़म्द नु़म्तामे।