15
1
येरुसलेम्लाङ् राआ फरीसीद नुङ् मुलु चे़न्आद येसुकेदी राम्तामे, को़दीङ् दा:तामे,
2
ईनी चे:लाद:मी ङा:चाद:के पातीतु़म्री माराङ् वार्दीमेम्? माराङ्खेदा मे़म्द जाचोदीङ् ङाल्ला आनी गु़ माची:सीमे।
3
आम्द:मी मे़म्द:लाई मो़:तामे, गो़नी माराङ् ईनी पातीतु़म्रीके लागी पर्मेस्वर्मी आरे पाना लो: मारे़म्सीनी?
4
माराङ्खेदा पर्मेस्वर्मी दा:तामेम् ब:, 'ईनी पापा मामाके सीलाखा जु़ल्ने, को़दीङ् पापा खी मामाके चीचीरे़म्दी दुस्ट लो: गे़म्चामी ळङ्, मे़म्चाईं आजेङ् सा:चोङ् दु़म्।
5
खेदायो गो़नी चाईं दा:नी गे़म्चामी आपापा मामालाई दा:, 'गो़नीमी अकेलाङ् मारा ताने चाम्नीवा, मे़म् पर्मेस्वर्लाई गी:तङ्मे ब: मे़म्चामी आपापा-मामाके सीलाखा जुल्चो मा:दु़म्।
6
ओ़क्सो़ गो़नीमी ईनी पातीतु़म्रीके लागी पर्मेस्वर्के लो: फात्तानीम् ब:।
7
नाक्ले़न्तीद यसईया पर्मेस्वर्के लो: ळक्आमी ईनी लो:दी ठीकाङ् दा:ता,
8
ए़म् दो:चामी गुलाई आसु़न्दु़मी मत्तई सीलाखा जु़ल्, खेदायो मे़म्द:के आनी ग्वा अकेदीङ् हारे ब:।
9
मे़म्द म:मसीसीदी अके आसीलोङ्मा पामे, खेदायो मे़म्द:मी चे़न्नाद मु़रु़द:मी मीम्सो पाईपी:ना लो:द मत्तई हो।
10
आम्द:मी मु़रु़द:लाई आनीकेदी ब्रेत्तामे, को़दीङ् मे़म्द:लाई मो़:तामे, "ङीन्ने को़दीङ् तु़:तीने।"
11
मारा सु़न्दु़ ग:रे ओ: मे़म्चामी मु़रु़द:लाई मासे:आ मापावा, खेदायो मारा सु़न्दु़लाङ् आ:तोला घ्लु:, मे़म्चामी ङ मु़रु़लाई मासे:आ पावा।
12
मे़म्दीङ् नो:था चे:लाद राम्तामेको़ आम्द:लाई मो़:तामे, "मारा गो़नीलाई था: ब:, फरीसीद ईनी लो: ङीन्तामेको़ आनी सोक्सो बोक्ताम् ब:?"
13
खेदायो आम्द:मी दा:तामे, परुदी बक्आ अपापामी माख्लु़म्मेवाम् ककङ् ढे़क्सी रुङ्सीमे।
14
मे़म्द:लाई प्लन्ने, मे़म्द काती माताआलाई लाम् कोईसो़ पा:आद हो। काती माताआमी काती माताआलाई खुल् खेदा मे़म् नीम्फो खाल्डोदी ओ:से।
15
पत्रुस्मी आम्द:लाई मो़ता:मी, "गुकुलाई ए़म् कथाके आजे मारा हो, मो़:कीनी।"
16
आम्द:मी दा:तामे, "मारा गो़नी यो आनायो बुजे मापानी?"
17
मारा गो़नीलाई था: मा:बो, मारा सु़न्दु़ ग:रे ओ: मे़म्को:जादी ला: वार्दा, को़दीङ् आ:तोला घ्लु़: वार्दा?
18
खेदायो गे़म् लो:द सु़न्दु़लाङ् आ:तोला घ्लु़:मे, मे़म्द ग्वालाङ् घ्लु़:मे, को़दीङ् मे़म्द:मीङ् मु़रु़द:लाई मासे:आ पामे।
19
माराङ्खेदा ग्वालाङ् मारीम्ळा मीम्खा, सा:चो, हारेमे मीन्चानुङ् गक्चो, कुचो, लीमो चल्चो नुङ् सुवा जे:चो आ:तोला घ्लु:मे।
20
ए़म् लोद:मी चाईं मु़रु़लाई मासे:आ पामे। खेदायो गु़ माचीस्थु़ङ् जावाना आम् मासे:आ मा:दु़म्।"
21
मेत्तीको़ येसु मेकेदीङ् घ्लु:तामे, को़दीङ् टुरोस् नुङ् सीदोन्दीम् दे़ल्ला लाम्तामे।
22
मे़म् दे़ल्लाङ् कङ् कनानी मीन्चा राताको़ ब्रे:सोङ् दा:ने प्रे़ँस्ता, "ए प्रभु, दाउद्के आतावा, गुलाई सीस्को:को पा:तीनी। अतामी भुत्मी हक्सीङ् सतेपाप्ताम् ब:।"
23
येसुमी मे़म्लाई मारायो मामो़:मेवा। आनी चे:लाद:मी राम्तामेको़ आम्द:लाई ले़म्को पाम्तामे, "ए़म्लाई फ्ली:ने, माराङ्खेदा ए़म् ब्रे:सोङ् ईक्के नो:था नो:था पीसोङ् ब:।"
24
आम्द:मी दा:तामे, "गु ईस्राएल् दो:चाके जाम्ळा भे़डाद:के लागी मत्तई फ्लीती:मीम् हो।"
25
खेदायो मे़म्मीन्चा पीताको़ आनी ङाल्लादी खु़म्ता:को़ दा:ता, "ए प्रभु, गुलाई ख्लाईनी।"
26
आम्द:मी दा:तामे, "बेबाचाद:के सभ्ले़म् ब्लासोमाम् ख्लीचाद:लाई घ्रप्ती गीचो रीम्ळा मा:दु़म्।"
27
मे़म्चामी दा:ता, "हो प्रभु, खेदायो ख्लीचाद:मी यो दा आनी होपोके टेबल्लाङ् दोक्आ छे़स्कोद जामे।
28
मेत्तीको़ येसुमी मे़म्लाई मो़:तामे, "ए मीन्चा, ईके रे़प्सुवा ङो:लो रेछा, गो़ ग्वा पाईम् खो़ङ् गो़लाई दु़म्ला।" मे़म्के आतामी मखनाङ् नु़ता वार्ता।
29
येसु मे़म्लाङ् घ्लु:तामेको़ गालील् सदु़कु़के चोखेम्दुम्सोङ् लाम्तामे, को़दीङ् जोजुओम्फु त:रे लाम्तामेको़ मेके नीस्तामे।
30
मेत्तीको़ ङो:लो ङो:लो भीड् आम्द:केदी राम्तामे, को़दीङ् मे़म्द:मी कङ्खङ् रा:तामेम् खु़ली-मानु़आ, लुलो, काती माताआ, सो़: माळक्आ नुङ् आफा हक्सीङ् आम्द:के खु़ली पु़म्दी जु़ल्तामे, मेत्तीको़ आम्द:मी मे़म्द:लाई नु़:पात्तामे।
31
एकेसम्म खी, ला:टाद ळक्तामेम्, लुलोद नु़म्तामेम्, खु़ली-मानु़आद गक्तामेम्, को़दीङ् काती माताआद:के आनी मीची होङ्स्ताम् ताम्तामेको़ मु़रु़द सीङ्लङ् दुम्तामे, को़दीङ् मे़म्द:मी ईस्राएल्के पर्मेस्वर्के प्रसंसा पाम्तामे।
32
मेत्तीको़ येसुमी आनी चे:लाद:लाई ब्रेत्तामेको़ मो़:तामे, "गु ए़म् भीड्द:लाई ताङाको़ माब्रो:सीङा, माराङ्खेदा ए़म्द गुनुङ् ब:मेम् आना साम् नाम्ती दु़म्ता, को़दीङ् ए़म्द:नुङ् जाचोम् मारायो मा:बो। ए़म्द:लाई मान्जाङ् फ्ली:चो अग्वा माबी:से। मा:खेदा मे़म्द लाम्दी आनी जाथीम् गङ्ने माचाम्मे।"
33
चे:लाद:मी आम्द:लाई मो़:तामे, "एकोम् ङो:लो भीड्लाई ए़म् सु़ यो माबक्आ ठङ्दी जाचो गीचोलाई गो़ई गे़लाङ् एत्रोम् सभ्ले़म् रा:चो?"
34
येसुमी मे़म्द:लाई मो़:तामे, "गो़नीनुङ् गेसो सभ्ले़म् ब:?" मे़म्द:मी दा:तामे, "चान्नी सभ्ले़म् नुङ् आका:ची आ:चा आ:चा ङाद ब:मे।
35
आम्द:मी भीड्लाई खापीदी नी:सीने मो़:तामे।
36
आम्द:मी मे़म् चान्नी सभ्ले़म् नुङ् ङा ब्लाम्तामेको़ आनीमखला गीम्तामे। को़दीङ् सभ्ले़म् जीक्तामेको़ चे:लाद:लाई गीम्तामे, मेत्तीको़ चे:लाद:मी मु़रु़द:लाई गीम्तामे।
37
मे़म्द हप्पेमी जाम्तामे को़दीङ् रु:तामे। को़दीङ् हे़न्आ छे़स्कोद मे़म्द:मी चान्नी कपाल् खु़प्तामे।
38
मीन्चाद, बेबाचाद मान्थी जाआद ले हजार् वाईंसाद बक्तामे।
39
मे़म् भीड्लाई फ्लीतामेको़दीङ् आम्द रोबोदी ओ:तामे, को़दीङ् मागादान्के वालेकोला लाम्तामे।