16
1
फरीसीद नुङ् सदुकीद:मी येसुकेदी राम्तामेको़ आम्द:लाई जाँच् पाचोके लागी परुलाङ् कङ् चीङ्खा कोईसो़ पा:तीकीनी दा:तामे।
2
खेदायो येसुमी मे़म्द:लाई मो़:तामे, "नाम् रीङ् को़दीङ् गो़नी दा:नी 'दील्ला नाम्ती रीम्ळा दु़म् रेछा, माराङ्खेदा धमो लाला मो़ताम् ब:।'
3
बीहान् चाईं दा:नी, 'धमो लालाम् नुङ् कुक्से़ल्मी सु़म्ताम् ब:, आना जु: रे़वा पावा रेछा।' गो़नी धमो को:सोमाम् नाम्ती गेखो़म् दु़म् दा:ने चाम्नी, खेदायो समयके चीङ्खाके आजे दा:ने माचाम्नी।
4
दुस्ट नुङ् बे़भीचार् पाआ नीनीनाप्चामी चीङ्खा लाम् , खेदायो योनाके चीङ्खादीङ् आफा चीङ्खा मे़म्लाई मागीया। मेत्तीको़ येसु मे़म्द:लाई जु़ल्वात्तामेको़ लाम्तामे।
5
चे:लाद हाम्बादी झक्राम्तामेना मे़म्द:मी सभ्ले़म् कुर्चो प्ले़न्तामे रेछा।
6
येसुमी मे़म्द:लाई मो़:तामे, "नीवा पाने, फरीसी नुङ् सदुकीद:के खमीर्लाङ् होस् ब:ने।
7
मे़म्द:मी आनीदबदी लो: पाने प्रे़ँस्तामे। "गो़ई सभ्ले़म् मारा:यावा, को़दीङ् आम्द:मी ओ़खो़ दा:तामेम् हला।"
8
येसुमी ए़म् था: ताम्तामेको़ दा:तामे, "ए दो़खो़ रे़प्आद!, गो़नीनुङ् सभ्ले़म् मा:बो दा:सोमाम् माराङ् लो: पानीम्?
9
मारा गो़नी आनायो मातु़:तीनी? ङो हजार्के लागी ङो सभ्ले़म्के लो: गो़नी आनायो मामीम्तीनी? गो़नीमी गेसो कपाल् खुप्तानीम् बक्ता?
10
मेत्तीको़ ले हजार्के लागी चान्नी सभ्ले़म्, को़दीङ् गेसो कपाल् गो़नीमी खुप्तानीम् बक्ता?
11
गु गो़नीलाई सभ्ले़म्के लो:दी दा:तीम् माआ दा:सोमाम् गो़नी माराङ् मातु़:तीनी? खेदायो फरीसी नुङ् सदुकीद:के खमीर्दीङ् होस् ब:ने।
12
मेत्तीको़ मे़म्द:मी तु़त्तामे, खी आम्द:मी सभ्ले़म्के खमीर्दीङ् माआ फरीसी नुङ् सदुकीद:मी चे़न्ना लो:दीङ् होस् ब:ने दा:तामेम् रेछा।
13
येसु कईसेरीया फीलीप्पीदीम् मुलुक्दी राम्तामेको़दीङ्, आम्द:मी आनी चे:लाद:लाई हीलो पाम्तामे, "मु़रु़द:मी मु़रु़के तावालाई सु़ हो दा:मे?"
14
मे़म्द:मी दा:तामे, कोईमी बप्तीस्मा-गीआ युहन्ना, कोईमी एलीया, को़दीङ् कोईमी यार्मीया हो खी पर्मेस्वर्के लो: ळक्आद:दीम् कङ् दा:सोमाम् दा:मे।
15
येसुमी मे़म्द:लाई हीलो पाम्तामे, "गो़नी मारा दा:नी, गु सु़ हो?"
16
सीमोन् पत्रुस्मी दा:ता, "गो़नी ख्रीस्ट् हो, आसेली पर्मेस्वर्के तावा।"
17
येसुमी मे़म्लाई मो़:तामे, योनाके आतावा सीमोन्, गो़ आसीलोङ्माके दु़मो़। माराङ्खेदा मु़रु़लाङ् गो़ ए़म् ताप्ती:मे माआ, परुदीम् अपापामी ता:पात्तेमीम् हो।
18
गु गो़लाई मो़:ना, खी गो़ पत्रुस् हो। गु अके मन्डली ए़म् फुम्लो लुङ् त:रे जुलु, को़दीङ् नरक्दीम् लाप्चोद मे़म्दीङ् माघ्ल:मे।
19
गु गो़लाई परुदीम् पाईमाखोदीम् साँचोद गीना। मारा गो़ ब्लोयुदी खीक्ती, मे़म् परुदी खीङ्से, को़दीङ् मारा गो़ ब्लोयुदी प्रगी, मे़म् परुदी प्रङ्से।"
20
आम्द ख्रीस्ट् हो दा:सोमाम् सु़लाई यो मामो:चो दा:सोमाम् येसुमी चे:लाद:लाई आरे पाम्तामे।
21
आम्द गेक्सो़ यरुसलेम् लाचो दु़म्, को़दीङ् जोक्आ ङा:चाद नुङ् आङो:लो पुजाहारीद को़दीङ् मुलु चे़न्आद:लाङ् हक्सीङ् दु़खा ताचो दु़म्, सा:पास्चो दु़म्, को़दीङ् साम् नाम्ती नो:था आसेली दुम्सो बोक्चो दु़म् दा:सो आम्द:मी मखनाङ् आनी चे:लाद:लाई मो़:ने प्रे़ँस्तामे।
22
पत्रुस्मी आम्द:लाई आकङ्मेला ला:तामेमीको़ हु़ने प्रे़ँस्ता, "पर्मेस्वर्मी ओ़खो़ मापामेला, प्रभु, गो़नी त:रे ओ़खो़म् गे़नायो मा:दु़म्।"
23
खेदायो येसुमी ले:तामेको़ पत्रुस्लाई मो़:तामे, "ए सईतान्, अङाल्लादीङ् हारे लाओ़, गो़ गुलाई ळाल्आ हो। माराङ्खेदा गो़ पर्मेस्वर्के लो:दी माआ, मु़रु़द:के लो:दी नीवा पाई।
24
मेत्तीको़ येसुमी आनी चे:लाद:लाई मो़:तामे, कङ् मु़रु़ गुनुङ् गक्चोम् ग्वा पावा खेदा, मे़म्चामी आदबलाई वार्दाला, को़दीङ् आक्रुस् कुर्सो गुनुङ् गङ्ला।
25
माराङ्खेदा सु़मी आके साम् ब्लन्पादा , आम् मे़म् गुमेपावा, खेदायो सु़मी आसाम् अके लागी गुमेपावा, मे़म्चामी मे़म्तावा।
26
हप्पे चे़ङ्माखो तासोमामी यो आके साम् माब्लन् खेदा, मु़रु़लाई मारा फाईदा? खी मु़रु़मी आके साम्के सा:टो मारा गीने चाबा?
27
माराङ्खेदा मु़रु़के तावा आपापाके महीमादी आनी परुचाद:नुङ् रा:, को़दीङ् मखना आम्चामी ककङ् मु़रु़लाई मे़म्के ते खो़मेङ् नीमे़क् गीमे।
28
आजेङ् गु गो़नीलाई मो़:नानी, एके राप्ळाद:दीम् गेसोमी मु़रु़के तावालाई आके पाईमाखोदी रासोङ् बक्आ मातामेम्सम्म बे़क्खा मादाप्तीमे।"