17
1
ए़म्के रुक्वा नाम्ती नो:था येसुमी पत्रुस्, याकुब्नुङ् आलआ युहन्नालाई आनीदबनुङ् कङ् जोजुओम्फु त:रे ला:तामे।
2
मे़म्द:के आनी ङाल्लादी आनी ङाली फेरेदु़म्ता। येसुके ङाली नाम् खो़मेङ् हो़ता।
3
को़दीङ् आनी वा: नाम्के आछेछेवा खो़मेङ् बुबु मो़ता। मेत्तीको़ मोसा नुङ् एलीया आम्द:नुङ् ळक्सोङ् बक्आ ताम्तामे।
4
पत्रुस्मी येसुलाई मो़ता:मी, "ए प्रभु, गो़ई एके ब:याम् रीम्ळा ब:, ईनीके ग्वा ब: खेदा गु एके साम् से:आ बास् बक्दीखा ठङ् बनेपाङा। कङ् ईनीके लागी, कङ् मोसाके लागी को़दीङ् कङ् एलीयाके लागी।"
5
आम् ळक्सोङ् बक्ताना, उज्जार् कुक्से़ल्मी मे़म्द:लाई सु़म्ता:मी, को़दीङ् मे़म् कुक्से़ल्लाङ् कङ् से़न्दा यु़ता, "ए़म् अके दङ्ना तावा हो, ए़म्नुङ् गु मारी गे़र्स्तीम् ब:, ए़म्चामी ळङ्मे लो: ङीन्ने।"
6
गे़ना चे:लाद:मी ए़म् ङीन्तामे, मेत्तीको़ मे़म्द मारी ङी:तामेको़ खु़म्मा पाम्तामे।
7
खेदायो येसुमी राम्तामेको़ मे़म्द:लाई खु:सोङ् दा:तामे, "बोङ्ने, माङी:ने।"
8
मे़म्द:मी आनी मीची आगे:था को:तामेना येसुदीङ् आफा सु़ यो मातामेवा।
9
गे़ना आम्द जोजुओम्फुलाङ् तोस्चोङ् बक्तामे, येसुमी मे़म्द:लाई मो़:तामे, "गे़नासम्म मु़रु़के तावा बे़क्सोमाम् आसेली दुम्सो मा:बोङ्, मखनासम्म ए़म् दर्सन्के लो: सु़लाई यो मामो:चोमी।"
10
मेत्तीको़ चे:लाद:मी ओ़खो़ दा:सो हीलो पाम्तामे, "माराङ् मुलु चे़न्आद:मी ङाल्ला एलीया राचो दु़म् दा:सो दा:मे?"
11
आम्द:मी मे़म्द:लाई मो़:तामे, "एलीया आजेङ् रासोङ् ब:, को़दीङ् मे़म्चामी हप्पे लो: आनायो दुम्चो दु़म्आ खो़म् पावा।
12
खेदायो गु गो़नीलाई मो़:नानी, "एलीया ङाल्लाङ् राताम् ब:, को़दीङ् मु़रु़द:मी आम्लाई मासे़न्तीमेवा, आम्लाई मे़म्द:मी आनी ग्वा खो़ङ् पाम्तामे। मो़क्सो़ङ् मु़रु़के तावामी यो मे़म्द:के गु़लाङ् दु़खा ताचो दु़म्।
13
मेत्तीको़ आम्द:मी बप्तीस्मा-गीआ युहन्नाके लो: मे़म्द:लाई मो़:तामेम् हो दा:सोमाम् चे:लाद:मी तु़त्तामे।
14
मेत्तीको़ आम्द भीड् बक्आ ठङ्दी राम्तामेको़दीङ् कङ् मु़रु़मी येसुके आनी ङाल्लादी राताको़ आपोक्ची तीङ्स्चो दा:ता,
15
"प्रभु, अतावालाई सीस्को:को पा:तीने, माराङ्खेदा मे़म् छा:रे आलामोमी सीक्ताम् ब:, को़दीङ् ङो:लो दु़खा तासोङ् ब:। मे़म् कईले मी:दी ओ:, कईले ळ:कु़दी ओ:।
16
गु मे़म्लाई ईनी चे:लाद:केदी रा:तङ्, खेदायो मे़म्द:मी नु़पा:ने माचाम्मेवा।
17
मेत्तीको़ येसुमी दा:तामे, "ए दो़खो़ रे़प्आद नुङ् लाम् क्लो़:आ नीनीनाप्चा, गे़नासम्म गु गो़नीनुङ् दु़म्ङा? गे़नासम्म गु गो़नीलाई ते़र्चो? मे़म्लाई एके अके पु़म्दी रा:ने।
18
येसुमी मे़म्लाई हु़त्तामे, को़दीङ् भुत्ळाला मे़म्लाङ् घ्लु:ताको़ लाता। मे़म् वाईंसा मखनाङ् नु़ता।
19
मेत्तीको़ चे:लाद:मी येसुकेदी राम्तामेको़ आघो-आघो मो़:तामे, "गुकु मे़म्लाई माराङ् घ्लु़न्ने माचाप्कावा?"
20
येसुमी मे़म्द:लाई मो़:तामे, "दो़खो़ रे़प्तीनीम्चाम् हो। आजेङ् गु गो़नीलाई मो़:नानी, गो़नीमी कङ् पासाईके आसी:चीथीङ् कल्आ रे़प्तीनीम् ब: खेदा ए़म् कोङ्कोलाई एकेङ् हारे लाओ़ दा:नी खेदा मे़म् ला:, को़दीङ् गो़नी मारा खेदायो पाने चाम्नी।
21
[खेदायो ए़म् खा:ले भुत् चाईं प्रार्थना नुङ् उपास् मान्थी मा:घ्लु।]"
22
मे़म्द गालील्दी खु़म्स्तामेना येसुमी मे़म्द:लाई मो़:तामे, "मु़रु़के तावालाई मु़रु़द:के गु़दी गीमे ।
23
को़दीङ् मे़म् मु़रु़द:मी आम्लाई सा:मे। खेदायो साम् नाम्ती आम् लीङ्सेको़ बोङ्।" मेत्तीको़ मे़म्द:के मारी आनी ग्वा खा:ता।
24
गे़ना आम्द कफर्न्हुम्दी राम्तामे, मन्दीर्दीम् तीरो पोक्आद:मी पत्रुस्केदी राम्तामेको़ दा:तामे, "मारा ईनी गुरुमी तीरो मा:चो?"
25
पत्रुस्मी दा:ता, "हो चो:मे।" पत्रुस् खीम्दी ओ:ताको़दीङ् येसुमी मे़म्लाई ङाल्ला मो़:तामे, "सीमोन्, ईनीवा गेखो़म् ब:? चे़ङ्माखोदीम् हङ्द:मी तीरो सु़लाङ् पोङ्मे? आनी तावाद:लाङ् खी आफालाङ्?"
26
"आफालाङ्", पत्रुस्मी दा:ता। येसुमी दा:तामे, "मो़खो़ खेदा एके बक्आद:मी दा चो:चो मा:दु़म् रेछा।
27
खेदायो मे़म्द गुकुदीङ् आनी सोक्सो मा:बोङ्ला दा:सो सदु़कु़दी लाओ़को़ फे़ङ्गा आपो़, को़दीङ् ङाल्ला ओ:ळा ङा रातो़। मे़म्के आसो़: हो़गीना गो़ कङ् रु़पाके ग्रोक्सो थीदी। मे़म् लातो़को़ ईके नुङ् अके लागी मे़म्द:लाई गीओ़मी।